¹ Honi, apetu, mutulombelele, ci liywi lya Fumu lilithze n'uwa ne lilemekiwe, eci eli lili kukwenu namwe, ² ne kalo ci tuamweniwe ku anu okukana kukena no shivi, mukonda kali anu wahe awa ali no shitawo. ³ Unone Fumu wakusepahala, oyu wakumitanalisha no kuminyunga koyu o mumango. ⁴ Twalishangala kwa Fumu ko amwe ci, mwakwama kalo kenge mukwatelela kukwama enu ei tunamituminina. ⁵ Fumu amonishe micima thzenu ku shihemo sha Nyambi no kuku tanala kwa Kilesite. ⁶ Honi twamitumena, apetu, mu lithzina lya Fumu wetu Jesu Kilesite, ci mushiye mwapenu yomuhe omuva no kukana kuyoya kuthza ko mulao namutambula kukwetu. ⁷ Mukonda amwe mwashida mwalimuka ci mwaloela ci mututamenene, mukonda kanatukala no uva apa natukala nenu. ⁸ Kanatuli ishima yomunu ei tunakana kuula, unone kuma natukwamanga mutanya no ushiku kukwama nene, ci lelo twamilemisha. ⁹ Kuma natukwama ei kali ci katuloelile kulya kwa anu, unone kuma natukwama ei ci mumonene kukwetu, ci namwe mututamenene. ¹⁰ Mukonda apa twakalile nenu, kuma twamituminine ci, ''Munu oyu kana kuhima kukwama lelo alya.'' ¹¹ Mukonda twayuva ci wamweya kukwenu ava, kakwama ekwama, unone elama yo yakwama enu yokupila okwathsi. ¹² Honi anu okengeyo twawa tuminina no kuwakutulula kwa Fumu Jesu Kilesite, ci akwame kwanatutwala ne alye ishima yo shemwa. ¹³ Unone amwe, apetu, lelo mwaaya kukwama uwaa. ¹⁴ Kalo ngeci munu kamamela liywi lyetu omu mu lin'olo, mumulimuke oyo munu ne mwaliwana nenji, ci afe honyi. ¹⁵ Unone mwamumona ci mukwashithzimbo shenu, unone mumukutulule eci mwapenu. ¹⁶ Honi Fumu o kuliyala aye amipe kuliyala shikati shoshihe mu muikalelo ouhe. Fumu akale nenu mwaheno. ¹⁷ Ame, Paulusi, nan'ola ei ko lyoko lyange, asho shimonisha sho mu man'olo ninan'olanga oahe. ¹⁸ Shihemo sha Fumu wetu Jeu Kilesite shikale nenu mwaheno. Ameni.