¹ Amasiya akwete imyaka yakufyalwa amakumi yabili na isano ilyo atendeke ukuteeka pa bufumu kabili aikele pa bufumu imyaka amakumi yabili na pabula mu musumba wa Yerusalemu. Nyina ishina lyakwe ali ni Yehoadini umwina Yerusalemu. ² Acitile ifyawama pa cinso cakwa Yawe, nomba taficitile no mutima wakwe onse. ³ Cilya amona ukuti aikala bwino pa bufumu, abuula bacilolo bonse abaipeye wishi, nao abepaya. ⁴ Lelo abana babo bena tababepeye, pa mulandu wakufikilisha ifyalembwa mu mafunde yakwa Mose, umo Yawe akonkomeshe ukuti, “Bashibo tabali nokufwila pa milandu iyacita abana babo. Na bana nabo bene tabali nakufwila pa milandu iyacitwa na bashibo. Lelo cila muntu ali nokufwila pa fyabubifi fyakwe.” ⁵ Amasiya akonkanyapo ukucita icintu na cimbi. Aita abena Yuda pamo, abuula cila ŋanda aipeela mu bakalamba ba pa fita amakana elyo na bakalamba ba pa fita imyanda. Efyo acita ku bena Yuda na bena Benjamini. Elyo alonganika no kupenda bonse abali ne myaka amakumi yabili nangu ukucilapo, asanga ukuti bali 300,000 abengalwa inkondo, abo abengabomfya inkwela ne fumo. ⁶ Elyo afwailapo abashilika bambi abena Israeli abashipa mukulwa 100,000 pa ndalama sha silifa amatalanta umwanda umo. ⁷ Lelo umuntu wakwa Lesa aisa kuli ena no kwisa mweba ati, “Iye we mfumu, wileka aba bashilika abena Israeli muye nabo ku nkondo pantu Yawe tali nabo, tali na onse umwina Efulemu. ⁸ Nangufye nga cakuti muleya lwisha na maka, lelo Lesa aleya muposa mu minwe ya balwani benu, pantu ni Lesa ewakwata amaka yakwafwa nangu ukumulekako.” ⁹ Elyo Amasiya aipusha umuntu wakwa Lesa ati, “Nomba calaba shani ku ndalama nalipile ishakulenga ukuti abashilika ba bena Israeli batwafwe ukulwa ishali silifa amatalanta umwanda umo?” Umuntu wakwa Lesa ayasuka ati, “Yawe alikwata ifintu fimbi ifingi ifyo engakupeela ukucila pali iyi silifa.” ¹⁰ Kanshi Amasiya epakweba abashilika abena Efulemu ukubwelelamo kumyabo. Babwelelamo kumyabo abafulwa nganshi pafyo Yuda acita. ¹¹ Elyo Amasiya asha aipekanya alonganika na bashilika bakwe baya na kwi Shika Lyamucele no kuya ipaya abashilika ba ku Seiri amakana ikumi limo. ¹² Kabili abena Yuda baikatako na bashilika bambi ubusha abali amakana ikumi limo, babasenda elyo baya bakunkulushisha pa mukonko wa lupili epo bonse baonaikila. ¹³ Nomba abashilika balya Amasiya akenye ukulwako inkondo, balya abweseshemo kumwabo, baisa sansa imisumba ya mu Yuda ukufuma ku Samaria ukufika ku Beti Horoni. Baipayamo impendwa ya bantu abafikile amakana yatatu 3,000 elyo basendamo ne fitapwa ifingi nganshi. ¹⁴ Ilyo Amasiya abwelele ukufuma mukusansa abena Edomu, aishile nasenda imilungu ya bena Seiri elyo nao aisa ibika ukuba imilungu yakwe, ayamba ukulaipepa no kuyocela ububani. ¹⁵ Elyo Yawe afulilwe Amasiya apakalamba, amutumina na kasesema uwakwisa mweba amashiwi ayakuti, “Cinshi ico wayambila ukupepa imilungu ya aba bantu iyafililwe no kupususha abantu baiko ilyo walebalwisha.” ¹⁶ Ninshi talapwa ukulanda, imfumu yamwasuka aiti, “Nga nani akusontele ukuba mpandamano wa mfumu? Eico talala lintu nshilakwipaya.” Kanshi kasesema epakufumapo asha amusoka nokuti, “Ninjishiba ukuti Lesa napingula ukukonaula pa mulandu wa ifi ucitile, apo wakaana no kumfwa kufyo ndekweba.” ¹⁷ Panuma ilyo Amasiya imfumu ya bane Yuda yapwile ukulandishanya na baleipandako amano, atumina Yehoashi mwana Yehoahasi umwishikulu wakwa Yehu imfumu ya bena Israeli amashiwi yakumusonsomba ayakuti, “Wise twise tulwe!” ¹⁸ Lelo Yehoashi imfumu ya bena Israeli ayasuka Amasiya imfumu ya bena Yuda amashiwi yakuti, “Icimpusa ica myunga ica mu Lebanoni catumine amashiwi ku cimuti icalepesha ca keda wa mu Lebanoni aciti, ‘Peela umwana obe umwanakashi pakuti bopane no mwana wandi umwaume!’ Elyo icinama ca mu mpanga ica mu Lebanoni caisa nyantaula umunga. ¹⁹ Nawamba ukuisumbula pa mulandu wakuti naucimfya abena Edomu cakulenga no kukwata amataki no kuyumfwa. Nomba iwe ikalafye pa ŋanda. Nga cinshi ulefwaila ifyongo no kufwaya ukuti uyonaule elyo nokonaula abena Yuda?” ²⁰ Lelo Amasiya akaana ukuti omfwe, pa mulandu wakuti yali ni nshita iyo Lesa apekenye ukumonawilapo iyakumupeela mu minwe yakwa Yehoashi pa bubifi acitile ubwakupepa imilungu ya bena Edomu. ²¹ Kanshi Yehoashi imfumu ya bena Israeli epakulonganika abashilika bakwe aya kukulwa na bena Yuda. Amasiya imfumu ya bena Yuda balalwa na Yehoashi imfumu ya bena Israeli pa Beti Shemeshi mu calo ca bena Yuda. ²² Abena Yuda babapuma ku bena Israeli na cila muntu abutukila ku ŋanda kumwakwe. ²³ Elyo Yehoashi imfumu ya bena Israeli aikata Amasiya imfumu ya bena Yuda uwali mwana Yoashi, umwishikulu wakwa Ahasia pa Beti Shemeshi. Yehoashi amusenda amuleta ku Yerusalemu, elyo atobaula ne cibumba ca musumba ukufuma ku mpongolo ya Efulemu ukufika ku mpongolo ya pa cinshoko, incende iyalepele amakubiti imyanda ine. ²⁴ Asendamo golide yonse na silifa elyo ne fipe fyonse ifyasangilwe mu ŋanda yakwa Lesa ifyo Obedi Edomu alesunga. Asenda ne fyuma fyonse ifya mwisano na bantu baikete bunkole, abwelelamo na ku Samariya. ²⁵ Amasiya mwana Yehoashi mfumu ya bena Yuda ashele aikala imyaka ikumi limo na isano panuma ya mfwa yakwa Yehoashi mwana Yehoahasi imfumu ya bena Israeli. ²⁶ Elyo palwa fintu fimbi ifyo Amasiya acitile lintu acili pa bufumu ukufumafye ku kutendeka ukufika na ku nshiku shakulekelesha, fyonse fyalembwa mu citabo ca milandu ya shamfumu sha bena Yuda elyo ne sha bena Israeli. ²⁷ Kanshi ukufumafye apo Amasiya alekele ukulaenda mu nshila shakwa Yawe, mwaimine abantu mu Yerusalemu abalefwaya ukumwipaya, mpaka afyukila ku musumba wa ku Lakishi. Lelo batuma abantu abaile musanga no kumwipaya. ²⁸ Icitumbi cena balicibweseshe pali bakabalwe, baisa cishiika ku nshinshi ya fikolwe fyakwe mu musumba wa mu Yuda.