¹ Lole usauli, bwo akali akuyugha ukoghofiwa kwa kughoghiwa kwa bafundiwa ba Malafyale, bakatuma kwa muputi usongo ² sona bakamusuma abokalata ba masinagogi mu Damasika, pakuti pala abagha yo akaba musilayiyi, kali mulisha pumu mukolo, abapinye nukuya nabo ku Yelusalemu. ³ Bwo akwenda, chikaboneka ukuti apalamila ukufika ku Damasika, kukaboneka ubwelu ukufuma kumwanya nukumushunguli; ⁴ akawa pasi nukupulika ishu likayugha kukwake, ''Sauli, Sauli, kufwimaki?'' ⁵ U Sauli akamula, ''we wini, Malafyale?'' U Malafyale akati, ''ne Yesu, yuyo ukumufwima; ⁶ lole nyamuka, ingila makayaya tise ubushiwe chicho ubombe.'' ⁷ Abandu babo bakenda nu Sauli bakimilila nukusoba ichakuyugha, ukupulika ishu, lole ukushita ukumuketeta yumo. ⁸ U Saulo akanyamuka, mwo ighula amaso ghake, atakaketagha nachimo; po bakamulongosha ninyobe nukubuka nawe ku Damasika. ⁹ Pamashiku matatu ukushita kutesha ukutwsha, atakalya nu kung'wa. ¹⁰ Po kukaba umufundiwa yumo uwa ku Damasika ingamu yake Ananiya. Umalafyale akayugha nawe muchisetuka, ''Ananiya!'' Akati, ''tesha, ndipano, Malafyale.'' ¹¹ Umalafyale akayugha akati, ''nyamuka, buka mukasila kokakwitishiwa kakugholoka, panyumba ya Yudasi mulalushe umundu uwa kutasasi yuyo ingamu yake wi Sauli, pakuti akwiputa. ¹² Aketa ichisetuka umundu yuyo ingamu yeke wi Ananiya nukwisa pakawuka utukono papako,ukuti ande pakutesha sona.'' ¹³ Lole u Ananiya akati, ''malafyale, napulika abingi bakuyugha isha mundu uyu, ububibi ubwingi bubo abomba ku bikemo bako mu Yelusalemu. ¹⁴ Ali nubulaghili bwakufuma kubaputi abosongo ukupinya weshi yula yuyo akukola pangamu yake.'' ¹⁵ Lole u Malafyale akamubula akati, ''buka, paqpo chibombelo changu ichisayiwa, nyamula ingamu yangu pandashi pabakuse bobomalafyale nabana aba Isilayeli.'' ¹⁶ Ngwisa ukulangisha mwotiatamiliwa pa chifukwa cha ngamu yangu.'' ¹⁷ Po u Ananiya akabuka, nukkwila munyumba. nukubika utukono papake, nukuti, ''wewamwitu Sauli, umalafyale u Yesu, yuyo akakubonekela uwe musila'bwo ukwisa, anduma une ukuti uwe wande pakutesha nukwisula nu mbepo mwikemo.'' ¹⁸ Paponapapo fimo isa makalalamba ghakawila mumaso gha Sauli, sona akapokela ukutesha; akanyamuka nukoshiwa; ¹⁹ akisa alya nukukaba amaka. Akikala ku Damasika amashiku amingi. ²⁰ Papo napapo akanda ukufumusha u Yesu mu masinagogi, ukuti mwana wa Chala. ²¹ Boshi babo bakamupulika bashigha nukuti, ''Tamundu yuyo akakomania abandu boshi mu Yelusalemu yuyo akitishiwa ingamu iyi? Isa kuno ukuti apinye abandu aye nabo kubaputi abosongo.'' ²² Lole u Saulo akakulagha ngani namaka, akapeleka ubwogha kubayuda bobakila mudamasika ukushimikisha ukuti u Yesu wi Kilisitu. ²³ Bwokwenda amashiku amingi, abayuda bakababatika pamupene ukuti bamughoghe. ²⁴ Lole ulubatiko lwabo lukamanyikwa kwa Sauli. Bakaketeleshanga pamilyango pamusi napabushiku ukuti bamughoghe. ²⁵ Lole abafundiwa bake bakamwe pabushiku nukumusolongesha pachibwashi, nukumwingisha mwa basiketi. ²⁶ Bwo isa ku Yelusalemu, u Sauli akaghesha kuba pamupene nabafundiwa, lole boshi bakamoghopagha, nukushita ukusubalila ukuti mufundiwa. ²⁷ Lole u Banabasi akamwegha kuya nawe kubafundiwa, nukubabula mumwo u Sauli akamuteshekesha u Malafyale pasila nukuti umalafyale akuyugha nawe. ²⁸ Akaba nabo, ukwingila sona nukushungulila ukufuma muyelusalemu. Akayugha mubukifu mungamu ya malafyale u Yesu. ²⁹ Sona bakasusania na bayuda aba ku Giliki; lole bakendelela ukuti bamughoghe. ³⁰ Bwo abowamwabo bashimanya ishi bakisa nawe ku Saliya nukumutuma ku Tasasi. ³¹ Po palapala, ichalichi cha Yudeya, Galileya,nnu Samaliya chikaba numutende sona chikasengiwa; sona,chikendagha mubwogha bwa Malafyale nukusuwashiwa numbepo mwikemo, ichalichi chikakula ninambala inyingi. ³² Shikisa shamanyikwa bwo u Peteli akwendela muchighaba choshi, akisa sona kuwikemo abandu ba Chala bo bakikalagha mukaya ka Lida. ³³ Kula kukayika umundu yumo ingamu yake Eniyasi, yuyo akaba pachitala chake imyaka eyiti(8), pakuti akafya imbafu. ³⁴ U Peteli akayugha akati, ''Eniyasi, uYesu Kilisitu akuposha. Nyamuka njukuyania ichitala chako, '' nakalinga akanyamuka. ³⁵ Po weshi yuyo akikalagha mu Lida namu Shaloni bakamutesha umudu sona bakang'anamukila kwa Malafyale ³⁶ Po ku Jopa kukaba umufundiwa yumo ingamu yake Tabita(lyo likafumila kungamu ya ''Dolikasi''). Umolo uyu akisula nimbombo inyisa sona ni mbombo isha chisa sho akabombelagha abapina. ³⁷ Bwo kwafika mumashiku ghala akabina nukufwa; bwo bamosha bakamughoneka ku chinda chakumwanya. ³⁸ Pakuti u Lida akaba kupipi nu Jopa abafundiwa bakapulika ukuti u Peteli alikulakula, bakatuma abandu babiliku kwake, nukumusuma, ''wendelele ukushita ukukaba.'' ³⁹ U Peteli akanyamuka nukubuka nawo.Bwo afika, bakaya nawe kuchipinda cha pamwanya,abafwilwe boshi abakolo bakimilila papipi nawe nukulila, ukumulangisha ifya kusona ni myenda yiyo u Dolikasi akapanga bwo ali nabo. ⁴⁰ U Peteli akabafumya boshi kuse, akafughamila nukwiputa; po, akang'anamukila kumubili akati, ''Tabita, nyamuka.'' Po akighula amaso ghake, nukumutesha u Peteli akikala. ⁴¹ U Peteli akamupa akakono kake nukumunyamusha; bwo itisha abandu ba Chala abikemo na bakolo abafwilwe akisa amubika wabwumi kubandu. ⁴² I fundo iyi yikisa yamanyikwa mukaya koshi aka Jopa, nabandu abingi bakasubila kwa Malafyale. ⁴³ Fikaboneka ukuti u Peteli akikalako amashiku amingi mu Jopa nu mundu yuyo ingamu yake ya Simoni uwa ku Tana.