¹ Ecanan umacden ininbainta yicnonic ugeyon baintauc sinayon indire avakurogo, nevaraino yicnonic ir anda iyem bemino, Koctimpate yinanim manan ino. Yicnonic uge beyouni Koctin dani benone. ² Nevaraino, iyefi yicnonic ugeyou sinayon iye indeni, Koctin avayan arintenone; iyeuyafo Koctin avaya arinayouni, umani ye yigec manan dantenone. ³ Nevaraino dafisiruc avoguc avucavac uvareyou fegar iyen yimintenone, afo manda avucavac uvareyouni fegan yimintenone. Eni dafisiruc yigar iye fegarar ayenafi? Nefi avoguc bananinac uvarano, micne vanona foni avoguc avic amintemino. ⁴ Nevaraino beni Koctinic yogam baintan enic avogugani bemino. Afo ena manda anda uvarevante, ankarac ono; beni yireyon soparoc fa iyen manden nomino. Nevaraino beni Koctinic yogam baintam bemi iyefi manda anda uvare vananin agec umani dantemino. ⁵ Micnugemifo sinayonac indire avakurono, umar aminanim agan nanavaino, afo avoguc anda indinino. ⁶ Nevaraino, mini anda foni takisi ayac anamino. Dafisiruc Koctinic yogam baintauci beni, masicdem nuram yeni miniuc kaci yugan dukenone. ⁷ Iyen indac mandukante ayagac ono: iyenac takisi benafi benac ayac ono: iyeninda benafi: iyeninda ayac benafi benac ayac ono; iyen agarac fege fono ben agarac fegano; iyenac avic yanicin benafi ben avigac yanic ono. ⁸ Eno yinda anecneuc icaen amirare sirecn iyeva marago, ecegac ena enavac yivacbac uyinkago. Nevaraino, iyefi acnagac bananim avacbac emi beni lo sigami avakundami amankagic emino. ⁹ Lo macnin sigemino: "Ena inin aginta namac monkoc iyevac ono, banta arumar iyeva fugono, umor iyevac ono, anasi onare iyevac manda indiric ono," afo ena ena louc ma banami umacden managim manan bagu yugemino: "En acnagac bananin eyar avacbac eonaic urevac avacbac uankano." ¹⁰ Avacbac anda mayan acnagac bananiyim mandaic iyen uankemino; micnugemifo, avacbac andai lo sigami amankagic ugemino. ¹¹ Mana mini foni, mana yamuc onanamino, micnugemifo, máná nurám aci yankagemino, yon dugan ginke ukukago. Nevaraino, yigeunamac ye sivigananin acdekaci yevemino, acnantapac yigeunamac sindun munkoguna yamuc baci yankagaremi. ¹² Ayufun yankagaimi kagar acdekaci yevemino. Micugemifo, yigeunamac yicya ayufun kinkena yogaruc fasapac degaci, kagac kena unambacdo sigec ono. ¹³ Yicya kagagan avucavac kim banic urec avoguc biric ono, mana magagac kena omac andava eran non nare ocenic ir anda vac ecano; yicya monkoc andagin iye bono, anasi namac monkoc iran anon indiric iye ono, namugoic ir anda va ena manda indiric uankar andauc ecano. ¹⁴ Iyenon Jisas Kraisin avicman sesindaic uregaci yigeunamac so manda andauc iye amegaci, benic ayir erar iye uankano.