¹ Nomba Yehoshafati alikwete icuma icingi nganshi elyo no bucindami, kabili aliilundinkenye na kuli Ahabu mu cupo. ² Panuma ya myaka inono alimine aya aletandalila Ahabu ku Samaria. Ahabu aipaila Yehoshafati na bantu ali nabo impaanga ne ŋombe ishingi, elyo amulomba ukuti akaye sansa Ramoti Gileadi. ³ Ahabu imfumu ya bena Israeli yaipusha Yehoshafati imfumu ya bena Yuda aiti, “Bushe kuti wanshindika mukulwisha Ramoti Gileadi?” ⁴ Yehoshafati ayasuka ati, “Ine, cimo na iwe, elyo na bantu bandi cimofye na bantu bobe, eico tuli nokukwafwa ukulwa.” Lelo Yehoshafati aeba imfumu ya bena Israeli ati, “Nomba icantanshi utale wipushe Yawe.” ⁵ Kanshi imfumu ya bena Israeli epakwita bakasesema bonse abaume imyanda ine no kubepusha ati, “Bushe kuti twaya mukulwa ulubuli na Ramoti Gileadi nangu tuleke?” Bamwasuka ati, “Kabiye, pantu Lesa ali nokupeela aba bantu mu minwe ya mfumu.” ⁶ Nomba Yehoshafati aipusha ati, “Bushe pano tapali kasesema wakwa Yawe uwakuti twipusheko?” ⁷ Imfumu ya bena Israeli yayasuka Yehoshafati ati, “Kwena kuciliko umuntu na umbi uwakuti atwipushisheko kuli Yawe, nomba nalimupata pantu tatala asesema icisuma nangu cimo palwa ine, kanofye ifibi. Uyu muntu ni Mikaiya mwana Imula.” Yehoshafati ayasuka ati, “Imfumu taifwile kulanda ifyo.” ⁸ Kanshi imfumu ya bena Israeli epakwita cilolo waiko umo yamweba ati, “Kalete Mikaiya mwana Imula nombaline.” ⁹ Imfumu ya bena Israeli na Yehoshafati imfumu ya bena Yuda baikele pa fipuna fyabo ifyabufumu pa lubansa lwakutwilapo mupepi ne mpongolo yakwingililapo mu Samaria, ninshi nabafwala ifyakufwala fyabufumu kabili na bonse bakasesema balesesema pa cinso ca shamfumu. ¹⁰ Nomba Sedekiya mwana Kenana alipangile insengo sha fyela elyo asosa ati, “Ifi efyo Yawe alanda ukuti, ‘Kuli ishi nsengo eko uli nokupunkila abena Aramu mpaka ukabonaule.’” ¹¹ Bakasesema bambi bonse balesesema cimo cine abati, “Usanse Ramoti Gileadi kabili uli nokuucimfya, pantu Yawe ali nokucipeela mu minwe ya mfumu.” ¹² Inkombe iyaile kukwita Mikaiya yamweba ati, “Mona iwe ulifye weka, bambi bonse bakasesema balekomailafye pakuti imfumu ili nokucimfya. Na iwe ulekefye amashiwi yobe yabe nga yabo, kabili ulande ifisuma.” ¹³ Lelo Mikaiya pakwasuka asosa ati, “Mu cishinkafye cakwa Yawe uwamweo, ine ndi nokumweba ifyo Lesa alenjeba.” ¹⁴ Cilya afika ku mfumu, nayo yamwipusha ati, “Mikaiya, bushe kuti twaya mukulwisha Ramoti Gileadi nangu tulekefye?” Nao ayasuka ati, “Kasanse, uli nokucimfya, pantu bali nokupeelwa mu minwe yobe.” ¹⁵ Imfumu epakumweba ati, “Bushe miku inga nkakulenga ukulapa ukuti wilanjeba ifintu fimbi kanofye icine mwishina lyakwa Yawe?” ¹⁶ Elyo Mikaiya ayasuka ati, “Namona abena Israeli bonse nabasalangana bonse mu mpili nge mpaanga ishabula kacema, kabili Yawe asosa ati, ‘Aba bantu tabakwata shikulwibo. Lekeni cila umo abwelele ku ŋanda yakwe umutende.’” ¹⁷ Elyo imfumu ya bena Israeli yaeba Yehoshafati ati, “Bushe nshacikweba ati uyu muntu tasesema nangu fimo ifisuma palwa ine, kanofye ifibi?” ¹⁸ Mikaiya akonkanyapo ukusosa ati, “Eico umfwa ishiwi lyakwa Yawe. Ine nacimona Yawe naikala pa cipuna cakwe ne fita fya ku mulu nafiminina ku kulyo kwakwe na ku kuso kwakwe. ¹⁹ Kabili Yawe asosa ati, ‘Nani uwalatunka Ahabu imfumu ya bena Israeli ukuya lwisha Ramoti Gileadi nokuti aye mukufwa?’ Pakwasuka uyu alanda ici, umbi nao alanda ici. ²⁰ “Mukulekelesha wasuka waima umupashi waiminina pa cinso cakwa Yawe elyo wasosa auti, ‘Nalaya mutunka.’ “Yawe aipusha umupashi ati, ‘Walaya bomfya nshila nshi?’ ²¹ “Umupashi wayasuka auti, ‘Nalaya no kuya ba umupashi wabufi mu tunwa twa bakasesema bakwe bonse.’ “Yawe aeba umupashi ati, ‘Walaya munasha mukumutunka, kabiye uye ubombe.’ ²² Nomba kanshi Yawe nabika umupashi wakubepa ubufi mu tunwa twa bakasesema bobe aba. Yawe napingula icinkunka pali iwe.” ²³ Elyo Sedekiya mwana Kenana aima no kuya toba Mikaiya ulupi pa menso. Amwipusha ati, “Ni nshila nshi umupashi wakufuma kuli Yawe wilemo ilyo wacifuma kuli ine ukwisa landa kuli iwe?” ²⁴ Mikaiya ayasuka ati, “Ukeshiba pa bushiku ukafulumuka ukuya mukubelama mu muputule wamukati.” ²⁵ Elyo imfumu ya bena Israeli yakonkomesha ati, “Buuleni Mikaiya no kumubwesesha kuli Amoni kateka wa musumba elyo na kuli Yoashi umwana wa mfumu, ²⁶ kabili ubebe nokuti, ifi efyo imfumu yasosa aiti, ‘Bikeni uyu muntu mu cifungo elyo tecakwesha ukumupeela nangu cimo kanofye umukate na menshi mpaka ilyo nkabwela umutende.’” ²⁷ Mikaiya epakusosa ati, “Nga cakuti uli nokubwela umutende, ninshi Yawe talandile ukupitila muli ine.” Alundapo nokuti, “Mwe bantu bonse, mumfwe amashiwi aya nalanda!” ²⁸ Kanshi imfumu ya bena Israeli na Yehoshafati imfumu ya bena Yuda epakwima baya ku Ramoti Gileadi. ²⁹ Imfumu ya bena Israeli yaeba Yehoshafati ati, “Ine nalaifungushanya pakwingila mu nkondo, lelo iwe ufwale ifyakufwala fyabufumu.” Kanshi imfumu ya bena Israeli epakuifungushanya, yaya na mukulwa. ³⁰ Nomba imfumu ya ku Aramu yalipeele icipope ku bakalamba ba fita fya maceleta ati, “Mwilwisha umuntu umbi umunono nangu mukalamba kanofye imfumu ya bena Israeli.” ³¹ Ilyo abakalamba ba maceleta bamona Yehoshafati, basosa abati, “Ala uyu e mfumu ya bena Israeli.” Kanshi epakupilibuka ukuti bamusanse. Nomba Yehoshafati apunda, na Yawe amwafwa. Lesa abatalusha ukufuma kuli ena, ³² pantu ilyo abakalamba ba maceleta bamona ukuti teyo imfumu ya bena Israeli, baleka ukumutamfya. ³³ Lelo umuntu umo abuula ubuta aposa umufwi icilaselase, waya lasa imfumu ya bena Israeli pakati ka filundilo fya cakucinga icifuba cakwe. Elyo imfumu yaeba kensha we celeta ati, “Alusha iceleta no kumfumya mu bulwi pantu nabancena.” ³⁴ Inkondo yatwalililafye akasuba konse, elyo imfumu ya bena Israeli yaikalafye mwiceleta, yashintilila kwiceleta mukati yalosha amenso ukwali abena Aramu ukufika icungulo. Elyo cilya kawa yaleka no mweo.