¹ Po e ene ilitsi nama ene e yaeseneli ngi bikeko i kumesa boo, to lembele ine to bai uso ngia la bolembeli. - Bolemebeli bo aesa mondandalia, kasi lokundo lo ondesa. ² La omoi ekanesa bolembeli ndambo e yema, ete lembelaka kune ikokani la bolembeli. ³ Kasi la omoi e kunzi Mongalima, aho elembelani laye. ⁴ Po ine kahe ibai po e bolei nama ine i aesameli ngi bikeko bi bokumesi, to lembeli ine itsi bai so yeleko ye ya bokumesi katsi e mwano, pe 'te ibai soko Mongalima umoi. ⁵ Po ine la iyali bikelamu bimoi bine bi etakemi Mongalima, i yale katsi e likolo, i yale katsi likolo li mbu, kune iyali liekela bofela bo mengalima, pe bofela bo ba kolo, ⁶ kasi po e iso ibai soko Mongalima umoi, Aha, ngu ano elwela bima ngia pe po e mbi ano eyaeli osu, pe Kolo ko emoi, Yezu Kilisito, kwa nda ano biyaeli bima ngia pe kwa nda ano eyali osu. ⁷ Kasi yoo bolembeli botsi yali ngi baito ngia. ndambo emoi, la kinda ene e enela boo, be lia yoo nama kune ine iyaesaneli ngi bikeko bine bikumesa boo, pe makanesi ba motema me aibo,mene melembi, me bai la mbindo. ⁸ Itsi bai po e yema ye bolei ine iya filesa osu ngi Mongalima: La to lia yoo, totsi bai la yema yemoi ye eteli, la totsi lia yoo, totsi bai la yema yemoi ye lumbi. ⁹ Ya kengela, kahe, ine bosomi bwa ino botsi yale yema ye bolaneli po e bane belembi. ¹⁰ Po ine la omoi aka ena oye, oye ano ebai la bolembeli, oyali a meza katsi e tempelo e bikeko bine bikumesa boo, makanesi mahe ma motema, ngi ano etsi bai la bolembeli metsi oko motoma po e bolei nama ine iya esaneli ngi bikeko bine be kumesa boo? ¹¹ Pe soko ano elumbi bolembeli e oko wa po e bolembeli bo aho, mongina po e ano ete wela Yezu Kilisito. ¹² La bokeli loo kinda e basumu ngi banginena, pe bo aesi boo pasi katsi e motema waibo une ulembi, bokela pe basumu ngi Kilisito. ¹³ I bai po embi, la yema ye bolei yemoi ye angoesa mongwaya, nzi oko lia so peeni nama, po ine i nzi angoesi mongwaya.