¹ Seni Poli, Jisas Kraisinic yogam bainta, aposoloic ono vani sararukemi, Koctinic mam baya siyimeno vani uyacman dukemi. ² Mana mini mam baya vani beni acnantapac beyic profetiuc kac anteckam afantim poromasic urukami. ³ Bey Agagani sirukemi, beni Devitin ankunkinke mana magagakena ogimi ampankemino. ⁴ Fugin tinke ukukam poni, anteckan Ayo Intan bemi eran dukan Koctin Agagic ino vani facbar emi—mayausic Iyeno Jisas Kraisi. ⁵ Ben kinken yenamac avacba namac aposolo yogan be siran avackundeci sindun munkuna foni mana magagakeno yicbanac kinke ben avigaro sireci mandukecupe. ⁶ Mana magagac kenu yicbanac kinke, embaci Jisas Kraisin indaic ono vani ararukemino. ⁷ Mana afani umacde iyeuyafo Romic begon inimbaintauc yinda ino, Koctinic avacbakimi bamino, antekan inimbainta bagovani yararukemino. Avoguc yigen yindaino, afo Koctinuc Jisas Kraisinuc pate nanayin yigen kim bano. ⁸ Anantapac, sesic Koctim Jisas Kraisin kimi umacde yigemi susu siyinkego, nevaraino yigen yindun munkir anda vani umacden magafac ben yeninare. ⁹ Kocti sentic (witnasim) bemino, sesic ayo inta foni ben Agagic mam baya gim yogecumpe, yigenani sec mana becumpe. ¹⁰ Seni macden yac give vapac yirani sugam mukecumpe, inken asapagafi Koctinic ayina amankagic inage. ¹¹ Nevaraino, seni yigen yonarani siyemino, amankac manaca Ayo Intaic gifti yigen yimenac, amankac eran maragovare. ¹² Sema siyenimi sena sindun munkugeguna fo yigen eran yimenac yigena yindun munkugampo sem bac eran simegovare. ¹³ Sifactiva unano, mage yinduc iye dogo vare, seni yige vapac yirani indegunami, (ani uyackagemi mage amankagici emino), mapac inimbaintauc kinke unafegunaic ureci amankac yigen kinke yunan unafontecumpe. ¹⁴ Grikiuc kina anamuru uc kina, ayoguc indin dukeyou gina, oecen indin dukeyou gim yogani dukecumpe. ¹⁵ Afo, seni Romic ban inimbainta mam baya siyimirani ukukagecumpe. ¹⁶ Afo seni mam baya vani sigaye anecne iyen marecumpe, nevaraino mam bayai Koctinic erani bemino, umacde iyeuyafo yindun munkugeyou yevegen yiviganino, Judauc yinda acnari inami Grikiuc minigacino. ¹⁷ Nevaraino, yindun munkintake yindun munkintimi Koctinic antekan anda afotagic ugemino, yindun munkintake yindun munkintim, micni siren santamino, "antekan andagim beyouni yindun munkin anda foni fa ayum bantenone." ¹⁸ Afo Koctin aran anecne inarumpate umacden manda anda vac iye antekan inimbaintauc yigeci afotagic intemino, yeni iye antekan anda foni fuga sigam baya asapac uyagenone. ¹⁹ Mana mini nevaraino, Koctinan indigeyomi yen yugankai bemino. Nevaraino, Kocti yemi kaga yinkarukemino. ²⁰ Nevaraino, benic opac ban avoguguc, mini aviguci, iye kipan erandac Koctinic yankagan anecneuc, afotaci onenone, mana maga uvaraninkake, uvaran anecneuc kimi onarukenone. Koc yinanin yamuc ayàc iyen sintenone. ²¹ Nevaraino, yeni Koctinan indirukenofo, ben onaman yanic iyen eni, susu iyen siankenone. Eceni, yenyic indin anana uini, yen yinduntim avoguc bac iyem bami, ayufumi kagemi. ²² Yeni yeyaran avoguc indini dukecumpen senofo, iyeino yenkim ocemi bemino. ²³ Yeni fanana van Koctinic avoguc kagan onaman fukam bainta amana, nuna, er iyevan agan dukan safurauga, amuc anac nin anecneuc yiman kacnaci enone. ²⁴ Micnugami Kocti yemi yimicman yen yindun yiyenin ampin anda va, ye yiran monkoc ogo vani siyinkemi. ²⁵ Koctinic fuga mandar umac kin deni, yen Uvarenin eceni be uvandan anecneuc kac mam seni yenyic yogaric eni, ben avic iye kipan yac yanic enone. Fugai. ²⁶ Nevaraino, mini andaugani Kocti iye anteken yen yiyenin monkoc anda gim demi, nevaraino yen yinac mac ye yivafu namac eyon anda eceni iye antekan monkoc anda uvarenone. ²⁷ Baintauc bac oganici enone, ye yinac mac namac eyon anda eceni yeyirani yigona baintau gani iga yigemi. Mini baintauc yigaye andaic yigona baintauc namac ageyon anda foni yen yiyagenin andagaic áyác mande benone. ²⁸ Nevaraino, Koctinan indinayon indindac iyen dukanone, beni iye anteckan andaic ogo vani yeyic indin fasapac mandan dani, yenyic indintim irandac iye vana monkoc indiruc yenkim uvikagenin yenkac dafisino vani ugic yinkemi. ²⁹ Yenkim umacden iye anteckan andava, manda anda va, ena inda anecneugan yiyir anda va, enon mandaic uankare arir indin uvarar anda uvikagemino. Yenkim ena inda anecneuc mararan eran yiyini dukeni, ena namac arue asie ir anda va umac sire ena inda marar anda va mandaic ir indiruc yenkin uvikagemino. ³⁰ Yenkim yicnaem baya sir anda va, ena avic mandaic ir anda va, Koctinan iye yiyir andauc uvikagemino. Yeni oyam manda andauc uvanan deni, ye yino yifon yivaya iyen indeno. ³¹ Yeni indin mareyon iye dukeno; yenkim yindun iye munkeno, ye yinduntinke ena ayir anda iye vani, ena avacbac uankar anda iyen dukeno. ³² Yeni Koctinic lo indintin dukenone, yena mini andauc uvareyouni fugin mararani yiyemino. Afo mini manda andauc uvararanna va eyaone, eno mini andauc uvareyou yacbaci siman erar uyinkenone.