¹ Tiofilusi o, ema bana afan sandan ameguna gimi, Jisasi kugandemi macden yogaruc maremi tisin ageninugani emi samecumpe, ² beni eram baya Ayo gimi bena yaraman dukan aposoriuc siyimic dami Koti bemi avigen inarumpac uremino. ³ Beni anavisic mandemi dunkin yasac fukagemi, icnaemi ukukaemi yenkac afotagic ugemi, ben aron afuruc yocyigevami. Beni 40 nurami yenkac afotagic ugemi, Kotinic avoguc maguvani siyimevami. ⁴ Beni yenamac macde managim baguyugemi, beni eram baya ginke Yerusaremi magu yerere iye bogo vani yemi siyimemi, yeni minigac be ye Yifonic poromasi gac dafisego vani macni siremi siyimemi, "Yigeni sena sunai indirukamino ⁵ Yoni fuga siremi nom poni yigemi nom man yinkemino, afo manaca nuran yankaganaci yigeni Ayo Inta gimi nom maranagomino." ⁶ Yeni managim buguyugeni bemi indaeno, "Iyeno o, mage mana yamugaci eni yevege Israeri magu ukukaman dantefono?" ⁷ Beni yevegen yemi siyimemi, "Mini acnauga oc yamuguc yinaninani yigen yinda anecneva banac indinagonaino, mini i yigeunamac Sifo beyic eramponi indin uvandukemino. Benafo manan indigemino. ⁸ Afo mini yamuc Ayo Inta yigen kac yerainac eran mandeci, Yerusaremi namac macden Yudia namac Sameria maguginkac oraemi maga ara maro kipagan kac orainaci yigeni sentivam bantaici uganagomino." ⁹ Jisasi mini bayauc siyimicdemi, maside inarumpac mana kagake onami, bemi kun doyen urevami, mana konami yen yugan kac uyac dani bemi ena yacbac iyen oneno. ¹⁰ Yeni inarumpac kagacke bena urevan onami, yinduc dimi, kantan bainta efan bacdo gim yen yacnagac ye ukukeno. ¹¹ Yekanda seni, "Yigeni Gariri baintaugo, nevarac yigeni managac ukukagegaci inarumpac mana kagakegafono? Mana Jisasimi yigen kinke inarumpac avigen urevac onanic uremi umbaegen kuminac onanagomino." ¹² Yeni Orivi ge sire avic dan anugake ovage Yerusaremi yeraeno, Yerusaremi acdekaci bami, mána kilo mita amami bemi. ¹³ Yeni yeraeni, yan amugapac ye baran rumu gimi ureno. Yen yiviguci, Pita, Yoni, Yemsi, Endru, Filipi, Batolomeu, Matiu, Yemsi Alfaeusin agaci, Saimoni Salotin ankunkinke, afo Yudasi Yemsi agaci. ¹⁴ Yeni masicde managim beni yugam mukir indintac mánam banone anasiuc namac Maria Jisasin anon namac ben afacava unan namac. ¹⁵ Mini yamuc kinkaci Pita birivican inimbaintauc amankac 120 yicbanac kimi ukukaemi, semi, ¹⁶ Sifactiva unan o, Kotinic yogim bam baya ampaminami amankagic intemino, mini baya Ayo Inta Yudasinani Devitin avantac dami semino, beni yivigem maro yocyigani Jisasim fakareni dumenone. ¹⁷ Nevaraino, beni yigeunamac kinkeno bemi, yigeunamac yogageguna yogani beyacbaci marevamino. ¹⁸ (Afo mage mana bainta manda anda uvarankakena monoc mandemi maga ayac uremi, minigaci acnon nare magapac kumimi, ben arac foten uvandemi fasapac kumemi. ¹⁹ Maside Yerusaremi magugim ban inimbaintauc minivan indireni, mini maga ye yivaya ginke "Akeldama" be sireni avic deno, minivani semi, "Koram bacyigam magai.") ²⁰ "Micnugami minivani Sam Yogimi santemi, 'Ecananac mini magagim mana anecnevac iye vananaci, banta vac minigin iyevac bano'. 'Afo ecananaci mana bainta bena dafitagenin yogan marano.' ²¹ Mini amankagici intemino, nevaraino, mana bainta masiden nuram yigeunamac namac nogeni, beni Iyeno Jisasi bagemino, ²² kugandem mini nurama Joni nom maraninkake Koti yigeunamac kinke bemi avigen urin nurami, beyacbac yigeunamac namac bemi yivam baintaic ugemi bena fukagen ukuken ureninan siyimino." ²³ Yeni katam baintan yuman deno, Yosepi ben avic deni Barsabasi, ena avic Yastusi, afo Matiasi namaci. ²⁴ Yeni yogam muke seni, "Eni, Iyeno o, banta anasi yinduntin yonaganamino, micnuganamifo eni mandan afotagic ono mana kanda ginke inkenic eni uyacmant dukefono ²⁵ mana yogan dac aposori yogan Yudasi yererem beyic magu fac beninic magu marantenafino. ²⁶ Afo yeni yenan kaonta karucdami Matiasin avic kaci kumandini benamaci 11 aposorouc namac yandaman deno.