¹ Ntyo, bene wirhu, mwe nsima, mba shagalukira mwe ishungwe lyani, ntyo muyimange okunali omu Nyamuzinda, bira bani. ² Mpunyire Euodia, mpunyire na Sintike, bagwarhe obulonza buguma muli Nyamuzinda. ³ N'omuntyo, nalonza nanawe, w'okuli, orhabale abo bakazi; bulya balwikize omwanzigwa kalembe haguma na nani, na Klemanti nay, na balya bandi akolaga omukolo haguma na nani, balya amazino gabo gali omu citabu c'obuzine. ⁴ Mushagaluke omu Namahanga ensiku zoshi; kandi ndesire, mushagaluke. ⁵ Obulembu bwinyu bumanyikane n'abantu boshi. Namahanga ali hofi. ⁶ Murha ci hangaise oku kantu koshi koshi; ci omu ngasi kantu oku kusalira n'oku huna, haguma n'okuvuga omunkwa, enyifinjo zinyu zimanyikane na Mungu. ⁷ N'omurhula gwa Nnamahanga, gugera amenge goshi, gwa rhuliriza emirhima yinyu n'obulangalire buguma omu Kristu Yesu. ⁸ Buzinda, bene wirhu, ebintu byoshi biri by'okuli, byoshi bili by'olukengwa, na byoshi bili bishinganine, byoshi bili bicire, na byaku simisa, byoshi b'irenge linja; nka hakaba obwinja boshi boshi, hakaba obukuze bwinja bwoshi bwoshi, mucirhanye okwo. ⁹ Ebintu mwayizire emwani n'okubiyankirira, n'okubiyunva n'oku biboa emwani, mubijire; na Mungu w'omurhula aba haguma na ninyu. ¹⁰ Nashagalusire bwenene omu Nyamuzinda, bulyalira buzinda mwahuwisha efikara enyanya zani, nkakulya mwakagi ntanyiza omwanya gwani cikwoki murhapataga ahantu. ¹¹ Arhali mpu ndesire ebi bulya ngwerhe enyifinjo; bulya naciyigirizize okukaba nsezire omu ngasi hali nankaba ndi mwo. ¹² Manyire lama omu kukena, na kandi manyire lama omu kugala; omu nkasi hali yoshi, n'omu bintu byoshi, nayigirizibwe oku yugurha n'okubona ishali, oku gwarha binji n'oku pungukirwa. ¹³ Mpasha ebintu byoshi kugerera ye oka mpeba emisi. ¹⁴ Cikwoki mwajijire bwinja, erhi munshiriki omu bizibu byani. ¹⁵ Naninyu, mwene mumanyire, mwe Bafilipi, oku omu murhangiro gw'e injili, erhi ntenga e Makedonia, nta kandi kanisa ka chihebire haguma na nani omu guno mwanzi kw'oku towa n'oku habwa, ci mwene. ¹⁶ Bulya ciru eyo munda e Tesalonike mwandwirhire oburhabale oku nyifinjo zani, arhanali liguma. ¹⁷ Arhali bulya nacifinjire eci cigabi, ci bulya ncifinjire amalehe gagendekire galuga, kugerera ehesabu yinyu. ¹⁸ Cikwoki ngwerhe ebintu byoshi na kulusha, na kandi mbi yunjuline; nahabirwe oku kuboko kwa Epafrodito ebintu bya rhengaga emwinyu, ibaya ly'amanukato, enterekero nyemere, esimisa Nnamahanga. ¹⁹ Na namahanga wani aba bumba ngasi eci mucifinjire kushimbana n'obugale bwage, omu bukuze, omu Kristu Yesu. ²⁰ Omuntyo akuzibwe Mungu, Larha wirhu, ensiku n'amango. Bibe ntyo. ²¹ Mundamukize ngasi mutakatifu omu Kristu Yesu. Bene wirhu bali haguma na nani balamusize. ²² Abatakatifu boshi baba lamusize, na kulusha balya bali b'omu nyumpa ya Kaisari. ²³ Olukunda lwa Larha Yesu Kristu lube haguma n'emirhima yinyu.