¹ Elo Yosefe akwete ubulanda ica kuti kawila pa menso yakwa wishi, nakambi kalila pali ye, no kumufyompa. ² Yosefe kakonkobesha abasha bakwe bakondapa ukukanga wishi. Efi bakondapa bakangile Israeli. ³ Kabapishapo inshiku amakumi yane, pantu efishiba inshiku sha kukanga. Abena Egypt kabamulosha pa nshiku cinelubali. ⁴ Ulo inshiku shakumulosha shashilile, Yosefe kalabila ku ba nanda yaku Farao, ati, "Kani nomba ndisangile uluse mu menso yenu, napapata njebeleni Farao, ukweba ati, ⁵ 'Bata balinjebele ukulapa, ati, "Bona, ndi pepi no kufwa. Ukanshike mu cilindi icinaimbile ne mwine mu calo ca Kenaani. Nkulya eko ukanshike." Nomba ndekeni nje shike bata, elo nakubwela.'" ⁶ Farao ka asuka ati, "Kabiye ushike ba wiso, fyenka ifi bakucitile ukulapa." ⁷ Yosefe kaya mukushika wishi. Bonse ababomfi bakwa Farao kabaya nakwe - abakulu ba mu nanda yakwe, abakulu ba mu calo ca Egypt, ⁸ pamo na bonse aba mu nanda yaku Yosefe na ba wakwe, na ba mu nanda yakwa wishi. Lelo abana babo, impaanga shabo, amatanga ya ngombe shabo kabafisha mu calo ca Gosheni. ⁹ Aba pa ngolo na bakabalwe nabo kabaya nakwe. Lyali likulu sana ibumba lya bantu. ¹⁰ Ulo bafikile pa cipulilo ca kwa Atadi petala lya Yorodani, kabalila mu bulanda ubukulu ne cikonko. Mpalya Yosefe kalosha wishi pa nshiku cinelubali. ¹¹ Ulo abekashi ba mu calo, abena Kenaani, babwene ukulosha pa cipulilo cakwa Atadi, Kabalabila ati, "Uku kulosha kwa bulanda ku bena Egypt." Ecalengele mpalya pantu ukwitwa ati Abele misraimu, mpa e petala lya Yorodani. ¹² Efi abana bakwe abalalume bacitile pali Yakobo fyenka ifi abakonkobeshe. ¹³ Abana bakwe abalalume kabamupinta ku calo ca Kenaani no kumushika mu lucengo mu mpanga ya Makipela, pepi na Mamre. Abraham alishitile ndu lucengo ukuba apa kushika. Apashitile kuli Efroni umwina Hiti. ¹⁴ Panuma yakushika ba wishi, Yosefe kabwelela ku Egypt, ye, pamo na bakwabo, na bonse aba mukonkele mu kushika ba wishi. ¹⁵ Ulo abakwabo Yosefe babwene ati wishibo alifwile, kabalabila ati, "Ni fisa kani Yosefe abwesha ubukali pali fwe no kufwaya ukulandula pa fibipile fyonse twamucitile?" ¹⁶ Efi balaishe abakwita Yosefe, kabalabila ati, "Wiso alikonkobeshe ninshi tangafwa, ati, ¹⁷ 'Mukebe Yosefe mfi, "Abakwanu ukabeleleko pa filubo nefi baku bembukile ulo bacitile ububi kuli we.''' Nomba twapapata elela abasha bakwa Lesa wakwa wiso," Yosefe kalila ulo balokulabila kuli ye. ¹⁸ Ba wakwe nabo kabaya no kwinamika ifinso panshi kuli ye. kabalabila ati, "Bona, tuli basha bobe," ¹⁹ Lelo Yosefe ka basuka ati, "Mutinapo, bushe nine Lesa? ²⁰ Mwebo, mwalokufwaya ukunsansa, lelo Lesa atantikile ku bune, ukusungilila imyeo ya bantu abengi, fyenka ifi mubwene lelo. ²¹ Kanshi nomba mutinapo. Nebo nalokumusunga na bana benu." Ye kaba sangalasha muli nji nshila no kulabila ifya kubatalalika ku imitima. ²² Yosefe aikele mu Egypt, pamo no lupwa lwakwa wishi. Aikele imyaka umwanda umo ne kumi. ²³ Yosefe kabonako abana bakwa Efraimu ukufika naku nkulo ya citatu. Ye nakambi kabonako abana bakwa Makiri umwana mwalalume wakwa Manase, mbo ababikilwe pa makufi yakwa Yosefe. ²⁴ Yosefe kalabila ku bakwabo ati, "Ndi pepi no kufwa; lelo Lesa akwisa kuli mwe no kumutungulula ukufuma muli nci calo ukuya ku calo ici alapile ukupa kuli Abraham, Isaki, na Yakobo." ²⁵ Elo Yosefe acitile ba mwana Israeli ukulapa umulapo. Kalabila ati, "Mu cine Lesa akwisa kuli mwe. Pali yeyo nshita mukapinte amafupa yandi ukufuma nkuno." ²⁶ Efi Yosefe afwile, ne myaka 110. Kabamukanga no kumubika mu mbokoshi ye bwe mu Egypt.