¹ Po kukabako umundu yumo mu kaya ka Kayesaleya, yuyo akitichiwanga ingamu ya Koneliyasi, yuyo akitishiwanga ukuti musilikali wa ku Itale. ² Akaba mundu wakwiyipa yuyo akamoghopa u Chala ni nyumba yake yoshi, akabapanga abandu ifyabupe ifyingi nukwiputa kwa Chala ukushita kuleka. ³ Bwo kaya pakukwana akabalilo ka fili okoloko mwishiku lila, akatesha muchisetuka uwandumi wa Chala akwisa kukwake. Uwandumi akati kukwake, ''Koneliyasi!'' ⁴ U Koneliyasi akaketelesha sona akati, ''Chochoni ichi, mughindikiwa?'' U wandumi akati kukwawo, ''Inyiputo nifyabupe fyako fyabikiwa ukuba fya kukumbushikishamo pamaso gha Chala. ⁵ Ulu tuma abandu kukaya ka Yopa pakumwegha yuyo ingamu wi Simoni yuyo akwitiwa ukuti Peteli. ⁶ Yuyo akwikala munyumba ya Simoni umukasa makwela, yuyo inyumba yake yikaba mulubafa lwa nyanja.'' ⁷ Bwo ubandumi yuyo akayugha nawe afumapo, u Koneliyasi akabitisha ababombi bake babili aba munyumba yake, nu musilikali yuyo akamwoghopagha. ⁸ U Koneliyasi akababula fyoshi fifyo fikabombiwa sona nukubatuma ku Yopa. ⁹ Akabalilo kalakala mwishiku ilingi bwo akabalilo kakuya ku fili okoloko, bwo bali pabulendo bwabo sona bwo tibafikaghe mukaya, u Peteli akabuka ku nyumba ya kumwanya pakwiputa. ¹⁰ Isala yikisa yamubaba po akalondagha ifyakya fimo, lole bwo abandu bakupiya ichakulya, akapeghiwa ichisetuka, ¹¹ akaketa kumwanya kwighukite akaketa chimo isa chililo chikikagha, chicho chikaba chikulu icha makona folo chikikagha pase. ¹² Mukati mwake mukaba ifinyamana fya filundi folo nafifyo fikwendela ifukwe pase, ni fiyuni fyamumwanya. ¹³ Po ishu likayugha kukwake: ''Nyamuka, Peteli, ghogha nu kulya.'' ¹⁴ Lole u Peteli akati, ''awe, Malafyale; papo ndalile lumo ifindu fimo fifyo finyali sona fitelushiwe.'' ¹⁵ Lole ishu likisa kukwake ulwabubili: ''Chicho u Chla achelusha, utangatingi chinyali.'' ¹⁶ Ifi fikabombiwa katatu; po ichililo nakalinga chikeghiwa ukubuka kumwanya ¹⁷ Pakabalilo aka bwo u Peteli afulungana nafyo ichisetuka chicho akachibona fifyo chikasanushanga, bakanyomoka, abandu babo bakatumiwa nu Koneliyasi bakamilila pamulyango, bobabushikisha isila yakuya ku nyumba shabo. ¹⁸ Bakitisha nukulalusha pala u Simoni, yuyo akitishiwa ukuti Peteli akaba papala. ¹⁹ Bwo u Peteli akwinong'ona isha chisetuka, umbepo akamubula akati, ''Keta, abandu batatu bakukulonda. ²⁰ Nyamuka sona bukagha nabo. Utakakanaghe pakubuka nabo, papo nene mbatumite.'' ²¹ Po u Peteli akabiuka kubandu nukuti, ''Nene ndipanu yuyo mukulonda. Choni chicho mwisile?'' ²² Bakati, ''umusilikaliyuyo akwitiwa ukuti Koneliyasi, umundu umugholofu sona uwakumoghopa u Chala, sona akayughiwa akisa kuwa kaya koshi akabayuda, akapeyiwa amashu ukufuma kwa Chala, pakwendela muwandumi umwikemo nukubabula ukuti abatumile umwe ukuti mwise kunyumba yake, ukuti ise apulikishe amashu ukufuma kukwinyu.'' ²³ Po u Peteli akabitisha ukuti bingile nukwikala nawe. Bwo kwacha mwishiku ilingi akanyamuka nukwingila nabo, sona abalumyana bamo abakufuma ku yopa bakamukonga. ²⁴ Mwishiku lilyo likakongapo bakisa kwa Kayesaleya.U Koneliyasi akabalindililagha; umwene ababitisha abakamu pamupene nabangali abapapipi. ²⁵ Shikisa shabombiwa bwo u Peteli ingila, u Koneliyasi akakomana nawe nukuwa pase pafilundi fyake nukumwiputa. ²⁶ Lole u Peteli akamwafya pakwimilila, akati, ''Imilila! une nune ne mundu.'' ²⁷ Bwo u Peteli akuyugha nabo, akingila sona akabagha abingi babunganite pamupene. ²⁸ akayugha kukwabo, ''Umwe mwebenecho mukumanya ukuti tachakubaghila pakuti abayuda banganeghe pamupene pamo ukubachulila abalendo. Lole u Chala andangishishe une ukuti ndakamwitishe umundu yumo ukuba munyali atelushiwe. ²⁹ Popo leka ngwisa kwambula kususha, bwo natumiwa. Po ngubusha choni cho ukatuma kukwangu.''' ³⁰ Koneliyasi akati, ''bwo bopakinda amashiku folo mukabalilo kakaka , ngiputagha pakabalilo ka munyumba yangu; po ngaketa ,umundu imite pandasha papangu afwalite imyenda imyelu ngani ³¹ .Akati ,Koneliyasi, inyiputo shako shapulikikwa nu chala, sona ifyabupi fyako fyamukumbusha u chala isha uwe. ³² Tuma yumo ku Yopa, nu kumwitisha umundu yo akwitishiwa ukuti Simoni yo wi Peteli.Akwikala mu nyumba ya Simoni umukasa makwela mulubafu lwa nyanja. ³³ Pabwandilo ngatuma, chikaba chisa pala ukisagha. Ulu, tweboshi tulipanupanu pamaso gha Chala pakupulikisha fyoshi fyo ulaghiliwe nu Chala pakuyugha. ³⁴ U peteli akighula umulomo wake nukuyugha ukuti, ''nubwanaloli, ngushimikisha ukuti u Chala a takusalila muchimanyani. ³⁵ Mubuyo mwake, mutwaya toshi weshi yo akumoghopa nukubomba imbombo inyisa, akwitikishiwa ku kwake. ³⁶ Mukughamanya amashu gho akatuma kubandu baku Izilayeli, bwo akufusha inongwa inyisa ishalutenganio ukwendela mwa Yesu Kilisitu, yo wi malafyale wabosi. ³⁷ Umwe mwebenecho mukufimanya fyo fikabombiwa, fyo fikaboneka mukaya koshim aka Yudeya, ukwanda mu Galileya, panyuma palwasho lwo u Yohani akafumusha; ³⁸ Imbombo shoshikakwafanianga nu Yesu wa muna zaleti, mwo u Chala akamushukisha nu mbepo mwikemo namaka. Umwene akabuka nukubomba imbombo inyisa nukuba posha bo bakabashiwa nu setano. Pakuti u Chala akba nabo. ³⁹ Twebokamboni ba fyoshi fyo u Yesu akabomba, abamukaya ka bayuda na mu Yelusalemu. Bakamughogha pakumupayika pikokwe, ⁴⁰ Lole u Chala akamususha pishiku iyabutatu, nukumupangisha kuti aboneke, ⁴¹ Takubandu boshi,lole kubokamboni bo bakasaliwa nganila nu Chala ku utwe twe tukulwa nukung'wa nawe bwo ashuka ukufuma kubafwe. ⁴² Akatukomelesha pakulumbilila ku bandu nukushimikisha ukuti uyu akasaliwa nu Chala ukuti abe mulongi wa babwumi na bafwe. ⁴³ Kokukwake ko abakunguluka bakushimikisha, ukuti weshi yo akusubila mu mwake akuya pa kupokela uluhobokelo pakwendela mungamu yake.'' ⁴⁴ Bwo upeteli akali akuyugha ishi, umbepo mwikemo akika pa weshi yo akapulikishanga ku mashu ghake. ⁴⁵ Abandu bo bakaba kulubafu lwa bitiki bo babufuliwe boshi bo bakisa nu Peteli bakaswigha, papo ichabupe cha mbepo mwikemo chikapungukila sona napabakuse. ⁴⁶ Po bakapulika abandu bakuse bakuyugha mu njugha shachilendo nukumutufya u Chala. Po u Peteli akamula, ⁴⁷ '''Alipo yumo yo angakanisha amishi ukufuma kubandu aba ukuti manye boshiwe,abandu ababo bambilile umbepo mwikemo ngati twetwe?'' ⁴⁸ Po akabalamulila ukuti boshiwe mungamu ya Yesu Kilisitu. Po bakamusuma ukuti ikale nabo amashiku amangi.