¹ Yoashi ali ne myaka cine lubali ilyo atendeke ukuteeka pa bufumu, kabili aikele pa bufumu mu Yerusalemu pa myaka amakumi yane . Nyina ishina ali ni Sibia umwina Beresheba. ² Pa myaka yonse iyo Yehoiyada ali shimapepo, Yoashi acitile ifintu ifisuma pa cinso cakwa Yawe. ³ Yehoiyada elyo amufwaila na banakashi babili abo aupile, nao afyalamo na bana abaume na banakashi. ⁴ Ilyo papita inshita Yoashi atontonkanya ukuwamya ŋanda yakwa Yawe. ⁵ Alonganika bashimapepo elyo na bena Levi elyo abeba ati, “Kabiyeni mu misumba yonse iya mu Yuda, muye longanika impiya shonse isho abena Israeli baba nokutuula cila mwaka, pakuti shikese bomba mukuwamisha iŋanda yakwa Lesa wenu. Kabiyeni nombaline.” Lelo abena Levi tababombele mukwangufyanya. ⁶ 6 Eico imfumu epakwita Yehoiyada shimapepo mukalamba no kumweba ati, “Cinshi ico ushaebela abena Levi ukuti bakaye mukusonkesha impiya ukufuma ku bena Yuda na bena Yerusalemu, umusonko ulya Mose umubomfi wakwa Yawe apingwile pamo no lukuta lwa bena Israeli isha mwi Tenti lya cipangano?” ⁷ Nomba pa myaka yapitile abana bakwa Ataliya, uwali imbifi ya mwanakashi, balingile mu ŋanda yakwa Lesa baya sendamo ifipe fyamushilo no kufibomfya ku milungu yabo ba Baali. ⁸ Eico imfumu epakupeela icipope icakuti bapange icakubikamo imisonko baya cibika lwa kunse ya mpongolo ya mu ŋanda yakwa Yawe. ⁹ Bapanga ne cipope icakuti abena Yuda na bena Yerusalemu bambe ukuleta kuli Yawe umusonko ulya Mose umubomfi wakwa Lesa aebele abena Israeli ukutuula lintu bali mu matololo. ¹⁰ Ici casekesha bacilolo elyo na bantu bonse icakuti bonse bayambilefye abene ukuleta impiya mpaka baisusha ico bapangile icakubikamo. ¹¹ Ilyo lyonse abena Levi baleta ico bapangile icakubikamo kuli bacilolo ba mfumu elyo bamona nokuti muli mpiya ishingi nganshi, lyena kalemba wa kwisano na cilolo wakwa shimapepo mukalamba ebalefukumunamo impiya shonse basunga elyo babwesesha icakubikamo apo caleikala. Balecita ifi inshitafye yonse mpaka balonganika impiya ishingi nganshi. ¹² Kabili imfumu elyo na Yehoiyada balabuula impiya ishi balafolesha abantu abalebomba imilimo ya ku ŋanda yakwa Yawe. Bafwaya bakasona wa mabwe elyo na bapala imbao ukuti bawamye iŋanda yakwa Yawe. Elyo baingisha ababomfi abakupanga ifipe fya fyela no mukuba ifyakuwamishako iŋanda yakwa Yawe. ¹³ Kanshi abantu baingishe epakubomba na maka no kulenga imilimo ukuba iyalondoloka. Bakuula cipya cipya iŋanda yakwa Lesa ukulinganafye ne yantanshi elyo balundako no kuikosha. ¹⁴ Ilyo bapwisha ukuwamya, babuula impiya shonse ishashelepo babwesesha ku mfumu na kuli Yehoiyada. Isho nomba bayambile ukubomfya mukupangilako ifipe ifyalekana lekana ifya mu ŋanda yakwa Yawe, ifipe ifyakubomfya ku malambo yakoca, imbale elyo ne fipe fya golide na silifa. Amalambo yakoca yaletuulwafye lyonse mu ŋanda yakwa Yawe mu nshiku shonse isho Yehoiada aikele uwamweo. ¹⁵ Nomba yalifikile inshita ilyo Yehoiyada akotele elyo afwa ninshi ali ne myaka 130. ¹⁶ Ashiikilwe mu ncende bashika imfumu mu musumba wakwa Davidi pa mulandu wa fisuma abombele mu Israeli, kuli Lesa elyo na mu ŋanda yakwa Lesa. ¹⁷ Panuma ya mfwa yakwa Yehoiyada, bacilolo ba mu Yuda baishile mukupeela umucinshi ku mfumu, nayo yaumfwila amashiwi bayebele. ¹⁸ Balenga nokuti balekeleshe iŋanda yakwa Yawe Lesa wa fikolwe fyabo bayalukila mukupepa inceshi sha mulungu Ashera elyo ne milungu imbi. Na pa mulandu wa ici calenga Lesa ukufulilwa abena Yuda na bena Yerusalemu. ¹⁹ Nangula Lesa alilangile uluse no kubatumina bakasesema ukubalondolwela amashiwi yakuti babwelele kuli Lesa, lelo bakaanininafye. ²⁰ Elyo Umupashi wakwa Lesa waikila no kukupa Sakaria, mwana Yehoiyada shimapepo. Nao aiminina pa ntanshi ya bantu no kusosa ati, “Aya e mashiwi Lesa asosa ayakuti, ‘Cinshi mukaanine ukumfwila ifipope fyakwa Yawe icakuti mwaleka no kupaalwa? Nomba pa mulandu wakuti mwafuma kuli Yawe nao nafuma kuli imwe.’” ²¹ Lelo abantu bamwimina, na pa mashiwi ya bebele imfumu abantu batola amabwe bamulasa mpaka afwa mu lubansa lwa ŋanda yakwa Yawe. ²² Imfumu Yoashi yafililwe ukwibukisha uluse Yehoiyada wishi wakwa Sakaria amucitile lelo amwipaila umwana wakwe. Uyo lintu alefwa asosele amashiwi yakuti, “Nacibe pakuti Yawe namona ifyo wacita nao akakupeelelapo umulandu.” ²³ Lilya cafika pa kupilibuka kwa mwaka, abashilika ba ku Aramu baingilila icalo ca Yuda na Yerusalemu umo Yoashi ali mfumu, no kwipaya intungulushi shonse isha bantu. Basendamo ne fitapwa ifingi nganshi, bafituma na ku mfumu yabo iyali ku Damasiko. ²⁴ Nangu cali ukuti abashilika ba bena Aramu bali abanono lelo Yawe abapeele amaka yakwipaya abashilika ababacilile ubwingi. Pa mulandu wakuti abena Yuda balifumine kuli Yawe Lesa wa bashibo, Lesa abikile ubupingushi pali Yoashi. ²⁵ Ilyo abena Aramu bafuminemo, bashile Yoashi ninshi nabamucena nganshi. Nomba bacilolo bakwe nabo bamwimina pa mulandu wakuti alipeye Sakaria mwana Yehoiyada shimapepo, nabo epakumwipaya ninshi nalala mu musengele wakwe. Kanshi efyo afwile, baya mushiika na mu musumba wakwa Dabidi, lelo tabamushiikile mu nindi baleshiikamo imfumu. ²⁶ Abo abamwimine no kumwipaya bali ni Sabadi mwana Shimeati umwanakashi umwina Amoni elyo na Yehosabadi mwana Shimiriti umwanakashi umwina Moabu. ²⁷ Imilandu ya pa bana bakwe, na mashiwi ayengi ayabusesemo pali ena elyo ne fyalembwa palwa milimo ya kwimika no kuwamya iŋanda yakwa Lesa, fyonse fyalilembwa umwatantikwa imilandu ya shamfumu. Elyo Amasiya umwana wakwe amupyana pa bufumu.