¹ Po e baoyi bete keelaka onu ngo yesali, le sumi ine ibai wali mito olome atsi tale mito owali. ² Emoli mbala, po e bofetsi sekene, mito la mito asile mohali, pe mohali ko motu ayale la molome u ahe. ³ Molome asile mohali ko ine kwito isengeli yee la yoo, pe mohali akele koyo la molome o ahe. ⁴ Mohali atsi yale la bokumi likolo li bilongo bi ahe, kasi ibai molome, pe sokoyo molome atsi yale la bokumi likolo li bilongo bi ahe mangine, kasi ibai mohali. ⁵ Botsi te fetesane bilongo omoi la omoi, la itsi ibai po bo okokani po ndambo e yemoi yeleko, tsina e bolongi Mongalima; pe bo uli onu koatu lisanga la bobangi ine satana atsi meke onu. ⁶ Le beka koyo po ine ikoki ikelama, nzi sumbi ta molembo ⁷ Le kunzi ine balome ngia bayale aine ngo, kasi mito la mito ebai la lifako liahe ngi Mongalima, omoi loo kinda, osiaka emoi ndenge. ⁸ La bane betsi iyiki balome pe bahali be weli balome, lebeka ine batsikale aine ngo. ⁹ Kasi la belumbi bo yakilesi, basilane, po ine ikoki bosilani isikani ine bohiake la kamo. ¹⁰ La bane besilani, ngaesa ndole, ta ngo, kasi Kolo, mohali atsi fakane la molome o ahe. ¹¹ ( La efakani, ayale so molome to pe ba ulelame yee la molome o ahe) pe ine molome atsi fete mohali o ahe. ¹² La basiaka, itsi bai Kolo, ngo mito aka beka: La monginena omoi ebai la mohali ano etsi sambela, pe esengeli ine a mosile, atsi mo fete. ¹³ Pe la mohali ebai la molome u mopagano, pe la kinda e bosilani lahe, atsi fete aho molome. ¹⁴ Po ine molome mopagano ebai tsanga la ndole e mohali o ahe pe mohali mopagano ebai tsanga la ndole e monginena, la ta koyo, bana baino bekoki boyali bana ba boseka, ainzi sikane bebai tsanga. ¹⁵ La mopagano aka fakana la mohali, bafetane, monginena too mosikinena betsi nangemi la yoo tsina. Mongalima ete to etaki osu la bo umi katsi e hai. ¹⁶ Po ine mbi ilembeli oye, mohali, kumesa molome o aho? too mbi ilembeli oye, molome kunda mohali o aho? ¹⁷ 17 Soko ine mito la mito ayele kune ete mo kela Kolo, kune ete ukola yee bo etakemi ngi Mongalima. Ine ibai molembo po e basangana kwatu. ¹⁸ Mito omoi ano etenami bolefo e etakami po e bo inoli, atsi kale mito etenami bolefo, ano ete etakami nga etsi teni bolefo, atsi tene bolefo. ¹⁹ Boteni bolefo itsi bai yema, bolumbi boteni bolefo itsi bai yema. Kasi bosusi metsindo me Mongalima ibai ngia. ²⁰ Mina mito la mito atsikale ndenge eyali yee yekeleko ye mo etaki Mongalima. ²¹ La o etakemi la yeleko yebai oye matuke, so yatungesa; kasi la okoki bokwei molombo, kela ine okwe molombo. ²² Po ine motuke mo etakemi katsi e Kolo , ko lo ndenge, mito e etakamei nga ebai molombo ebai motuke u Kilisito. ²³ Bokombolami la louno bo eteli, so kwa metuke me baito. ²⁴ Mina mito, bangwaya, aumoe felo e Mongalima la ndenge ene eyali yee yekeleko ye etakemi yee. ²⁵ Po e bane betsi lembeli balome, nzi yali la molembo u Kolo, ngaesa likanesi limoi, aine ano e ukoli ngolu pe bowaowa ngi Kolo po e boyali sembo. ²⁶ Ena ine iyeni ngo boyali wali, la tsina e bikeleko bi lisengia li oko lwa, ibai wali la mito boyali koyo. ²⁷ Oye osili mohali? so pala botsaki lo lokundo; otsi nangeli la mohali, so pala mohali. ²⁸ La oka sila mohali, otsi kele yekweli, pe la lifoku litsi lembeli balome aka sile molome, etsi keli mbeko mbe. Kasi boo baito be oko uma ombe menyoko la bilongo bia ibo, pe nga kundaka ine ke batele onu. ²⁹ Lita ine ibeke ngo, bangwaya, yekeleko yebai ye boawe, ine ko sikene bane bebai la bahali bayale aine betsi iki bahali. ³⁰ Bane belela aine bane betsi lela, bane benangela aine bane betsi nangela, bane bekola bima aine bane betsi kola yema. ³¹ Pe bane bekelesa mwano mesala aine bane betsi kelesa mwano mesala, po ine une mwano uko eta. ³² Ainzi nga lekunzi ine botsi yatungesi. Ano etsi sili mohali aya tungesi la baoyi ba Kolo, a bakoki la bonangelesi Kolo; ³³ pe ane esili mohali, aya tungesi la bakita ba mwano, la bima bi bonangelesi mohali u ahe. ³⁴ bokeseni bobai katsi e mohali pe ngondo: ano mohali etsi iki molome eya tungesa la baoyi ba Kolo, po ine ayale tsanga la bilongo pe yelimo; pe ano esili molome aya tungesi la bima bi mwano, la bokoki bonangelesi molome u ahe. ³⁵ Le beka po e litomba lia ino, itsi bai ine le nange onu moliki a ngingo. Ibai po e bo bekeli onu ine ibai wali la ine iyenesi bosaleli Kolo bikeke koitu, isikani i bo isi bakanesi la basiaka baoyi. ³⁶ La mito omoi aka ena ine itsi bai la tsina ine a enesi ndesi elahe lokumu yelanga ye lifoku po ine esengeli bo mokesi liengelo, akele kune ekunzi yee, etsi keli mbeko mbe, basilane. ³⁷ Kasi ano aka sila yekateli, la etsi keli mokano u ahe matuke, pe ekani katsi motema u ahe bobateli bo lifoku li ahe aho ekeli wali. ³⁸ La koyo, ano akakesia yeonga ye ahe a liengelo ekeli wali, pe ano etsi tomi yeonga ye ahe a liengelo ekeli pe wali. ³⁹ Mwali o liengelo ebai ano eyali la molome isikani imoi la molome ebai boumake. Kasi, la molome aka wa, ebai la bosomi bo bosilani la mito soko mito ano ekunzi yee, soko ine loo lokundo loyale katsi e Kolo. ⁴⁰ Le bai la yenanga bo eteli, ainzi, la akayala kune eyali yee, bolandani la likanesi lila, pe ngo, lekanesi boyali la Yelimo ye Mongalima.