¹ Petelo, apostolu u Yesu Klisito, a bane bebayi ngi bafaya pe betsangani katsi e Ponti, Galatia, Kappadose pe a Bithini, ² Pe bane beponi boo engebene la bolembeli lo Aha Mongalima, la ndolé e bosantisami bo Molimo, po ine bayale baito ba botosi, pe bane behola la ngelo i Yesu Klisto: mina ine ngolu pe hai biyale bi ofela po e ino ³ A hambolame Mongalima, ise o Kolo eiso Yesu Klisito ano engebene la bowaowa bo ahe bofulaku ete aesa bo otami bosiaka pe e yelikia yeumaki landolé e lisekwi e Yesu Klisito kati e bawi, ⁴ Po e litsiki line litsi koka so bofoli, so libitsi, so bonzuluki, ene e itami po e ino a likolo, ⁵ Ngi bane, landolé e lokulu lo Mongalima, boitami la ndolé e boinoli pe e boumake yene yelenga la ane la bo bo enesi katsi e tango e suka. ⁶ Ibai aho eine ekela yenanga, himi ko sikane, po ine ikoki obayia bowaowa po e tango emoyi ekekeli la ndolé e bomekami ndenge la ndenge, ⁷ Po la ine bomekami bo boinoli boino, bo eteli litomba aine wolo ene enzulukaka (ene ete etaka la ndolé e yohé) a ukole mbano e longonia, kembo pe longumo, tango ee kolwa Yesu Klisito, ⁸ Ye ano ekundji onu ata bomweni, ngi e ino la onu ata bo te mwenaka, la bonangeli la yenanga yene yeeteli pe li kembo, ⁹ Po ine boko ukola mbana e milim eino la ndolé e boinoli bo ino. ¹⁰ Ba polofeta bane bete bekelaka po e boboto bo ino bone bo itameli onu, bete bekela lo mbano tsina e bo'panani boibo pe mwiho me ibo, ¹¹ La bokundji bo paani bolembeli ye ndei yeleko e la lolenge mbi line likelami la Molimo mo Klisto mo te yalaka la ibo pe ine bi te lembesaka felo menyoko me Klisito pe kembo ene ite oongama. ¹² Ite enesanakela boo ine itso koyala po e ibo matuke, kasi po e ino, ete yalaka bo enesi yo mbeko ite sumbela onu mboli, sikane bane be te sakolela onu mboli ndjali la ndolé e Molimo mbeko ndjali itomani a likolo, e katsi ene banzelu bekundji bofilingi baiso ba ibo. ¹³ Ibayi tsina emoli bo nange a lipata ya ino bakanesi be lui a ndolé e Molimo, botsi yale la mondandalia po bo ike yelikia kwetu katsi e ngolu ene e oko lwela onu tango e oko tsua Yesu Klisito. ¹⁴ Aine bane bake ba botosi, botsi yaesi la lokundo lo bima bi seese bine bite yalaka la ino felo tango ene ete yalaka onu la bounganesi. ¹⁵ Kasi po ine ano ete etaka onu ebayi Monsatu, onu pe bo yale ba santu a ene kinda e ino e bo yayelesi, endei kinda ete komama yo: ¹⁶ Bo ko yala bansatu, zambi ngo lebayi Monsatu. ¹⁷ Pe la onu bosambela aine Aha ano e sambesa engebene la mesala me mito ngia so bolitsi la mito la mito, bo ya yelesi a bo bangi yenina ye tango ene ebayi onu bafaya ene seese. ¹⁸ La bolembelaka ine itsi bayi la ndolé e bima bi fola, la ndolé e palata too wolo ite to tesuseaka onu motuke a lolenge lo bitsi lo boumi lone lo te tsikela onu baato, ¹⁹ Kasi la ndolé i ngelo i longumo lo Klisito aene mona e kondolo elumbi litono pe yeketa ²⁰ Ite tomana felo e bokulami bo mwano, pe yeenesami a suka e tango a tsina e ino, ²¹ Bane be inoli Mongalima ano ete mo sekwesa katsi e bawa pe ete mwaesa nkembo, la tsina te bo inoli bo ino pe yelikia ye ino bo hoome likolo li Mongalima. ²² Epetoli onu melimo me ino, la botosi bo liekela po e bobayi la lokundo lo banginena bo solo, bo kundane la lumbe bamoyi la basiaka la motema ko motu, ²³ Po ine bote otama a ituta, so la ndolé e melona me fola kasi la ndolé e milona metsi fola, la ndolé e liohi boumake pe e libela li Mongalima. ²⁴ Zambi monyo ko motu mobayi a ine biingi, pe nkembo elahe koetu aine fulele i biingi. Biingi bi omela pe fulele i kwa ²⁵ Kasi liohi li Kolo i tsikala seko la seko. Pe lyo liohi lite sumbana mboli la ndolé e mboli ndjali.