¹ Mána bainta ben avic Ananaiasi bami, ben anac Safira namaci, mána maga ayac ogovani dani, ayaceno. ² Beni daindemi manaca beyan fakamanaremi, (mini vani, ben anac bani indigami) manaca aposoriuc yigantimi maro remi. ³ Afo Pita bemi samemi, "Ananaiasi o, nagac enaci bananon en arakin uvikaiyaci, Ayo Inta umac siankareci magagakena monoc dainde manaca eyani fakefono. ⁴ Mini maga ayac iye ugami, eninda bagemino, icnaen ayac uraya marana mono kac enafo dafitageonamino. Nagac iyaci mini indin ey anduntim mini avucavac uvararan defono? Eni banta va umac siankananaino, Kotimino." ⁵ Mini baya indemi, Ananaiasi minigac yandemi fugemi, mini ampaminan inden inimbaintauc anon yaci gemi. ⁶ Fumarauc ben o davarave ukureni, doye maro masiceno. ⁷ Igona amun kandac manavac yankagaimi, ben anac ne anecnefi ampameninan, iye indini, minigin yefegemi. ⁸ Pita bemi samemi, "eni sisimeno, magagac micnumaraci ayac eyafono?" Beni samemi, "Eyo, minicnan kacino." ⁹ Afo Pita bemi samemi, "Yige kanda, nagac egaci baya uyuregaci Iyenonic Ayo Inta amam macankegafono? Onano, en avafum maro masicam baintauc mini onagaci yeraenone, embaci doye bintenone." ¹⁰ Eseci minigac yandemi ben agantim fugemi. Fumarauc naun umpece onami fukani, yeni doye ben avafun acnagaci maro masiceno. ¹¹ Man kim ban inimbaintauc baga inden inimbaintauc mini anecneuc ampaminan indemi anon yaci gemi. ¹² Aposoriuc yiyankinke amucna mirikori va enac ugan avucavaguci banta anasiuc yicbanac kin ampamevami. Yeni Soromoninic rumu gimi baguyuge bano. ¹³ Amucna birivic an inimbaintauc yenamac yevarani fegevano, yeni micnenofo, yemi yonaman yanici evano. ¹⁴ Amucna inimbaintauc Iyenon kim birivic eni yeni yiric anan eni, iye yandan inimbaintauci ye uvike amucaic eno. ¹⁵ Micnam poni, yic inimbaintauc baci yivige anon ay avafac ban sagoc ana va, iyena siauc ginkaci yinkani bano. Pita mini ayana yankagem binam ben amaman amankac yenkac davacino vani micnevano. ¹⁶ Amucna inimbaintauc baci Yerusaremi magu adecanagena taoni ginkake yic inimbaintauga manda spiritiuc mandaic uyinkarukan inimbaintauc baci yivige ye baguyugano, macden yiyofan mareno. ¹⁷ Afo yicnom prisi ukukemi, benamac bageyou (Sadusiuc); namac yenkim manda indiruc uvikaini, ¹⁸ aposoriuc manda indiric uyinkareni, yemi umacden inimbaintau yic karavusi mac kimi fakaman deno. ¹⁹ Micnami Iyenonic enyoro ayufumi karavusi mac onauc diremi mapac yivigen kundaemi, yemi siyimemi, ²⁰ "Oraec, mam mackin ukukaegaci banta anasiuc iye kipan yaum maranayom baya vaci siyimego." ²¹ Yeni mini baya indireni kagarar acdekagic evani mam mackin umpeceni mini baya siyimeno. Afo yicnom prisi benamac bageyon baintauc namac macden Israeri dafisim baintauc namac baguyuge baya sirani, karavusi mac kinke aposoriuc yivige yego vani sondiauc siyinkani beno. ²² Sondiauc orae karavusi mac kin iye vani, yeni yevege oraeni siyimeno, ²³ " Yenamac karavusi mackin oarec onaunami macden onauc uyakami sondiauc onagac ukukagaci, yenamac ona direc onaunami, maya vac minigin iyem bami. ²⁴ Afo mam mac kinkena sondiau yic dafisin namac yinom prisiuc mini bayauc indireni, yeni amucna indirici eni, mini acnaemi ne anecne ampamintenafino indirici eno. ²⁵ Icnaem mana bainta yeraemi yemi siyimemi, "Karavusi mac kin dana bageyom baintauc mam mac kugu gimi ukukage banta anasi mam baya tisin enone." ²⁶ Afo sondiau yic dafisin beyic sondiauc namac oareni yivige yeno, banta anasi onacban yirinayon agani fecdeni, iyen yireno. ²⁷ Yeni yivige mare reni, macde yugampaci ukuka yinkeno. Yicnom prisiuc yemi indaeni, ²⁸ seno, "Yenamac yigemi eram baya sireci mini avic kac mam baya iye siyimego vani umoc duyinkaunac, iye indini yigeyic mam baya siyimiman Yerusaremi magusin uvikaman deci, mini baintaic fugin yenamac simofin irani yigemi yiyemino." ²⁹ Afo, Pita aposoriuc namac yevege yemi siyimeno, "Yenamac Kotin avayan avakurontecumpe banta iyeino. ³⁰ Yenamac sifo unan yic Koti beni Jisasin ukuka ankemino, yigena dunkin yasac iyem pona aruman fugom bainta. ³¹ Koti bemi onaman yanic uremi, bey ayan ugampaci dami ben acnagaci bemino, beni kin agagic ugemi yenamac siyayintemino. Beni Israeri inimbaintauc yindun baec yinkaremi yenyic manda andauc ugic yinkantemino. ³² Yenamaci mini anecneuyic witnasi becyamumpe, Ayo Inta vacino, Koti ben avaya indauni bemi yimic dukemino." ³³ Kanisorouc mini baya indireni, yeni anon yiran anecne mandeni aposoriuc yiruman fugirani indeno. ³⁴ Afo mana Farisi bainta ben avic Gamarieri bemi, beni lo gimi tisaic ugam bani, umacden inimbaintauc bemi onaman yanici evano, beni kanisorouc yicbanac kin ukukaemi eram baya ginke mini baintauc yivige mapac marogun da sito kac bago vani siyimemi. ³⁵ Mini acnaemi, beni siyimemi, "Israeri inimbaintaugo, kapinagegac indego, ne anecnefi yigena mana baintauc uvayinkarana bayauc uvarac none. ³⁶ Bani manaca nuran yankagaimi, Teudasi ukukemi beyarani sivic dukauno becumpe sirani, manaca inimbaintauc amankac 400 amami benamac ye vanone. Bemi aruman fucdami, ben avakurageyon inimbaintauc dakacdeni iyaye mana mana uomi, mana anecnevac iyen ampamemino. ³⁷ Afo Teudasin acnaemi Yudasi Gariri magusinkeno yivic marevayon yamuc kinkaci ukukemi manaca baintauc yiviman besapac demi. Be yacbaci fucini, ben avakurageyo inimbaintauc yerereni mana mana eno. ³⁸ Afo yigemi mage siyimentecumpe, mana baintauc kake nenkac begaci iyevac yiruogo, nevaraino, yena uvararana indeyon indirafi yogarafi bantaic indintac ampamevanami, yandintemino. ³⁹ Afo Kotin inda banaci, yigeni amankac iyen aruman fuginagomino. Yigeni onanagomino, Kotin namaci yiruiamino." Afo yeni mini baya indireni maro minigaci eceno. ⁴⁰ Mini yankayaini yeni aposoriuc yaraman deni Jisasin avic kac sire iye siyimego vani umoc duyinkareni, ecani beno. ⁴¹ Yeni kanisorouc baguginke yerere beno. Yeni Jisasin Avic kim yinavisic maranani Koti yemi yandaman danani yimusin marani beno, Jisasin Avic kim yinavisic maranani yimusimi mara beno. ⁴² Mini yankagaimi macden nuram mam mac kina ena ena baintauc yimac kinkac yeukeni avoguc baya Kraisinani Jisasi ino sireni siyimevano.