¹ Yaweh aishile kulanda kuli Mose, atile, ² '' Aya ayakaba amafunde ya muntu uwa kulwala pa bushiku bwa ku muwamya. Bali no kumuleta kuli shi mapepo. ³ Shimapepo ali no kufumina kunse yankambi no kucencenta uyo muntu no ku bona nga cakuti inkanda ya bulwele ilipolele. ⁴ Eluntu shimapepo akakonkomesha ukuti uyo umuntu uwa kuwamya apite ifyoni fibili, ifilole, ne citi ca keda icitali, nenshishi ya nsalu iya kukashikila, elo no tumisambo twa hisopo. ⁵ Shimapepo ali no kukonkomesha umulwele ukwipayapo iconi cimo pa nongo ye bumba iili na menshi ayabune. ⁶ Shimapepo elo eluntu iconi icilole elo ne citi ca keda, elo ne nshishi ya kukashikila, elo ali no kutubika ifi fyonse ifintu, ukubikakofye ne coni icilole, mu mulopa cilya iconi baipeye pa menshi yabune. ⁷ Eluntu shimapepo ali no kusansa aya amenshi imiku cine lubali pali uyo umuntu uuli no kuwamishiwa ku bulwele bwapa nkanda, elo eluntu shimapepo ali no kulanda ukwebati aliweme. Eluntu shimapepo ali no kulekelako iconi icilole ukuya mu lwelele. ⁸ Umuntu uo bawamya ali no kucapa ififwalo fyakwe, ukubeya umushishi wakwe, elo no kuisamfya mu menshi, elo eluntu akesakuba uwabune. ⁹ Panuma yaifyo afwile ukwisa munkambi, lelo akalekwikala kunse ye tenti lyakwe panshiku cine lubali. Pabushiku bwa kulenga cine lubali afwile ukubeya umushishi ku mutwe wakwe, elo kabili afwile ukubeya imyemfu elo ne nkopyo. Afwile ukubeya umushishi wakwe onse, elo afwile ukuwasha ififwalo fyakwe fyonse elo no kusamba mu menshi; eluntu akaba bwino. ¹⁰ Pa bushiku bwalenga cine konsekonse alingile ukupita impaanga ishaume shibili ishabula akalema, elo na ephah uwa bunga bwapelwa ubune uwa sankanishiwamo na mafuta yakwipikila ukuba ica bupe elo na mafunele. ¹¹ Shimapepo uwa muwamya akesa ku mwimika, pamo nefyo ifintu, pali Yaweh pa mwinshi we tenti ilyakukumaninamo. ¹² Shimapepo akesa kusenda impaanga imo iilume elo no kuipela ngo mutulo uwakufula amasambi, pamo nno musukupala umo uwa mafuta; ali no ku fitula kuli Yaweh. ¹³ Afwile ukwipaya ipmaanga iyaume mu ncende umo bepaila imitulo yakufuta imembu no mutulo wa koca, pa ncende iya mushilo, pantu umutulo wa kufuta amasambi wakwa shimapepo pamopenefye no mutulo wafya kubifya, pantu fya mushilo nganshi. ¹⁴ Shimapepo ali no kubulapo umo uwa mutulo wa fyakubifya no kuushinga kukutwi kwa kukulyo ukwa uyu muntu uulewamishiwa, pa cikumo ca kukuboko kwakwe ukwa kukulyo, elo na kucikondo ca kulukasa lwa kukulyo. ¹⁵ Eluntu shimapepo akesa kusenda amafuta mumusukupala no kwitulwila mu lupi lwakwe ulwa kukuso, ¹⁶ no kutubika umunwe wakwe uwa kukulyo mu mafuta iyali mu kuboko kwakwe ukwa kukuso, elo no kukana amafuta yamo ne minwe yakwe imiku cine lubali pa cinso cakwa Yaweh. ¹⁷ Shimapepo ali no kubula amafuta ayashele pa cisansa cakwe no kuyashinga kukutwi kwa kukulyo ukwa uyo umuntu uulewamishiwa, yambi ali no kuyashinga ku cikumo ca uyo umuntu ica ku kuboko kwa kukulyo , elo na kucikondo icikulu ica ku lukasa lwakwe ulwa kukulyo. Ali no kutubika aya amafuta pa mulu wa mulopa wa mutulo uufuta ifyakubifya. ¹⁸ Lelo amafuta yonse ayashala mukuboko kwakwa shimapepo, akesa kuyabika pa mutwe wa muntu uuli no kuwamishiwa, elo na shimapepo ali nokubweshanya uyu muntu pa cinso cakwa Yaweh. ¹⁹ Eluntu shimapepo akesa kutula umutulo uwa kubelelwa amasambi elo no uyu umutulo wakwimininako uyu muntu uwakukowela pakuti akese kuba uwa bune, elo na panuma ali no kwipaya inama iye lambo lya koca. ²⁰ Eluntu shimapepo akesa kutula ilambo lya koca elo no mutulo wa bunga pa bulambo. Shimapepo akesa kubweshanya uyu muntu kuli Yaweh, elo eluntu akesakuba uwabune. ²¹ Nangu cibe ifyo, nga cakuti umuntu mulanda elo tekuti akwanishe aya ifi ifya malambo, eluntu engapita imbushi imo iilume ukuba umutulo uwakufuta ifyakulufyanya no kuipupusha, no kubweshanya umwine , elo no kubikapo icekumi cimo ica cipimo ca efa wa ng'anu shapeleka isha sankanishiwamo amafuta, ²² pamopene ne nkunda shibili nangula utwana twa mpele tubili, ifyo engakwanisha ukukwata; iconi cimo mutulo wa kufuta imembu elo icibiye ca mutulo wa koca. ²³ Pa bushiku bwalenga cine konsekonse uyu muntu alingile ukuleta ifintu fyonse ifya kumuwamishaapo kuli shimapepo pa mwinshi we tenti lya kukumaninamo, pa cinso cakwa Yaweh. ²⁴ Shimapepo akesakutwala impaanga mukutula ,elo ali no kubula umusukupala uwa mafuta aya miolifi, elo alingile ukufimisha mumulu pa kufitambika kuli Yaweh. ²⁵ Shimapepo ali no kwipaya akana ka mpaanga no ku katula umutulo uwa kufuta ifya kubifya, elo ali no kubulapo umulopa umo no kushinga kukutwi ukwa kukulyo ukwa uyo muntu uulewamishiwa, na kucikumo ica kukuboko kwakwe ukwa kukulyo, elo na kucikondo ica ku kulukasa lwa kukulyo. ²⁶ Eluntu shimapepo akesa kupongolwela yamo amafuta mulupi lwakwe ulwa kukuboko kwakwe ukwa kukuso, ²⁷ elo akesa kukana no munwe wakwe uwa kukulyo yamo amafuta ayali mu lupi lwakwe ulwa kukuso imiku cine lubali pa cinso cakwa Yaweh. ²⁸ Shimapepo eluntu ali no kubika amafuta yamo ayo ayali mulupi lwakwe ulwa kukulyo no kusuba mukutwi ukwa kukulyo ukwa uyo muntu uulewamishiwa, na kucikumo ica kukuboko kwakwe ukwa kukulyo, elo na kucikondo cakwe icikulu ica kulukasa ulwa kukulyo, mu ncende shimo shine umo acisuba umulopa wa mutulo uwakufuuta pafyakubifya. ²⁹ Shimapepo ali nokubika amfuta ayashala mu lupi lwakwe pa mutwe wa uyo muntu uulewamishiwa, epa kumubweshanya pamo pa cinso cakwa Yaweh. ³⁰ Shimapepo ali no kutulapo umwna wa mpele umo nangu akakunda, nga efyo uyu muntu akwatepo_ ³¹ kamo ngo mutulo wakufuuta pa masambi elo kambi nako nge lambo lyakosa, pamopene no mutulo wa ca bunga. Eluntu shimapepo ali no kubwesesha uyo muntu pa cinso cakwa Yaweh. ³² Ili efunde lya muntu uyo uwalwala ubulwele bwa pa nkanda, uushingakumanisha umutulo uwa kuti ba muwamishepo.'' ³³ Yaweh aishile kulanda kuli mose na kuli Aaroni, ukweba ati,'' ³⁴ Uluntu mwafika mu calo ca kanani ico nebo namipele ukuba icenu, elo nga nabika ukufukuma ukulunduluka mu ma yanda yenu ayo mwapelwa, ³⁵ eluntu umwine wa ng'anda alungile ukwisa elo no kweba shimapepo. Ali no kumweba ati,' nebo ndibwene ifileboneka ukuba ati kufuluma mu ng'anda mwandi.'' ³⁶ Eluntu shimapepo ali nokukonkomesha ukuti ba fumyemo ifipe mu ng'anda ulo talaingilamo nokushininkisha ukufumuka, epakuti bashimbule ifya kukowela nga bafileka umo mu ng'anda. Panuma ya ifyo shimapepo kuti aingila no kubona ing'anda. ³⁷ Alingile uku cencent, pakubona ukufuluma kuli kufibumba fya ng'anda, elo no kubona nga cakuti fileboneka iffya katapakatapa nangu ifya kashikila umo icibumba cingile. ³⁸ Nga cakuti ing'anda taiulumine, eluntu shimapepo ali no kufumina panse ya ng'anda elo no kwisala icibi camu ng'anda pa nshiku cine lubali. ³⁹ Eluntu shimapepo ali no kubwelela pa bushiku bwakulenga cine lubali elo no kucencenta nga cakuti ukufuluma kulisalangene ku fibumba fya ng'anda. ⁴⁰ Nga cakuti abona icibumba cilifulumine, eluntu shimapepo ali no kukonkomesha ukuti bafumye amabwe aya fulumine elo no kuyaposa kuncende iya kukowela kunse ya musumba. ⁴¹ Ali nokubona ukuti ifibumba fyonse ifya mu ng'anda fya kuswa, elo ne filoba fyonse ifyo bakushileko bafwile ukuya kufiposa ku ncende ya kunse pa musumba iyo baposako ifya kukowela. ⁴² Bafwile ukubula amabwe yandi elo no kuyapyanisha pa ncende iyo bacifumyapo amabwe, elo bafwile ukubomfya ibumba ilipya paku shingula ing'anda. ⁴³ Nga cakuti ukufuluma kwabwela nakabili elo kwatoba ne ng'anda iyaba fumishemo amabwe elo ne fibumba fyakuswa elo no kushingula, ⁴⁴ eluntu shimapepo ali nokwingila elo no kucencenta ing'anda pakubona nga cakuti ukufulumuka kulisangene mu ng'anda nga cakuti kulisalangene, eluntu ninshiukukufuluma kwa bono, elo ne ng'anda ninshi ilikowelele. ⁴⁵ Iyi ng'anda yakubongololafye. Amabwe, imbao, elo nebumba bashingwilile mu ng'anda fyonse bafwile ukufifumisha kunse ya musumba ku ncende iya kukowela. ⁴⁶ Ukubikakofye, no muntu onse uwaingilamo muli iyi ng'anda panshita yaiselwe naye ali no kuba uwakukowela ukushinta icungulo. ⁴⁷ Nomuntu onse uwa sendamamo mu ng'anda ali no kuwasha ifyakufwala fyakwe, elo naye onse uwalilile muli iyi ng'anda ali no kuwasha ifyakufwala fyakwe. ⁴⁸ Nga shimapepo aingila mu ng'anda mukuceceta mukubona nga cakuti ukufuluma kulisalangene mu ng'anda pa numa ya kuishinga, eluntu, nga cakuti asangana tamuli ifyakufuluma, ali nokulanda ati iyi ng'anda ilisangulukile. ⁴⁹ Eluntu shimapepo ali no kupitaa ifyuni fibili pakuwamya iyo ng'anda, elo imbao sha sida, elo akasalu akakashikila, elo na isopo. ⁵⁰ Shimapepo ali nokwipaila iconi cimo pa menshi aya bune aya munongo iye bumba. ⁵¹ Ali no kupita ulubao lwa sida, hisopo, nakasalu akakukashikila, elo ne coni ica kulola elo nokutubika fyonse mumulopa wa coni bepeye, mu menshi aya bune elo nokukana imiku cine lubali. ⁵² Shimapepo ali nokuwamya ing'anda no mulopa wa coni elo pamo na menshi ayabune, pamo ne coni ica kulola,uluba lwa sida, hisopo, elo nakasalu akakukashikila. ⁵³ Nomba shimapepo ali nokulekelako iconi icilole ukuya kunse yamusumba nokuya mu mabala. Na muli iyi nshila shimapepo emo ali nokubweshanishamo iyi ng'anda ku cinso cakwa Yaweh, elo neyi ng'anda ikesa kuwama. ⁵⁴ Aya emafunde ayakukonka palwa malwele ya kufuluma pa nkanda elo nefintu fyonse ifilenga aya amalwele, elo ne fiseseya, ⁵⁵ elo pakufuluma kwa fifwalo elo ne ng'anda, ⁵⁶ nangu ukulekufimba, ifya kufuluma pa mubili, elo no kusebuka pankanda, ⁵⁷ pakushininkisha ukuti ici icakukowela nangu ati cabune. Aya emafunde yapa malwele yankanda elo nokufuluma.