¹ Mana nuran acbanac kinkac, disaiporiuc amucnaic o urami, Griki magusapatena Yudauci Hibru uc amucna baya siyinkeno, nevarai, yeni macden yac yunanuc dainde yime beni yenyic kentoc ininanuc iyen yimevano. ² 12 disaiporiuc amucna birivi inimbaintauci yaraman deni siyimeno, "Yenamac Kotin avaya siyimin yogan yere ecec yunanuc daindec yimiran bonami iyen antegantemino. ³ Afac ava unano, yigeni amankaci afac kantan omandan baintauc yige yicbanac kinkake yuman danagomino, avoguc yivic dukena, yenkin Ayo Inta uvikagana avoguc indin dukam baintauc yivicdagaci yenamac yivic danayaci mini yogantac dafisego. ⁴ Afo yenamac yugam mukin yogan marac beci Kotin avaya siyimin yogandac marantecumpe." ⁵ Umacde mini baya indireni yimusimi mareno. Afo yeni Stivenimi avigeno, beni eran birivic evam baintan bami, Ayo Inta benkimi uvikagami, afo Filipi na Prokorusi na Nikano na Timoni na Parmenasi na Nikolausi Atioki magusapate Yudau yic man kin andun baecdukam bainta vaci avigeno. ⁶ Birivi inimbaintauc mini baintauc yivigeni aposoriuc yugampac maro rani, yiyan yenkac deni yugam muku yinkeno. ⁷ Micnami Kotin avaya anonic emi ben yen imi, birivi inimbaintauc Yerusaremi magusimi amucnaic eno, amucna prisiuc baci oyam baya gim birivic eno. ⁸ Afo Stiveni, benkim avacbac namac eran dac uvikagami, beni enac ugan anecneuc baga mirikoriuc anasi banta yicbanac kin uvarevami. ⁹ Afo manaca fayan yogan inimbaintauc utuc yinkarukam mam mac fridmani ve sire avic dan kinke, Sairini magusinke namac Alexandria magusinkena mam mac kinkake namac manaca Silisia magusinke namac Esia mam mac kinkake ukukeno. Yeni Stivenin namaci amucna bayauci sevano. ¹⁰ Afo Ayo Inta Stivenin indina amima senin bayauc yeni yevege bemi siankanayon amankagic iyen emi. ¹¹ Micnini yeni manaca baintauc kac kuntanuc urani yeni seno, "Yenamac indegunami Stiveni Kotin namac Mosasin namaci manda bayauc siyinkevamino" ¹² Yeni banta anasiu ga, yicnom baintau ga, lo gin tisaic ugam baintauc yirac ukukarani, Stivenin ye fakareni kansorouc yugampac maro ukuka ankeno. ¹³ Yeni umac witnasiuc yivige mare rani, yeni seno, "Mana bainta mana anteckam magu namac lo namagani manda baya sirani, avantac iyen fakemino. ¹⁴ Nevavarino, yenamac indegunami beni semi Jisasi mana magu anankaremi Mosasi yenamac kin dan kumin avucavac baegarani semino." ¹⁵ Macde kansoro gin kumantageyon inimbaintauc yugam ben kac ana duke onami ben oni enyoro ontanaci emi.