¹ Sifactiva unano, sen sindun siyenim bac koctimpac yenan inantegunai, yevegen yivigano vanumpe. ² Nevaraino, seni yenana siyimunai yeni anon yiyini Koctinan dukenone, afo yena indin dukeyom poyaino. ³ Nevaraino, yeni Koctinic anteckan andavan iyen indigeni, yenafoni yeyic anteckan andan uvarenone. Yeni Koctinic anteckan andagim iyem benone. ⁴ Nevaraino, Kraisi beni lo amankagic uman demino. Micnim poni umacde iyeuyafi yindun munkugeyou antekantenone. ⁵ Mosasi sandukemino anteckan anda lo ginke yevanan: " Banta lo anteckan anda fona avakuremi mini anteckan anda foni fani ayum bantemino. ⁶ Afo yindun munkugeyon anda fona anteckan anda yigenimi macnin semi, " Ey anduntim iyevac seno, 'Iyec inarumpac urintenino? '(Mini foni, Kraisin un avige kuminonami); ⁷ afo iyevac seno, 'Iyec fukeyou yiman benin masic kim kumintenafi?"' (mini foni, Kraisin fugintinke ukuka ankanonami). ⁸ Afo nevec mini sigenafi? "Mini baya en acnagaci bemino, en avantim bac en anduntim baci bemino." Mini i yindun munkim bayanino, minin yigeunamac siyimecumpe. ⁹ Afo ey avantinke Jisasinan Iyenone sintefi, ey andun munkuruke, Kocti Jisasin fugintinke ukuka ankemino sintei, eni fani ayun banonamino. ¹⁰ Nevaraino, banta bey anduntinken anteckan andavan andun munkurukemino, afo bey avantinken yevegen yivigananin siyimemino. ¹¹ Nevaraino, afan yogim sigemino, " Umacde iyeuyafo benkac yindun munkugeni, yemi yigaye iyen yimintemino." ¹² Nevaraino, Judauc bac Grikiuc enac iyen ugenone. Nevaraino, mana Iyeno manan umacdeyic Iyeno bemino, afo beni ben avic deyou gimi, uvikagemino. ¹³ Afo umacde iyeuyafo Iyenon avic deyouni, fani ayum bantenone. ¹⁴ Afo benkim yindun iye munkugeni, inkecnic ureyaci ben avic danteyafono? Afo benan iye indirukeni inkenic ureyac yeni benkim yindun munkinteyafono? Mam baya siyimin bainta iye banami inkecnic ureyac indintenafono? ¹⁵ Afo, iye siyinkane, inkenic ureyac yeni mam baya siyiminteya fono?— Micni siren santemino, "Inken avogugigac ugenafi, avoguc anecneugan yimusim maram báya siyimeyou yigani!" ¹⁶ Afo yeni umacde mam baya gim iyen indenone. Nevaraino, Asaia semino, "Iyeno o, iyeuyac mayau siyimuna baya gim yindun mukeyafono?" ¹⁷ Afo yindun munkir anda yenimi Kraisinic baya indena indeyom ponino. ¹⁸ Afo seni secumpe, "Yeni iyec indeyafono?" Eyo, fugaino. Yena siram bayani bani umacden magafaci benyen ugemino, yen yivaya umacden maga arasapaci ovemino." ¹⁹ Seni ena yacbac samecumpe, "Israeliuc iyec indirukeya fono?" Bani Mosasi sirukemino, "Seni yigen yirac ukukaranaci sitoc magu uc yivic dukeyou manda indiric uyinkanagomino. Seni yiran anecne ukukaranaci indir iye dukeyou yiran anecne man yinkanagomino. ²⁰ Asaia eraruremi beni semino," Senan iye sifakageyouni sifakenone. Senan iye inda ageyou gaci ye afotagic ecumpe." ²¹ Afo Israiliugani beni semino, "Baya arurena yirac erar urukeyou gaci umacden nuram siyan daunam bemino."