¹ Ilyo imfumu Hesekia yaumfwile ifi, yalepwile ifyakufwala fyaiko, yafwala insalu shabulanda elyo yaya ingila mu ŋanda yakwa Yawe. ² Kabili yabuula Eliakimu mushika wa kwisano, na Shebina kalemba mukalamba wa kwisano, na bakalamba ba bashimapepo, yabatuma na kuli kasesema Esaya mwana Amosi, ninshi bonse nabafwala insalu shabulanda. ³ Bamweba ati, “Ifi efyo Hesekia alanda ifyakuti, ‘Buno bushiku, bushiku bwakuculamo, bushiku bwakushobolwamo no bwakumfwamo insoni. Ifwe tulifye ngo mwanakashi uushikwete maka yakupapa ilyo inshita yakupapilapo imufikile. ⁴ Limbi kuti caba ukuti Yawe Lesa obe naumfwa amashiwi yonse aya uyu Rabushake uo shikulu wakwe imfumu ya ku Asiria itumine kukutuka Lesa uwamweo. Elyo na pakuti Yawe Lesa obe akalipe pa mashiwi aya omfwile. Eico pepelako abashele abacili abomi.’” ⁵ Ilyo bacilolo ba mfumu Hesekia bafika kuli Esaya, ⁶ nao Esaya ababweseshamo ati, “Kebeni shikulwinwe ukuti ifi efyo Yawe alanda ifyakuti, ‘Wikwata umwenso pafyo umfwile, palwa mashiwi yakuntuka ayo ababomfi ba mfumu ya bena Asiria bakwebele. ⁷ Umfwa, ine ndebika umupashi muli yena uulelenga ukuti yumfwepo fimo ifyamaŋwiŋwi, ifyalalenga nokuti ibwelelemo ku calo caiko, no kuleka eko nkaleka bakaye mwipaila ku lupanga.’” ⁸ Ilyo uyu Rabushake aumfwa ukuti imfumu yabo naifuma ku Lakishi, abwelelamo no kuya sanga imfumu ilelwa no musumba wa ku Libina. ⁹ Nomba Senakerubi apokelela amashiwi ayakuti Tiraka imfumu ya bena Kushi naifuma mukwisa mulwisha. Kanshi epakutuma nakabili inkombe kuli Hesekia na mashiwi yakuti, ¹⁰ “Mwebe Hesekia imfumu ya bena Yuda ukuti, ‘Wileka umulungu washintililamo ukubepe nga watila Yerusalemu tayapeelwe mu minwe ya mfumu ya bena Asiria.’ ¹¹ Mu cacine walyumfwa ifyo imfumu sha ku Asiria shacita ku fyalo fyonse, ukonaulafye fyonse. Elyo bushe iwe niwe walapusuka? ¹² Nge milungu ya mishobo iyo iyaonawilwe ku fikolwe fyandi bushe yalibapokolweleko? Imilungu ya Gosani, Harani, Resefu na bantu ba ku Edeni abali mu Teli Asari. ¹³ “Ili kwi imfumu ya ku Hamati, imfumu ya ku Apadi, imfumu ya ku musumba wa Sefafaimu nangu uwa ku Hena nangu Ifa?” ¹⁴ Hesekia apokele kalata ukufuma ku nkombe nokubelenga. Elyo aya ku ŋanda yakwa Yawe, abuula na kalata, yafungulula, yabika na pa cinso cakwa Yawe. ¹⁵ Elyo Hesekia apepa kuli Yawe ati, “We Yawe, Lesa wakwa Israeli, we waikala pakati ka bakerubi. Iwe weka niwe Lesa pa bufumu bonse ubwa pano calo. Niwe wabumbile umulu ne calo. ¹⁶ Teya ukutwi, we Yawe, kabili umfwa. Isula amenso yobe, we Yawe, no kumona. Umfwa ku mashiwi Senakeribu atumine ayakutuka Lesa uwamweo. ¹⁸ “Cacine we Yawe ukuti imfumu sha bena Asiria shalyonaula imishobo yonse iyi ne fyalo fyaiko. ¹⁷ Shaliposa imilungu yabo mu mulilo no kuonaula. Nangu cali ukuti tafyali milungu, lelo fyalifye ifya fimiti na mabwe fintu fyapangwa ne minwe ya bantu. ¹⁹ Nomba we Yawe, Lesa wesu, twapapata, tupokololeko ukufuma mu minwe yakwe, pakuti ne shamfumu shonse pano calo shishibe ukuti iwefye weka we Yawe, niwe Lesa ²⁰ Elyo Esaya mwana Amosi atuma amashiwi kuli Hesekia ati, “Ifi efyo Yawe Lesa wakwa Israeli asosa ukuti, ‘Niŋumfwa ipepo lyobe pa mulandu wakwa Senakeribu imfumu ya bena Asiria.’ ²¹ Ili e shiwi Yawe alandile pali ena ilyakuti, “‘Nacisungu mwana Sioni akususha no kukutumfya. Umwana mwanakashi wa Yerusalemu apukunya umutwe panuma yobe. ²² Ninani uyo watukile no kupontela? Nani uo waotokele no kutulumwina amenso? Cine ni ku Wamushilo wakwa Israeli. ²³ Ukupitila mu nkombe shobe emo utukile Imfumu insele shingi. Kabili usosele auti, “Ku maceleta yandi ayashaifulila eko ninine pa mulu wa mpili na pa mulu wa mpili sha Lebanoni. Nintema imiti iyalepesha iya keda ne miti iyawamisha iya paini. Nafika na ku mpela ya ncende ishitali na ku mitengo iyawamisha. ²⁴ Ninyimba ifishima mu fyalo fya kutali, no kunwa amenshi kulya kwine. Ninkamya imimana yonse iya mu Egupto, ku fitende fya makasa yandi.” ²⁵ “‘Bushe tawaumfwa ukuti nacipekenye ukufuma kale? Mu nshiku shakale emo napekenye ifi, na ine wine ndecifikilisha na pali nomba, pakuti ulelenga imisumba ya malinga ukuba ifitantala fya mabwe. ²⁶ Abantu babo amaka nayapwamo, nabafupuka no kulengwa insoni. Basanguka nge filimwa fya mu mabala, ngo mulemfwe uuteku, kwati cani icilemena pa mutenge, fintu ifyuma ku kasuba lintu tafilakula. ²⁷ “‘Lelo nalishiba uko wikala, naishiba ukwisa kobe, no kufuma kobe, ala iwe ulaitutumuna pali ine. ²⁸ Apo iwe waliitutumuna pali ine, no musaalula obe naufika ku matwi yandi, nalabika ubulobo mu myona yobe, elyo no mukobelo wandi mu kanwa kobe. Kabili nalalenga ubwelelemo inshila waishilemo.’ ²⁹ “Ici ecikaba icishibilo cobe, we Hesekia. Uno mwaka uli nokulya ifyaimenenafye, kabili umwaka wakonkapo ifikatwalako. Lelo mu mwaka walenga itatu ukabyale no kusombola, ukabyale imyangashi no kulya ifisabo fyaiko. ³⁰ Kabili abakashalapo mu ŋanda yakwa Yuda, bakengishe imishila panshi nokwisa twala ifisabo pamulu. ³¹ Pantu mu Yerusalemu emukafuma abantu abakashalamo abomi, na pa lupili lwa Sioni pakafuma abakapusuka. Ukupimpa kwakwa Yawe umwine wa fita ekukacita ici. ³² “Eico ifi efyo Yawe alanda palwa mfumu ya ku Asiria. “‘Tayakengilemo muli uno musumba nangu ukulasamo umufwi muno. Tayakapalame naikata inkwela ku musumba, nangu ukutulamikako imiina ya maloba pakuushinga. ³³ Inshila yaishilemo eyo ikabwelelamo. Muli uno musumba mwena tayaingilemo nakalya.’ Efyalanda Yawe. ³⁴ ‘Ndecingilila uno musumba no kuupususha, pa mulandu wandi na pa mulandu wa cilayo ico ine nalaile umubomfi wandi Davidi.’” ³⁵ Awe, malaika wakwa Yawe aya na mu nkambi ya fita fya bena Asiria, aipayamo ifita amakana umwanda umo na makana amakumi cine konse konse na yasano (185,000). Kutifye ulucelo cilya bwaca, awe abantu bamonafye ifitumbi fya bantu filelefye ntangali ntangali. ³⁶ Kanshi Senakeribu imfumu ya bena Asiria epakufuma mu nkambi nokubwelelamo. Abwelela ku Ninife eko aya ikala. ³⁷ Ubushiku bumo ninshi alepepa mwitempele lya mulungu wakwe Nisroki, abana bakwe abaume, Adarameleki na Sharesa, bamukoma ku lupanga, elyo babutukila ku calo ca ku Aralati. Elyo Esahadoni umwana wakwe umwaume amupyana pa bufumu.