¹ Uyo onse uwasumina ukuti Yesu ni Klistu afyalwa ukufuma kuli Lesa, na onse uwatemwa wishi atemwa no mwana uwafyala ukufuma kuli ena. ² Pamulandu waici eco twaishibila ukuti twalitemwa abana bakwa Lesa, ilyo twatemwa Lesa twacita na mafunde yakwe. ³ Pantu uku ekutemwa Lesa: Pakuti tuli mukusunga amafunde yakwe. Na amafunde yakwe tayafina. ⁴ Pantu onse uwafyalwa ukufuma kuli Lesa alacimfya icalo. Naya emaka ayo twakwata ukucimfisha icalo, nangu cicetekelo cesu cine. ⁵ Nani acimfishe icalo? Ni uyo uwasumina ukuti Yesu mwana wakwa Lesa. ⁶ Uyu ewaishile ku menshi na kumulopa: Yesu Klistu. Taishilefye ku menshi yeka, nomba na kumenshi na kumulopa. ⁷ Pantu kwaba batatu abaiminineko bukambone: ⁸ umupashi, amenshi, na umulopa. Naba batatu bali mucipangano cimo. ⁹ Nga twapokelela bukambone bwa bantu, bukambone bwakwa Lesa bwalikula. Pantu ubunte bwakwa Lesa ni ubu, afyelwe bu kambone ubwapelwa mu Mwana wakwe. ¹⁰ Onse uwasumina mu mwana wakwe Lesa nakwata ubute muli ena. Onse ushisumina Lesa aicita umwine uwabufi, pantu tasumina muli bukambone bwakwa Lesa ubwapelwa mu mwana wakwe. ¹¹ Na bukambone ni ubu: Lesa atupela fwebo ubumi bwa kutwalilila, no bumi mu mwana wakwe. Uyo uli nomwana ali nobumi. ¹² Uyo ushili nomwana wakwa Lesa takwete ubumi. ¹³ Nebo ndelembela webo ifi fintu pakuti wishibe ukuti webo naukwata ubumi bwa kutwalilila kuli webo we wasumina mwishiwi lya mwana wakwa Lesa. ¹⁴ Kabili, ili esubilo ilyo twakwata muli ena, ilya kuti nga twaipusha icintu umwabela ukufwaya kwakwe, ena alatumfwa. ¹⁵ Kabili, ngatwaishiba ukuti ena alatumfwa-conse ico twaipusha ena-Twishibe ukuti natukwata conse ico twaipwishe kuli ena. ¹⁶ Nga umo amona munyina alecita lubembu ulushitwala kumfwa, afwile ukupepa, na Lesa alemupela ubumi. Kwaliba ulubembu ulutwala kumfwa; nebo nshilelanda ukupepela pali co. ¹⁷ Ukulufyanya konse lubembu, nomba kwaliba ulubembu ulushitwala kumfwa. ¹⁸ Twalishiba ukuti onse uwafyalwa kuli Lesa tabembuka. Nomba uyo uwafyalwa kuli Lesa alamusunga alamubaka, nobubi tabwakabacite kantu. ¹⁹ Twalishiba ukuti twafuma kuli Lesa, twalishiba ukuti icalo calipelwa mu maka ya mulwani. ²⁰ Nomba twalishiba ukuti umwana wakwa Lesa alisa alitupela no kumfwikisha, pakuti twishibe ena uwa cine. Kabili, twaba muli ena uwacine, mu mwana wakwe Yesu Klistu. Uyu e Lesa wacine kabili uwa bumi bwaku twalilila. ²¹ Mwe bana, ibakeni mwebene ku tulubi.