¹ Oye mona owa, ya potesa a lisungi libayi ngi Yesu Klisito, ² pe ine yokokaki oye ngwa kati e ba temo bofela, aya imotsi a baito ba sembo bane be hokoka boteyi basiaka lokola. ³ Ena lumbe la ngo, aine mosengia-ilongo u wali u Yesu Klisito. ⁴ Itsi bayi mosengi-ilongo une uya tungesia a baoyi ba bumake, le kundji bo nangelesi ano ete mohelesa a yesili. ⁵ Pe atelete etsi ukola lifuti la etsi lani tuma a bolandji mebeko. ⁶ I sengeli ine mo oni u buha a kele yesili felo e bouni huma. ⁷ Lembela ine yeke ngo, pe ine Kolo e mwaya ombe bayele a bima ngia. ⁸ Kanesa Yesu Klisito, etui a liota li Dawidi, esekwi kati e bawei, kune eeki lioyi lila, ⁹ Po emoli line lumbe tee a bo nangemi a meliki aine mito o mbe-mbe. Kasi lioyi li Mongalima litsi nangemi. ¹⁰ La oyo linoli kwitu a tsina e ba minolami, tsina ine boo pe baukole bumake lokola bone bobayi ngi Yesu Klisito, la Nkembo e tango ngia ¹¹ Loo lioyi libayi ko lekela: la toka waenesia a lahe, too kuma ombe a lohe lokola. ¹² La tokeemaela, tookoyala ombe mekonzi lahe, la toka molambole yee, pe eeko tolambola ombe osu. ¹³ La totsi bayi sembo, eeko umoa sembo, po ine etsikoki boyalamboli ye mangine. ¹⁴ Kanesia bio bima, la bo bondeli felo e Mongalima ine batsile baoyi ba boekani bine besunga soko a bo mbengesi bane be okoka. ¹⁵ Ya potesia a bo emali felo e Mongalima aine mito emekami, mosali une utsaongowa ano ehane bya li liekela, ¹⁶ Mina bo beki ba oyi belumbi tsina pe ba bokosi, po ine bane beeka bo baoyi befilama ombe baose ngia a bolimbi bwinoli, pe lioyi li yaibo li'oko liama ombe la mokalo. ¹⁷ Awo motango ibayi Himene pe Pilete ¹⁸ Bane bete feta liekela be beka ine bosekwi bo te lwa a lahe, pe biiselesia boinoli bo bamoyi. ¹⁹ Ainde, moboko u kikili u Mongalima wee mali, a woo baoyi bane bebayi po elahe yebomo: Kolo elembeli bane ba hahe; pe, mito o mito ano eekotanga lina li Kolo, ake yesika ye lisumu li libitsi. ²⁰ Katsi e mbele ene enene, itsibayi soko bikukumele bi wolo pe palata, kasi iyali pe line i mote la mbu; imoyi iyali bikukumele bi longumo, pe bisiaka bibayi po e boseleli bobitake. ²¹ La oyo mito omoyi aka yita so litono, a bo fetsi byo bima, ekoyala ombe yekukumele ye longumo, ye bosantisi, ye tsina po e Kolo elahe, ine okokani a lotomo ko lotu lo wali ²² Tsila bi posa bibitake bi yelengela, pe pala bosembo, bwinoli, lokundo, bohai, a bane betaka Kolo a losambo la motema petoo; ²³ Keesia yesika bo poma-pomi bo moyai-yai pe sotsina, a bolembeli ine betusia bitole. ²⁴ Ainde, itsi sengeli ine mosaleli u Kolo abye a bitole, ekoki nga bwiki loonde a mito ngia, bo teyi, bonangi motema. ²⁵ Ekoki bo emalesi kwa ingina a bolembu banguna, katsi e yelikia ine Mongalima ee kwaya ombe wo bolengesi motema po e botwani a bolembeli liekela. ²⁶ pe ine la baka ulela bwinoli, ba twe a lilonga li djabulu, ene ete sila wo po e boyali sese e mokano uwae.