¹ Polo, apositolu u Yesu Klisto, kwa mobeko u Mongalima Mumesi wa iso kwa Yesu Klisto yelikia ye iso, ² Timote mona owa o motema katsi o bwinoli: mine ine ngolu, bowawa pe hai, bi mwesaneli ngi Mongalima Aha pe ngi Yesu Klisto NKolo e iso. ³ Le mohilesela bolendisi ine ete mokelange ngo a bokeyi bo wao a Masedonia, tango ene ete ahekelake ngo a otsikali a Efese, po bo ya bohesi mebeko ba siaka baito ba tsi tangese basiaka bahano, ⁴ pe boyanganesia basapo pe a melenga bilumbi suka bine bitsi sesia botole a esikani boyelesi yesili i Mongalima a bwinoli. ⁵ tsina e mebeko une, ngia lokundo lieni bokanesi bo motema bi wali la bayambi bisikisiki. ⁶ Ndombo e ba moyi betsiki bofetsi yo mbeko, be hungesane kati o bitole bi lumbi tsina. ⁷ Bekundji boyali banganga mayele a mebeko, pe betsi ongoli soko bine biyeka boo, soko bine bi hinola boo. ⁸ To tsi hungi ene mebeko botsi hitani, kasi boke lelo a ndenge elongobani, ⁹ la bolembeli wali ine mebeko motsi kelami po baito ba bosembo, kasi po baito ba kandja pe baito bane betsi kokani, la ba pakano pe bane betsi bayi la bwinoli, bane be holaki babotsi ba ibo, baolaki. ¹⁰ Baito ba bosembo, baito bane betsi yamboli, bwiba bwi baito, ¹¹ la bane ba esama a kwitu ine ikeseni a bahano malamu a lokumu lo Mongalima mwenangeli bahano malamu iyesameli ngo. ¹² Lehulesa matondji ngi ano ete potesi ngo, Yesu Klisto NKolo e iso la ano etesila ngo semba, ¹³ bwisi ngo katsi yetomo, ngo ano eteyekela felo botuki Mongalima, mito e bonyokoli, mito lokulu, kasi ngu kola bowawa, po ine indekelaka ngo a bo botsilembeli, ¹⁴ Katsi o boyambi, boyinoli Nkolo e iso ekafilakesami la bohinoli pe la lokundo ebayi katsi e Yesu Klisto. ¹⁵ Ebayi liohi li solo pe ekoki boyambemi, po ine Yesu Klisto etelwa a mwano po bo umesi baito ba mbeko, ane lebayi mito o felofelo. ¹⁶ Kasi nga hukola bowawa, tsina e Yesu Klisto aka henesia felo e ngo, po ine lebayi lokundo lo lahe ngolu kwitu botsi inola la ye po e bohumake bo seko. ¹⁷ La kumu u bikeke, ano etsiwa, etsi enenaka, Mongalima ko omoyi, lokumu pe kembo iyale la bikeke la bikeke. Ko hoyo! ¹⁸ Mobeko uka mo tomele ngo, Timote, mona owa, a bobilani a bisakweli bitekelamaka felo a likta li laho ibayi ine, la bio bisakweli olane tuma e wali, ¹⁹ a bobateli bwinoli pe bo mito bo waho. Pe la bo mito, bamoyi betehungesi, pe betehulesia yengebene a bwinoli. ²⁰ Aho motango bibayi Hymene la Alekisandele, bane lifilingi ngo a Satana, po ine bafete bosekaki Mongalima.