¹ Eli akilipa alabila kuli PAulo, ''Nausuminishiwa ukuilabilila.'' Eli Paulo atambalike ukuboko alukuilabilila ati, ndeti ndiwushuka. ² ''Ndukulyeba ati ndishukile, mwe mfumu Akilipa pakuti nakulilabilila pamenso enu lelo ifyafintu ifyo fyonse ifishininwe kuba Yuda, ³ nekucita pakuti mwebo mulishi intambi shaba Yuda nemepusho. Pakuti pali fyefyo ndukumupapatileni ati mu ng'umfweumutimanteka. ⁴ Ciine aba Yuda bonse balishi ubwakashi bwandi ukufuma ku bwaice bwandi ubwali mubantu ba mucalo candi kabili mu Yelusalemu. ⁵ Pakuti balishiibile ifyakuli nebo pakutatike, nga basumino kashimika ati, koti cikoto icilungeme icakucila icakupapa kwesu naliikele mu Faliseyo, ulukuta ulukosele mu bwakashi bwesu. ⁶ Lomba ndimakene pano mukupingulwa pakuti mukucetekela kwakulayana uko uku balaile ba Lesa kuli bawishifwe. ⁷ Nekulayana uko imitundu yesu ikumi naibili ilukubapyungila ba Lesa nmunkonsha akasuba nebushiku, ili icetekelo ati tuka ikako, ifyakucetekela uko emulandu unshininwe kuba Yuda mwemfumu. ⁸ Mbanindo mulukufyabela ati kankalwa kani ba Lesa balabusha bafwile? ⁹ Nebo icine, nalukulanguluka ati ukwelelwa ukucita fintu ifingi ifyakulilengulula ishina lyaba Yesu baku Nasaleti. Ifyo efi nacitile namu Yelusalemu. ¹⁰ Kabili nalikubakako abengi abalungeme mufifungo ili napokele ubukulu kuba patilishi, abakulu lomba pakubepaya, nanebo nalukusumina. ¹¹ Nalikubapanika mushita yonse nemufilonganino nalukwesha ukubalengesha ukucabola, fyefyo pakubashilikila nelibakululwishe nakumishi yabanafyalo. ¹² Fyefyo pakulukwenda ukuya, ku Damasiko nebukulu nemafude abapatilishi abakulu; ¹³ akasuba pakati, wemfumu, nalibwene panshita ukutuba kwafumine kwiulu ukwakucila napa kutuba ukwakasuba, kwalitubyatile nabao abo nalukwenda nabo. ¹⁴ Fyefyo ili twawile panshi, fwense nalumfwile ishiwi lilukulabila kuli nebo mumulaka waba Ebeya, ati, ''Sauli, Sauli, nindo ulukunkululushisha? ukusabula icibambala webo kufyakusasela kulikateshe. ¹⁵ Kumfwa nebo ati, 'Mba nimwebanani mweba Shikulu nabo bashikulu ati, 'Ninebo Yesu aba ulukupenshya. ¹⁶ Sombi ima wimakane; pakuti pali fifi naboneka kuliwe, mukukusalulula umupyungishi nemboni yafintu ifya mulifyefyo emo bambona neya fyefyo ema nkaboneka kuli webo. ¹⁷ Ukukupulusha kubantu nakubena fyalo abo nkakutumako, ¹⁸ mukubashibula mumenso ati bakaalukile kukutuba ukufuma kumfinshi nakuli ba Lesa ukufuma kubukulu bwakwe Satana ati, bakapoke ukulekelele fyakubifya nebupyani pakuti pali babo abasheshiwe pakuti pakupemamo muli nebo. ¹⁹ Pakuti pali fyefyo, mwemfumu Agrippa, nshinalengulwilepo ukubonako ukwakwiulu; ²⁰ sombi nalitulishe tange kubaku Damasiko, fyefyo naku Yelusalemu, namonse mucalo cabena Yudaya, nakubena fyalo nabo ati, ukumwelelweni ukulapila nekwalulukila kuli ba Lesa, ili mucite milimo ielelwe ukusosa. ²¹ Pakuti pali fyefyo aba Yuda balinjikete mwitempuli nekwesha ukunjipaya. ²² Fyefyo pakuti nalipokele ukungafwako ukwafumine kuli ba Lesa ekuku njiminine ukufika nakuli lelo, ili nshimika kubaice naku mfumu nekulukulabila fyefyo ifi walabile abakushimikja na Monse ati fikesakucitika- ²³ ati ukubelelwa ba Klistu ukusomenwa, nakabili ati, pakuti pakubuka kwabafwile bo nekutanga kutulisha ukutuba kubantu nakubena fyalo.'' ²⁴ Lomba pakulilabililefyo, Festo alilabile neshiwi ilikulu ati, ''Paulo wafunta ukusambila kobe ukwingi kuluku kufuntisha.'' ²⁵ Sombi Paulo ati, "Nshifuntile, mweba Festo, mwebaweme, sombi ndukutulisha amashiwi ayacine abuntunse. ²⁶ Pakuti imfumu iliishi ifyafye fya; nakabili ndukulabila apabutile kuli ye, pakuti ndiishi ati ifyo fintu paneli cimo icifiseme kuli ye, pakuti icintu ico tacacitilwe kumpelo. ²⁷ Mwe mfumu Agrippa, mulukucetekela abakushimika? Ndiishi ati mulukubacetekela.'' ²⁸ Kumfwa Agrippa alabila kuli Paulo ati, ''Nekutekenesha kunini ulukufwayo kungalula umwina Klistu?'' ²⁹ Naye Paulo ati, ''Ndukufwaya kuli ba Lesa ati neli kanini, neli kukulu, tamuli nimwebo mwanka sombi nabo bonse abalukungumfwa lelo, mube koti ninebo, sombi ukukakwa uku.'' ³⁰ Fyefyo yalimine mfumu nempemba, na banishi nawabo abo baikele nabo; ³¹ sombi ili baile kumpelo, bali kubulana ati, ''Uyu muntu taacitilepo neli kantu akelelwe imfwa neli fyakukaka.'' ³² Naye Agrippa alilabile kuli Festo ati, ''Uyu muntu nga tafwaile kuli ba kaisa nga angakakululwa.''