¹ Eco tulingile ukubikako sana amano ku fitwaumfwa akale, ukweba ati tufumako. ² Pantu kani amashiwi aya labilwe na ba malaika yabonekele ukuba aya cine, no kuluba nakambi ukutomfwila filapokelela ukukandwa ukulingile, ³ mba fwe tungapusuka shani kani twasula ipusukilo ilikulu mfi? Ndi ipusukilo elyalabilwepo pa kutampa na Shikulu no kushininkishiwa kuli fwe ku baumfwile. ⁴ Pa nshita imo yenka Lesa kacita no bu mboni ukupitila mu filangililo, ifipapusho, na muficitwa fya maka ifingi, nakambi pa kwabanya Umupashi wa mushilo ukulingana no kufwaya kwakwe. ⁵ Pantu takulipo kuli ba malaika uku Lesa apele icalo icikoisa, icitukolabilapo. ⁶ Lelo, umbi apantu pambi kalabila, ukweba ati, "Mbo muntu cindo, ukweba ati mulokumwibukisha? Nangu umwana wa muntu, ukweba ati mulokumusakamana? ⁷ Mwapangile umuntu ukucepako panono pali ba malaika; mwamufwikile ubucindami no mucinshi. ⁸ Mwabika fyonse ukupetelela panshi ya makasa yakwe." Pantu ni kuli ye eko Lesa apele fyonse likoso ukumupetelela. Tashileko nangula cimo icitapetelelapo kuli ye. Lelo nomba tatungabonapo ifili fyonse ukupetelela kuli ye. ⁹ Nomba twabona uyo uwapangilwe ukucepako pali ba malaika pa ka shita akanono, Yesu, afwikilwe ubucindami no mucinshi pa mulandu wa kucula ne mfwa yakwe, ukweba ati ku nkumbu shaku Lesa, enga labusha imfwa yapa bengi. ¹⁰ Pantu calilingile ukweba ati Lesa, apo fyonse fyabelako ye nakambi muli ye, ukuleta abana abengi ku bucindami. Calilingile ye ukucita intungulushi ye pusukilo lyabo ukufikapo ukupitila muma cushi. ¹¹ Pantu bonse pamo uuwamya na mbo abawamishiwa bakwata intulo imo. Eco tomfwapo nsoni shakubeta ati ba wesu, ¹² Alabila ati, "Nalokushimika ishina lyenu kuli ba wesu, nalokwimbila mwe mukati ka kulongana." ¹³ Nakambi ati, " Nalokucetekela muli ye." Nakambi ati, " Boneni, mpano ndi na bana abo Lesa ampa." ¹⁴ Pali nci, apo abana balabanako mu mubili no mulopa, naye mu nshila imo yenka kaabanako, ukweba ati ukupitila mu mfwa onaule uyo uwaba na maka ya mfwa, ekweba ati, ciwa. ¹⁵ Ifi cali mukweba ati alubuleko bonse abo mukutina imfwa baikele ubwikashi bwabo bonse mu busha. ¹⁶ Pantu mu cishinka tabalipo ba malaika afwa, lelo abana baku Abraham. ¹⁷ Eco calilingile ye ukupalana na ba wakwe mu nshila shonse, ukweba ati abe shi mapepo wa luse ne cishinka mu fintu fyaku Lesa, nakambi ukweba ati angaleta ubwelelo pa membu sha bantu. ¹⁸ Pantu Yesu umwine aliculile nakambi alitunkilwe, alikwata amaka ya kwafwa mbo abakotunkwa.