¹ Feyugami Baya bagemino, mini Baya Kotin namaci bami, mini Baya Kotim bami. ² Mini Baya feyugami Kotin namaci bagemi. ³ Umacden anecneuc benkimi uvaremi, mage uvandukenin anecneuc, bena iye vami mana anecne vac iye uvandukami. ⁴ Ben kimi ayum fa vani bami, ayum fa vani banta anasiu yic omi vami. ⁵ Mini omi ayufun kin kevami, ayufum bemi iyen davac emi. ⁶ Koti mana bainta sankarami yemi, ben avic Yoni i. ⁷ Beni on yinaninan facbaruren siyimina umacden inimbaintauc ben kin amankac birivic inteno. ⁸ Yoni mini ona bagenai, beni amankac mini onan siyimirani yemi. ⁹ Fuga omi, banta anasi kaga yinkananimi, mana magagac yimintemi. ¹⁰ Beni mana magagaci bami, mana maga ben kimi uvaremi, afo banta anasi bemi anufare iyen indigano. ¹¹ Beni beyic magu gimi yemifo benic banta anasi iyen avigeno. ¹² Afo manaca inimbaintauc ben avigauni ben avic kim birivic eno, beni Kotin agagic ogo vani amankagic uyinkemi. ¹³ Yeni koranic ayintagaino, oic ayintagaino, bantaic ayintagaino, iyeino, yeni Kotinic ayintac ampamenone. ¹⁴ Baya bantaic uemi, yenamac yenamac sicbanac kimi bagemi. Yenamac benic anon eran namac anon avic namac onecumpe, mini inta avic duka bemi, beni Kotimpaten yemino, afo ben kim avacbac namac fuga avucavac namaci uvikagamino. ¹⁵ Yoni benani bacduremi facbaruren siyimemi, "Mana mini bainta vani seni siyimunaino, 'beni sen sicnaen yinani, sem baci yankagagemino, nevaraino, seni iye ampankaunami benare bamino."' ¹⁶ Ben kim avacbac anonic uren uvikagami, mini avacbac poni macde yigeunamac avogugic usinkemino. ¹⁷ Mosasi lo manan yimemino, afo avacbac namac fuga avucavac namac Jisas Kraisimpate yemino. ¹⁸ Maya vac Kotin iyen onarukemino, afo ben agac beni Koti bemi bey Afon anafaci bemi, beni bey Afom mandan afotagic emino. ¹⁹ Afo manai Yonin avaya ino, Yuda dafisiruc Yerusaremi magufate prisiuc namac Livaiuc siyinkani ben indairani bevankac yeraeni bemi indaeno, "Eni iyec befono?" ²⁰ Beni fuga siremi siyimemi, mana anecnevac iyen umerani, beni fuga siremi siyimemi, "Seni Kraisi va begaune." ²¹ Afo yeni bemi indaeno, "Eni nec befono? Eni Elaisa befono?" Beni semi, "Seni iyeino." Yeni seno, "Eni profetic befono?" Beni yevegen siyimemi, "Iyeino." ²² Afo yeni indaeno, "Eni iyec befono, sisiminagaci yenamac sisinkac yuna baintauc maro siyimeno? Nevec eyarani sefono?" ²³ Beni siyimemi, "Seni afasam magafac bacdevan ameni becumpe. 'Iyenonic a mandan antec ankano, 'profet Aisaia micni siremi sirukamino." ²⁴ Afo Farisiuci manaca baintauc siyinkani yerae, ²⁵ bemi indaeno, "Eni Kraisifi, Elaisafi, profetfi iye bantei, eni nagac eci nom manyinkefono?" ²⁶ Yoni yemi yevegen siyimemi, "Seni nom poni nom manyinkecumpe. Afo maya yigen yicbanac kimi bemino, yigeni bemi iyen onarukamino. ²⁷ Beni sen sicnaemi yemifo, seni benic sendori nan utuc ankar amankagic iyen ugecumpe." ²⁸ Mana mini anecneuc Betani magugimi Yodani ena ofaci ampamemino, minifaci Yoni nom manyinkevami. ²⁹ Ena nurami Yoni onami Jisasi bena vankac yevami, beni semi, "Onano, mecyamini Kotinic Sipisipi Agac mana magagac kena inimbaintauc yic manda andauc mandan karuc yinkanan ino. ³⁰ Manai benani seni secumpe, 'Maya sen sicnaen yinani i sem baci yankagagemino, nevarai, seni iye ampankaunami, benare bamino.' ³¹ Seni bemi iyen onagacumpe, afo sena nom pona nom manyinkac yeguna foni Israeri inimbaintauc yugan kac beni afotagic intemino." ³² Afo Yoni facbaruremi siyimemi, "Seni onegunami Ayo Inta nun kacnaci inarumpate agemi kundaemi, ben naroci dofemi. ³³ Seni bemi onaic iyen ecumpo, bena nom manyinkano vana sisinkac yuno, semi sisimemi, 'Ena onanama Ayo Inta ben naroc ye kumandinani, beni Ayo Inta foni nom manyinkantemi.' ³⁴ Seni onareci siyimecumpe, mana Kotin agaci bemino." ³⁵ Afo yevegen, ena nurami, Yoni beyic disaipori ganda namac ukukageni, ³⁶ onami Jisasi yemi yankagemi bevami, Yoni yemi siyimemi, Onago, Kotinic Sipisipi Agac ino." ³⁷ Benic disaipori ganda indami micni sirani yeni Jisasin avakure beno. ³⁸ Afo Jisasi yovaevemi yonani ben avakure yami beni siyimemi, "Nevarac yigeni afakegafono?" Ye kanda bemi sameno, "Rabai" (mini baecdanami "Tisai") Eni nafagac mac befono? ³⁹ Beni yemi siyimemi, " Yeraec onago." Afo yekanda yeraeni bena van kin oneno, yekanda ben namaci mini nuram benamaci bageno, nevarai ayinkagic 4 kiroki ic emi. ⁴⁰ Yoni sevana indem bainta ganda ginke maya Jisasin avakurem bim bainta Endrui, beni Saimon Pitan afaci. ⁴¹ Beni bey avami Saimon Pitan nare onaremi samemi, " Mesaiami yenamac onecumpe."(Mesaia baecdanami "Kraisi"). ⁴² Beni avigemi Jisasi vankaci maro rami, Jisasi bemi onaic uremi semi, "Eni Saimoni, Yonin agaci banamino. Mage en avic Sifasi" (mini baecdanami "Pita") nen sintenone. ⁴³ Ena nurami, Jisasi Galilic birar emi, Filipin onaremi samemi, "Sen sivakurono." ⁴⁴ Filipi, Endru na Pitau, Betsaida taoni ginkeno bageno. ⁴⁵ Fililpi Natanielimi onaremi samemi, "Mini bainta Mosasinic lo yo gim bac profetiu yic yo gim, benana sandukageyom bainta yenamac onecumpe; beni Yosepin agaci bemi, Nasareti magu ginkeno bemino. ⁴⁶ Natanieli bemi indaemi, "Mana avoguc anecne Nasareti magu ginke ampamintenafino?" Filipi bemi samemi, "Yerae onano." ⁴⁷ Jisasi Natanielin onami bena vankac yevami, beni benani semi, "Onago, mana fuga Israeri bainta ino, ben kin umac bac iyem bemino." ⁴⁸ Natanieli bemi indaemi, "Inkenic ureci eni semi sonagefono?" Jisasi bemi yevegen samemi, "Filipi emi iye ararukaya, eni onda yay anda gimi banaci, seni emi onecumpe." ⁴⁹ Natanieli bemi yevegen samemi, "Tisa o, eni Kotin Agaci banamino! Eni Israeriu yic kimi banamino." Jisasi bemi yevegen samemi, ⁵⁰ "Seni enana sec, 'Onda anda gimi banac onecumpe suna foyaci,' eni birivic efono? Eni mana vac yankagare anon anecneuci onanonamino." ⁵¹ Afo beni siyimemi, "Fuga ugami sireci emi samentecumpe, inarun ona diyinami, Kotinic enyorouc Banta Aga kac undae gundae evana eni onanagomino."