¹ Kukale Nyambi wambangile nowa kuku wetu ko apolofita mu shikati shoshingi no muinu yoingi. ² Uno honi muno muyuwa o mamaneneno, onamamba kukwetu ko mwanenji, oyu anahangula kushuwana enu yoihe. Kukwenji kalo Nyambi wakwamine kaye. ³ Yoliyo monisha kutethzima kwa Nyambi, oyu monisha shemwa omu anakalela Nyambi. Onakwata enu yoihe pofoci ko okolo o liywi lyenji. Apa namana kukenisha ivi, ayepo kala ku lyoko lyo shilyo lyo Ofumu oukulu. ⁴ Onapiluka omukulu ku man'eloi oahe eci eli lili lithzina anashwana lyolikulu kupita mathzina o. ⁵ Mukonda lipi lin'eloi ambelile Nyambi ci, ''Omwanange, lelo ninapiluka Tata oe''? Nji lilpi lin'eloi eli ambelile Nyambi ci, ''Kenge nakukala Tata wenji kalo aye kenge akukala Mwanange.''? ⁶ Unone kalo, Nyambi ou nalete mweli wenji muno mu kaye, namba ci, ''Man'eloi a Nyambi oahe amulombelel.'' ⁷ Ku man'eloi amba ci, ''Yoliyo kwama man'eloi enji kuakwama mupepo, na apikenji kuwakwama malimi o mulilo.'' ⁸ Unone kwa Mwana amba ci, ''Ofumu woye, Nyambi, wakukana kupwa. Kuvuthsa ko kuluka koliyo kuvuthsa ko ofumu woe. ⁹ Ona himi kuluka no kuthzimba kukana kuluka. Honine Nyambi, Nyambi oe, onakuweshe maathzi o shinyanyu kupita angenjoe.'' ¹⁰ ''Kumatatekelo, Fumu, yowe wakwamine kaye. Mawilu po ekwama yo moko oe. ¹¹ Kenge yakupwa, unone owe kowa kupwa. Kenge yakukulupala eci ito. ¹² Kenge wakuipeteka eci lipai, kalo kenge yakupiluka eci shito. Unone owe kowa kupiluka, kalo myaka thzoe kathzipu. ¹³ Unone lipi lin'eloi eli ambelile Nyambi shanga pashikati shofoci ci, ''Okale ku lyoko lyange lyo shilyo kukumena apa nakukwamena akwethzimbo yoye ilyatelo yo maulu oye.''? ¹⁴ Eine kali man'eloi oahe po mupepo ou ukwama, kalo atumiwanga kuna babalela awo akushwana kuyoishiwa?