¹ Elo Lesa apalile Noah na bana bakwe, no kubeba ati, "Fyalaneni, fuleni no kwisusha icalo. ² Umwenso wa kutina mwe ne cintinya cenu fyakuba pa nama sha mweo shonse pa calo, pa fyuni fyonse ifya mwiulu, pali fyonse ifibila pa mushili panshi, na pe sabi lyonse ilya muli bemba. Fyapelwa mu kuboko kobe. ³ Conse icenda ica mweo calokuba icilyo kuli mwe. Fyenke finamupele ifimenwa fya mabulamabula, nomba namupa fyonse. ⁴ Lelo mwilokulyapo inama no mweo wa iko - ekweba ati no mulopa wa iko - mukati. ⁵ Nomba pa mulopa obe, umweo uuli mu mulopa obe, nkafwayapo amalipilo. Mukuboko kwa nama yonse nkaufwaya. Mu kuboko kwa muntu uuli onse, ekweba ati, ukufuma mu kuboko kwa uyo uwaipaya umunakwe, nakufwaya ukulondolola pa mweo wa ngulya muntu. ⁶ Onse uwasumya umulopa wa muntu, umulopa wakwe wakusumiwa ku bantu, pantu ni mu cipasho caku Lesa emo amupangile. ⁷ Nomba mwe, fyalaneni no kufula, kumaneni pa calo ponse no kupesusha." ⁸ Elo Lesa alabile kuli Noah naku bana bakwe pamo, ati, ⁹ "Nomba nebo, umfweni! Nkocita icipangano namwe na ku bana benu abakumukonkapo, ¹⁰ naku fibumbwa fya mweo ifili nenu, ku fyuni, ku fitekwa, ne fibumbwa fyonse ifya pa calo muli nafyo, kuli fyefyo ifya fumine mu bwato, ku fibumbwa fya mweo pa calo. ¹¹ Nebo nkofishapo icipangano candi nawe, ukweba ati takwakabepo nakabili ukonaulwa kwa fya mweo ku lyenshi. Takwakabepo nakabili ilyenshi lyakonaula icalo." ¹² Lesa kaeba ati, "Nci e cishibilo ca cipangano ici nkopanga pakati kandi nawe nakambi pa fibumbwa fya mweo ifili nawe, na pa nkulo shobe ishakuntanshi; ¹³ Nabika inkongolo yandi mu makumbi, nayo yalokuba icishibilo ca cipangano pakati kandi ne calo. ¹⁴ Calokuba ukweba ati ulo naleta ikumbi peulu ya calo ne nkongolo yaboneka mu makumbi, ¹⁵ elo nalokwibukisha icipangano candi, icili pakati kandi nawe na pa fibumbwa fyonse ifya mweo ifya mibili. Amenshi tayakabwekeshepo nakabili ukuba ulwenshi lwakonaula ifya mweo. ¹⁶ Inkongolo yalokuba mu makumbi nande nalokuibona, pa kweba ati ndokwibukisha icipangano ca mutatakuya pakati kaku Lesa ne fya mweo fyonse ifya mibili ifili pa calo. ¹⁷ "Elo Lesa aebele Noah ati, "Nci e cishibilo ca cipangano ici na fishapo pakati kandi ne fibumbwa fyonse ifili pa calo." ¹⁸ Abana baku Noah abafumine mu bwato bali ni Shemu, Hamu, na Yafeti. Hamu e wafyele Kenaani. ¹⁹ Mba batatu e bali abana baku Noah, nakambi ukufuma kuli mba abantu kabesula pa calo. ²⁰ Noah katampa ukuba umulimi, nakambi kabyala ibala lya myangashi. ²¹ Ye kanwako umwangashi no kukolwa. Kalala tafwelepo mu cikutulo cakwe. ²² Elo Hamu, wishi wakwa Kenaani, katambila ba wishi no kweba ba wakwe babili panse. ²³ Eco Shemu na Yafeti kababula insalu no kuifimba pa fipikiti fyabo, kabaya cimfutanuma no kufimba pa mwanshansoni wakwa wishibo. Ifinso fyabo kafiloleshe kumbi, Eco bo tabatambilepo wishibo. ²⁴ Ulo Noah akololokele, kaumfwa ifi umwana wakwe umwaice acitile kuli ye. ²⁵ Ye kalabila ati, "Watipwa Kenaani. Walokuba umusha ku bakwanu." ²⁶ Ye nakabili kaeba ati, "Yahweh, Lesa wakwa Shemu, apalwe, nakambi Kenaani alokuba umusha wakwe. ²⁷ Lesa alokukusha umupaka wakwa Yafeti, naye alokwikala mu fikutulo fyakwa Shemu. Kenaani alokuba umusha wakwe." ²⁸ Panuma ye lyenshi, Noah aikele imyaka imyanda amakumi yatatu na makumi yasano. ²⁹ Inshiku shonse isha kwa Noah shali imyaka imyanda pabula na makumi yasano, elo afwile.