¹ Ekwebati, apo twaba abakushingulukwa ne kumbi ilitangaikulila ilya bakambone, katubike pambali icifinine conse no lubembu ulu takatashepo kuiposamo. Katubutukyo lubilo no mukonsha ulwapelwa kuli fwe. ² Katukutikishe kuli Yesu, uwasangile nakambi kawaminisha wa citetekelo. Pa nsansa ishabikilwe pali Ye, kashipikishako ku lupanda, nangu kati mwali musebanya, no kwikala panshi ku kuboko ukwakulilako ukwa citebe cakwa Lesa. ³ Emfyo kanshi langulukenipo pali Ye. ngo uwashipikishe nkulya kukansana ukufuma ku ba bembu ukwali pali Ye epakwebati tamunakilepo no kutompoke mitima. ⁴ Ukufika napali nduno tamulakanya nangu ukushombokapo no lubembu ukufika lukoso na kumulopa, ⁵ nakambi mwalilabukile ukucincisha ukwali ku mulangilila nga bana. "Mwana wandi tekwesha ukulanguluka mukucefya ukusalapula kwa Mfumu, nangu kunakuka ulo akokulungamika. ⁶ Pantu Imfumu isalapula mbo abo yatemwa, nakambi ilakanda umwana onse no ooyapokelela". ⁷ Shipikisheni mu macushi kubati kusalapula. Lesa acita kuli mwe kubati fintu bacita ku bana. Mba mwana ndo uoo wish atasalapula?. ⁸ Nomba kati tamusalapwilepo, umo bonse abantu babamo, kanshi ninshi muli bana bamubucende. ⁹ Mukutwalilila, tulikwete bata bakumubili abatusalapula no kubacindika tulabacindika. Mba nomba tacakacilemo ifitunga nakila wish wa mipashi no mweo?. ¹⁰ Bata abesu balatusalapula pakashita akanini ukulingana nefi babona bwino. Nomba Lesa atusalapule mukwebati ifintu fituwamine, epakwebati tukumeko kuli bu mushilo bwakwe. ¹¹ Takwabapo ukusalapula ukusansamusha pali njilya nshita, sembi ukuleta ubukali. Nomba kuntanshi ififumamo fitwalo fya mutende wa bulungami kuli mbo abakampushiwa kulico. ¹² Emfi koselesheni amaboko yenu ayafwampukile na makufi yenu ayanakile. ¹³ Lungamikeni inshila sha makasa yenu, pa kwebati icilemene tacenekelapo sembi ukuposhiwa. ¹⁴ Mukonkelele ukuba no mutende ku bantu bonse, na bu mushilo, pantu apatapo nci tapapo uwakubone Mfumu. ¹⁵ Beni abacenjele pakwebati neli umo ekabulwapo ku luse lwakwa Lesa, nakambi ukwebati umushu uululile nangu umo ukumanepo no kuleta ifyongo, pakwebati abengi bekowelapo kulico. ¹⁶ Nangu uuli onse umulalelale ne cinangwa, kubati ni Esau, uuo pacilyo lukoso cimo kashitishapo no mubeli wakwe. ¹⁷ Pantu mulishi ukwebati kuntanshi, ulo afwaile ukupyana amapalo, bali mukene, pantu tasangilepo apakulapilila, nangu kati alilifwaile ne minsoshi. ¹⁸ Pantu mwe tamwishilepo kulupili ndo ulungekatwa, ulupili ulwaka umulilo, mfi - mfi, ukushibantukila, inkuba. ¹⁹ Tamwishilepo ku kulila kwe penga, nangu kwishiwi ilikolabila kuli bakomfwa abalombele ukwebati icebo nacimbi cingalabilwapo kulibo. ²⁰ Pantu tekuti bashipikishe ifya konkobeshiwe, "nangu kati inama yakumya ulupili, ifwile ukutobwa amabwe. ²¹ Emfi kukuboneka kwali kubati kwakutinya ukwalengele Mose ukulabilapo ati, "ndi no mwenso nakambi nkotutuma". ²² Nomba, mwaisa kulipili ku lupili lwa Sioni na nakambi kumushi wakwa Lesa uwa mweo, Yelusalemu wa kwiulu, nakambi ku makana ukumi lya bangelo abali mu kusefya. ²³ Mwishile kukulongana kwa mabeli, mbo abalembwa mwiulu. Mulishile kuli Lesa, kapingula wa bonse, nakambi ku mipashi ya bulungami mbo abana abapwililikile. ²⁴ Mulishile ku Yesu, ndubulwila wa cipangano ca bwangu, nakumulopa uwasanshilwe uulabila ukucila pa mulopa wakwa Abele. ²⁵ Boneni ukwebati tamwakenepo uukolabila. Pantu mfi efi batapusukilepo ulo bakene kuwalikubasoka pa calo, ca kushupa kati ba alukila ngo uukobasoka ukufuma kwiulu. ²⁶ Panshita imo, ishiwi lyakwe kalisubanye calo. Nomba pali nduno ali laya no kulabila, "Nakambi akashita nshakasubanyepo icalo cenka na kusubanya ne ulu". ²⁷ Nga mashiwi, "Nakambi akashita" likopilibula ukufumishiwapo kwa fintu ifisubana, ekwebati fyonse ifyabumbilwe, pakwebati ifitangasubanyapo fikashala. ²⁸ Ekwebati, ukupokelela ubufumu ubutangasubana, katube abakutotela nakambi mulinji nshila shinshimuneni Lesa mu mucinshi na katina. ²⁹ Pantu Lesa wesu mulilo uuoca.