¹ Ilyo Yehoshafati imfumu ya mu Yuda abwelelamo umutende kwisano lyakwe ku Yerusalemu, ² Yehu kamona mwana Hanani aya mukumukumanya elyo aeba imfumu ati, “Cinshi walayafwila imbifi elyo watemwa nabapata Yawe? Pa mulandu wa ifi ucitile, ubukali bwakwa Yawe buli pali iwe. ³ Lelo ifintu ifisuma ficilipo muli iwe, pantu walifumya mu calo inceshi sha mulungu Ashera elyo no kubika umutima obe kukufwaya Lesa.” ⁴ Yehoshafati aikele mu Yerusalemu, kabili abwekeshapo ukuya ku bantu nakabili ukufuma ku Beresheba ukufika ku calo ca mpili icakwa Efulemu no kubwesesha bonse kuli Yawe, Lesa wa bashibo. ⁵ Asonta abapingushi mu calo, muli cila musumba uwe linga uwaba mu Yuda. ⁶ Elyo abeba nokuti, “Muleteka umutima pafyo mulecita, pantu tamwakulapingwila umuntu lelo mwakulapingwila Yawe, uyo uwakulaba na imwe lyonse ilyo mwapingula. ⁷ Eico nomba lekeni akatiina kakwa Yawe kabe pali imwe. Muleteka umutima pakupingula, pantu kuli Yawe Lesa wesu takwaba lufyengo nangu akapatulula, nangu amafisakanwa.” ⁸ Mu musumba wa Yerusalemu namo, Yehoshafati asontelemo abena Levi bamo bashimapepo elyo ne ntungulushi sha ndupwa sha bena Israeli ukulatungulula amafunde yakwa Yawe no kulapingula imilandu. Nabo baleikala mu Yerusalemu. ⁹ Abakonkomesha nokuti, “Mufwile ukubomba ne cishinka elyo ne mitima yenu yonse no kukwata akatiina kuli Yawe. ¹⁰ Mu mulandu onse uwaisa kuli imwe ukufuma ku bekalacalo banenu abekala mu misumba, ibe milandu yakusumya umulopa, nangu ifyo Yawe akonkomeshe, amalango, ifipope nangu amafunde, mufwile ukubasoka ukuti tabafwile ukubifya kuli Yawe pantu ubukali bwakwe kuti bwaisa pali imwe na pali bamunyinenwe. Nga mwalacita ifi tamwakakwate umulandu. ¹¹ “Amaria shimapepo mukalamba ewakulamutungulula pa milandu yonse iya pali Yawe elyo Sebadiya mwana Ishimaeli umulashi wa luko lwakwa Yuda nao ewakulamutungulula pa milandu yonse iya pa bufumu. Elyo abena Levi ebali nokuba bacilolo pali imwe. Mulebomba abakosa, kabili Yawe abe na bonse abakulabomba bwino.”