Ulwa gomba nkalamba; ukulekubika mu musango wa mutilabene. Amalumbo yakwa Dabidi. ¹ Nalekutotela kuli Yawe no mutima wandi onse; nalekulanda pa fyakupesha amano fyenu fyonse. ² Nalekusansamuka elo nokulekwanga muli webo; Nalekwimba ukulumbanya ishina lyenu, mweba kupulamo! ³ Ulo abalwani banci bakobwela kunuma, bakoipununa elo nokuloba ku cinso cobe. ⁴ Pantu ulicingilile mulandu wandi uwakulungama; ulikele pa cipuna cobe ca bufuma, kapingula wa bulungami! ⁵ Walyebawile inko; walyonawile ababifi; ulipashile amashina yabo muyayaya umuyayaya. ⁶ Abalwani balishimine nga mapopa ya pe ulo mwapololola imisumba yabo. Fyonse ifibukisho fyabo fililobele. ⁷ Lelo Yawe alikalilile umuyayaya; alipampamike icipuna ca bufumu bwakwe pa bulungami. ⁸ Akalekupingula calo no bulungami; elo akalekucita ubupingushi pa nko no mulinganya. ⁹ Yawe nakabili akalekuba umwakufisama abacincitilwa, umwakufisama mu nshita yakulekucula. ¹⁰ Abo abeshibile ishina lyobe bacetekela muli webo, pantu webo, Yawe, taulekelesha abo abakokufwaya. ¹¹ Imbeni amalumbo kuli Yawe, uyo ukoteka mu Sioni; mulekulanda ku nko ifyo acita. ¹² Pantu Lesa uulandula ukusunga umulopa akoibukisha; talaba ukulila kwa ba kocincintilwa. ¹³ Ulekuba no luse kuli nebo, Yawe; Mona ifyo kocincintilwa kuli abo abampata, webo wenkonsumbula ukulekufuma kumpongolo sha ku mfwa. ¹⁴ Yangu, ukulekuti ndekulondolola ukumbanya kobe konse. Mu mpongolo sha mwna mwanakashi wa Sione nalekumusekelela mwipusukilo lyenu! ¹⁵ Inko shilibile mu cilindi ico shaipangule; makasa yabo yaliketwe mwisumbu ilyo baifishile . ¹⁶ Yawe alilengele umwine ukulekwishibikwa; alicitile ubupingushi; ababifi baliketwe mu citeyo ca micitile yabo abene. ¹⁷ Ababifi balibwelele kunuma ele balituminwe ku mbio, inko shonse isho ishalabile Lesa. ¹⁸ Pantu abakoikabila tabakalekulabwa lyonse, nolo ukulekutetekela ku bakotitikishiwa tabakalekuloba umuyayaya. ¹⁹ Imeni, Yawe; mwilekuleka umuntu ukulekunyansha; lekeni, inko shikopingulwa ku cinso cenu. ²⁰ Batinyeni, Yawe; lkeni inko shilekwishiba ukwebati bantu fye.