¹ Abana baume ba bakasesema balandile kuli Elisha aiti, “Mona incende ilya twikalamo, naicepa kuli ifwe. ³ Natuleya ku mumana Yordani, pakuti cila umo aye temako icimuti icakukuulile iŋanda iyakuti tuleikalamo.” Elisha abeba ati, “Kabiyeni.” ² Umo pali bena asosa ati, “Bushe teti utemwe ukwisa pamo na babomfi bobe?” Elisha ati, “Nalakonka.” ⁴ Aima aya nabo. Baya fika ku mumana wa Yordani, batampa no kutema ifimuti. ⁵ Lilya umo aletema icimuti, isembe lyasokoka lyaponena na mu menshi. Elyo akuuta ati, “Iye mwe mfumu yandi, lisembe lyakwashima.” ⁶ Umuntu wakwa Lesa aipusha ati, “Liponene pesa?” Ilyo amulanga incende, Elisha akontola akamuti aposa pa ncende ine, ne sembe lyaibuka lyalaelela. ⁷ Amweba ati, “Limye.” Elyo umuntu atambika ukuboko kwakwe alibuula. ⁸ Nomba imfumu ya bena Aramu yalelwisha abena Israeli. Panuma yakulandishanya na bacilolo ba fita, yalanda ati, “Nalacita inkambi pali ilya ncende na pali ilya.” ⁹ Umuntu wakwa Lesa atuma amashiwi ku mfumu ya bena Israeli ati, “Ucenjele nganshi pakupita kuli ilya ncende pantu abena Aramu epo balekwikalila.” ¹⁰ Kanshi imfumu ya bena Israeli epakutumako abakulengula ilya ncende yalandile umuntu wakwa Lesa. Elyo cila nshita Elisha alasoka imfumu pakuti ibe iyaipekanya muli shilya ncende. ¹¹ Imfumu ya ku Aramu yafulwa nganshi ifyalacitika. Yaita na bacilolo no kubepusha aiti, “Bushe tamwanjebe uyo umo pakati kesu uwawila ku mfumu ya bena Israeli? ¹² Umo pali bacilolo ayasuka ati, “Tapali nangu umo pali ifwe kanabesa we mfumu, lelo ni Elisha kasesema uwa bena Israeli eweba imfumu ya bena Israeli amashiwi yalya iwe ulandila mu muputule obe wakukati.” ¹³ Imfumu yakonkomesha bacilolo aiti, “Kabiyeni mufwailishe uko ali pakuti ntumeko abakuya mwikata.” Baya bwesha amashiwi ukuti, “Ali ku Dotani.” ¹⁴ Elyo atuma bakabalwe na maceleta ne mpuka ya bashilika iyamaka. Baya ubushiku no kuya shinguluka umusumba onse. ¹⁵ Ilyo uwaletumika umuntu wakwa Lesa ashibuka ulucelo lwakonkelepo, afumina panse, elyo asanga abashilika na bakabalwe na maceleta nabashinguluka umusumba. Elyo aipusha ati, “Iye mwe shikulu, bushe twalacita shani?” ¹⁶ Kasesema ayasuka ati, “Witiina, pantu abali na ifwe nabacila pabo bali nabo.” ¹⁷ Elyo Elisha apepa ati, “We Yawe, isula amenso ya uyu muntu pakuti amone.” Elyo Yawe aisula amenso ya mubomfi, nao alolesha amona impili ishaisulamo bakabalwe na maceleta aya mulilo nayashinguluka Elisha. ¹⁸ Cilya abalwani balapalamina uko ali, Elisha apepa kuli Yawe ati, “Shi wingesala amenso ya aba bantu baleke ukumona.” Nao Yawe aisala amenso yabo baleka ukumona ngefyo Elisha alombele. ¹⁹ Elisha abeba ati, “Inshila ino teyo, no musumba uno teo. Twendeni munkonke, nalamutwala ku muntu mulefwaya.” Elyo abaleta ku Samaria. ²⁰ Panuma yakwingila mu musumba, Elisha alanda ati, “We Yawe, shi wingesula amenso ya aba bantu pakuti bambe ukumona.” Elyo Yawe abesula amenso bayamba ukumona. Elyo baishiba nokuti bali mu Samaria. ²¹ Ilyo imfumu ya bena Israeli yabamona, yaipusha Elisha aiti, “Bushe mbepaye mwe tata? Bushe mbepaye?” ²² Elisha ayasuka ati, “Wibepaya, bushe kuti waipaya abantu abo wikete kale ku lupanga lobe na ku mufwi? Bapeeleko icakulya ubapeko na menshi pakuti balye no kunwa pakuti babwelelemo kuli shikulwibo.” ²³ Elyo abapekanishisha ifyakulya ifingi, na panuma yakupwisha ukulya no kunwa abeba no kuya, nabo babwelela kuli shikulwibo. Ne mpuka sha bashilika ba mu Aramu shaleka ukwisa mukulwisha abena Israeli mu calo cabo. ²⁴ Elyo papitile inshita, Beni Hadadi imfumu ya bena Aramu yalonganika ifita fyonse no kwima fyaya shinguluka umusumba wa Samaria. ²⁵ Mwapona insala iyikalamba mu musumba, pantu ukushingulukwa kwaposele inshita iyitali icakutila umutwe wakwa kabalwe walashitwa indalama amashekeli amakumi cine konse konse aya silifa, no lukombo lumo ulwa matotoli ya nkunda indalama amashekeli yasano aya silifa. ²⁶ Lilya imfumu ya bena Israeli ilepita lwapa cibumba ce linga lya musumba, umwanakashi umo amulilila ati, “Ngafweniko, kanabesa mwe mfumu.” ²⁷ 27Imfumu yayasuka ati, “Nga Yawe akaana ukukwafwa, kuti ine nafumya kwi ifyakukwafwako? Bushe ni ku fili pa lubansa lwakutwilapo? Nangu ifili apakukamina umwangashi?” ²⁸ Elyo amwipusha ati, “Bwafya nshi ukwete?” Umwanakashi ayasuka imfumu ati, “Uyu, umwanakashi munandi apa, anjebele ati, ‘Leta umwana obe umwaume eo tulye ilelo, elyo mailo tukalye umwana wandi.’ ²⁹ Kanshi efyo twaipike umwana wandi no kumulya. Ubushiku bwakonkelepo namweba nati, ‘Leta umwana obe pakuti tumulye,’ nomba ena nafisa umwana wakwe.” ³⁰ imfumu yaumfwa amashiwi ya mwanakashi, yalepula insalu shabufumu. Cilya aleenda mumbali ye linga, abantu bamona ukuti mukati afwele insalu shabulanda pa mubili wakwe. ³¹ Elyo asosa ati, “Lekeni Lesa akancite ine icili conse mu bukali bwaciko, nga cakuti umutwe wakwa Elisha umwana mwaume wakwa Shafati uleba pa mabeya yakwe muli buno bushiku.” ³² 32Nomba Elisha ninshi naikala mu ŋanda yakwe, na bakalamba ninshi nabekala nankwe. Imfumu yatangisha inkombe, nomba lintu inkombe tailafika, Elisha aeba abakalamba ati, “Bushe tamulemona uko ici cipondo catuma umuntu kukwisa mputulako umutwe? Moneni, nge nkombe yaisa, mwisaleko iciibi kabili mwikatishe pakuti cimwisalile. Bushe isho te nshindo shakwa shikulu wakwe shimukonkele panuma?” ³³ Lintu acili alelanda nabo, inkombe yafika apo ali. Elyo imfumu yasosa aiti, “Ici cinkunka ca cipowe cafuma kuli Yawe. Cinshi ico nakulalolela kuli Yawe nakabili?”