¹ Micnugemifo iyen ininbaintafi Jisas Kraisin kim mage beyouni, yenkim koc iyem bemino. ² Nevaraino, ayum ban Ayo Inta Jisas Kraisin kim beni semi manda anda ginke vac fugintinke vac utuc sinkarukemino. ³ Afo nefi lo amankac iye uvaranimi nevaraino, mana magagac anda gim erar iyen dukami, afo Koctin uvaremino. Beni bey Agac mana magagakena ogimi manda anda gac ayac ino vani sankami kumemino, afo beni mana magagakena manda anda koc kimi dukemino. ⁴ Beni micnuranami lo gim siganuc yigeunamac kim amankagic intemi, mana magagac anda gim iye avakurecma, Ayo Inta gim beguna foni. ⁵ Afo iyeuyafo mana magagakena anda gim beni mana magagakena adan avakurenone, afo iyeuyafo Ayo Inta gima beni Ayo Inta sevanuci avakurenone. ⁶ Nevaraino, mana magagac anda gim indin munkurukei, fuginino, afo Ayo Inta gim indin munkurukei, ayum fa banda nanayim bandac bac ino. ⁷ Mana magagac anda indini Koctin namugoic uankar indinino, Koctinic lo gin iyem bemi, amankac bac iyem bantemino. ⁸ Afo mana magagac anda gim ban inimbaintauc amankac Koctin amusin iyen amintenone. ⁹ Micnugemifo, mana magagac andagim iyem banamino, afo Ayo Inta gimi banamino, fuga sirema Koctinic Ayo Inta enkim banave. Afo iyefi Kraisinic Ayo Inta benkim iye vanami, beni benindava benaino. ¹⁰ Afo Kraisi enkim banami, en oi manda andaic avacbac kimi fukemino, afo Ayo Intai, anteckan andaic avacbac kimi ayum fani bemino. ¹¹ Koctinic Ayo Inta Jisasin fugintinke ukuka ankeni enkima banami, Kraisin fugintinke ukuka ankeni embaci ayum fa van beyic Ayo Inta gim magagac ogim amintemino, enkim ayum benine. ¹² Afo, sifac tiva unano, yigeunamac yogani dukecumpe, afo mana magagac yogantin amankac mana magagac bantina ino . ¹³ Nevaraino, ena mana magagac anda gim bei, enic fugin acdekaci yevemino, afo ena Ayo Inta gima bei, eyic manda andauc aruman fucde, fani ayum banonamino. ¹⁴ Amucna inimbaintauc Koctinic Ayo Inta yenkaci acnaric ugemino, yeni Koctin agafandauci benone. ¹⁵ Nevaraino, yigeni dumu yinkevan ayo inta yevegec iye maramino feganagonani. Ececi ayun ayo intan maramino, mini foni yigeunamac badurec, "Abba, sen Tifo'o secumpe. ¹⁶ Koctinic Ayo Inta benafoni witnasic yigeunamac sic ayo inta gim usinkaraci yigeunamagac Koctin agafandauc becumpe. ¹⁷ Afo yigeunamac ben agafandauc ma becyami, yigeunamac bac Kocti bey agafandauc yimiran dukan ondauc yigeunamac sinda bemino yigeunamac Jisas Kraisi namac managici ugeci mini onda afoic ontec yamumpe, amankac yigeunamac ma fuga sirec benamac sinavisic mandeci, avogukac bantec yamumpe. ¹⁸ Afo sena omarec indegunai, mage mana yamuc mareyon yinavisic benic erani amankagic iyen ugemino mini avoguc yigenamac afotagic usinkananin namac onaunane. ¹⁹ Kocti uvandan anecneuc Koctin agafandauc afotagic inayon yamuc yonarani dafisemino. ²⁰ Kocti uvandukan anecneuc yenyic avoguc iyem bemino, yenyic yiyintagaino, Kocti micnugano vani uvan dukemino, minigac dafisami mini yamuc yinami ²¹ Kocti uvandan anecneuc fugintim dumugage fasapagic ueni Koctin agafandauyic ayoguc kimi bantenone. ²² Nevaraino, yigeunamac indigecumpe magevac umacden anecneuc bacdeni anon yic anecne gimi benone. ²³ Mini anecneuc manava bacdeyaone, yigeunamac Ayo Intaic acnantapatena yunan agan dukauno vaci sirakim bacdecumpe, , Kocti ye dakacman bey agagic usinkanovani dafisecumpe, fugin bu yevegem sivigantemino. ²⁴ Mini erar indin dukauna foni yigeunamac yevegem sivigemino. Afo mini erar indin dukauni foni iye onarukauna yintemino, iyec erar indiric uren ba oneninan dafisenafino? ²⁵ Afo yigeunamac iye onarukauna van erar indiric urec dafiseci, amankac sirac ocyac ureci mini van dafisentecumpe. ²⁶ Mini ananan Ayo Inta avakundem yigeunamac erar iye dukaunagim sofaemino. Nevaraino, yigeunamac yugam mukeyon iye indirukaunami Koctinic Ayo Inta yeraemi sofa uremi anduntinke ific demi ogam muku sinkemino. ²⁷ Beni mini baintan yigeunamac sinduntin afakaman afotagic evam bemi beni Ayo Intaic indir onarukemino, nevaraino, beni Koctinic ayini avakuremi benkac munkugeyou yivantaci yofa uremi ogam munku yinkemino. ²⁸ Yigeunamac indigecumpe iyeuyafi Koctin avacbac eyouyani, beni umacden anecne managin uvarenimi avogugani uvaremino, Kocti beyic yogantac yaraman dukeniu yindaino. ²⁹ Nevaraino, beni bana yonarukeniuni bani antecman dukemino, beni ben Agac kacnac ugago vani bani yemi yuman dukemino, mini foni beni amucna afac avaunkinke yen yivaic ugantemino. ³⁰ Kocti yema yuren antecman dukauni, beni yembaci yararukemino. Yema yararukeniuni, yemi antecmani dukemino. Afo bena yen antecman yinkarukeniuni yem baci beyic ayoguc uvika yinkarukemino. ³¹ Nevec mini anecneugani sentegafu? Afo yigeunamac sinda Kocti banami iyec mandaic usinkatenafi? ³² Beni bey Agac iyen fakemino, yigeunamac umacde varo siremi avicman yimemino, inkecnic inanac yigeunamac bac umacden anecne fa iye simintenafi? ³³ Iyec Kocti yivic dukan ininbaintauc koc yimintenafino? Koctim beni yenkafar uren antec yinke vaino. ³⁴ Iyec beni koc yimicdem dumu yinkantenafino? Kraisi yigeunamagan benanan fukemino, afo mini vac yankagaremi, beni fugintinke ukukagemino. Beni Koctin namac acnaric uren dafitemi, afo beni yigeunamasic magu mandukemi sofaemino. ³⁵ Iyec yigeunamac Kraisinic ayintinke fasapac daiman sinkatenafino? Mana andauc kinke, umam mararafi, amucna indirafi, ena umar amirafi, yaran fugevanafi, bacdo yigekac iye dukarafi, uman yinaninafi, yiruin soparogafino? ³⁶ Micnin siren santemino, " Enic avogugani umacden nuram yenamac siruman fugec nana benone. Yenamac sonamani arogovan dukan sipi sipi gacnaci ugecumpe." ³⁷ Mana mini umaruc kinke yigeunamac sivacbac evam baintaic eran poni mandukauno becyamumpe. ³⁸ Nevaraino sentic indindac se sinduntinke erani evaci macni onarici ecumpe, fugindac ayum fa vandac, ensorova, kamaniuga, mage benin anecneuga inaen yinanin anecneuga erandaga ³⁹ yanic uganafi macmempa kumbanafi ena anecneuc Kocti uvandukanafi mini anecneuc Koctinic ayin Jisas Kraisi mayausic Iyenon kim benin kinke amankac yigeunamac sivekaman nenkac iyen dantemino.