¹ Nalibwene bashikulu bali makene mupepi ne conto, eli balabile, ''Pameni pa mitwi sha mpanda pakweba ati pa fi bwambilo nga patenkane, ufitobe mufipeswa pa mitwi yafiko fyonse, eli nkepaya aba kupelako nempoko. Tapalipo neli umo uukafumapo. tapalipo neli umo uukafyuka. ² Nangaba ati bakatula mu Shoeli, umo ukuboko kwandi ku kababula. Nangaba ati bakanine ukufika kwiulu, uko nkaba bwesha panshi. ³ Nangaba ati bakafisame pa lupili lwa Kamelo, uko nkabafwaya nekuba bula. Nangaba ati balifiseme pali nebo panshi ya cinika, uko ngeba insoka, kabili ika basuma. ⁴ Nangaba ati bakaye mukutapwa, uku mintwa kubalwani babo, uko nkeba impoko, kabili ikabepaya. Amenso andi akaba palibo mukubakatasha sombi tapalipo nipa fiweme.'' ⁵ Ba Yawe ba mabumba balekata impanga eli ilasunguluka; na bonse abekala muliyo. Balosha; nayo yonse ikema koti, ne kubunda nakabili koti ninika yaku Egipiti. ⁶ Niye uwibaka intatilo shakwe mu maulu alipangile, ne filamino pa calo capanshi. Ala eta amenshi amu cinika, ne kuyetila panshi pa calo, ba Yawe eshina lyabo. ⁷ Kanshi tamuli koti bena Kushi kuline, mwe bantu bwaku Isilaeli ukufuma mumpanga ya Igipiti, aba Filishiti ukufuma ku Keleti? Nabena Alamu ukufuma ku Kiya? ⁸ Bona, amenso aba Shikulu Yawe ali pa bufumu bwa cibipile, kabili nka conaula ukufuma pa calo, ukufumyako lukoso ukweba ati nshikonaula mukushilisha inganda yakwa Yakobo- uku ekulabila kwaba Yawe. ⁹ Bona, nkapela ukukonkomesha, kabili nkatekanya inganda yakwe Isilaeli pakati ka mishobo yonse, koti fintu umbi atenkanya insangu pali sefa, ukweba ati pebapo akabwe akanini neli kamo ukuponena panshi. ¹⁰ Shonse imbifi sha bantu shikafwa kumpoko, abo abalabila ati, 'Ipensho tali katu eulukapo neli ukutukumanya fwebo.' ¹¹ Pa bushiku ubo nkemakanika insakwe yakwe Defeti iyo iiwile, ne kwisala mu lyangwa fya kuko. Nkemya ubonaushi bwa kuko. Nokubwibakulula koti mu nshiku shakale. ¹² Ukweba ati bangapokolola abashelepo abamu Edomu, nemishobo yonse iitilwe peshina- uku ekulabila kwaba Yawe- alaficita ifi. ¹³ Bona, inshiku shikesa- uku ekulabila kwaba Yawe ili uwakulima akacilapo uwakutebula newa makwebo efisepo akamucilapo uubyala insangu. Ulupili lukaswa itaima ishamise, nempili shonse shikakukila pamo. ¹⁴ Nka babwesha mubusha abantu bamu Isilaeli. Bakebake imisumba iyaonaikile nokwikalamo, bakabyala amabala ami faina nekunwa umwangashi waiko, bakalima nefisebe nekulya ifisabo fya mumo. ¹⁵ Nkafibyala mumpanga yafiko, kabili tafikanukulwapo libili ukufuma mumpanga iyo iyina bapele,'' Ifi efi balukulabila ba Yawe Lesa wenu.