¹ Oku mwezi gwa Nisani, oku mwaka gwa makumi gabirhi gwa mwami Artashasta, nkoku ecinywebwa cali embere zage, barhola ecinywebwa nacihereza mwami. Ntalisagiba burhe nkoku naliyosire embere zage. ² Mwami ambwira: Bulyagurhi amalanga gawe gazinzibire? Orhanalwaziri; bunali nkaba burhe bwa murhima. Bayobohe bwenene, ³ nanashuza mwami: mwami alame ensiku zoshi! Gurhi ntakagwarha amalanga gazinzibire, amango ecihugo cirimwo ebyusho bya ba larha cishabusire na emihango yaco eyocibwe oku muliro? ⁴ Na mwami ambwira: bici ohunyire? nahuna Nnamahanga w'empingu, ⁵ nanashuza mwami:nkaba mwami abibwine bwinja, na nkaba omukozi wawe asimisize, ontume e Yudea, ebwa murhundu gw'ebyusho bya ba larha, lyo njigulungula. ⁶ Mwami, erhi omugoli amutamire ahaburhambi, ambwira: kasangi kaligurhi olubalamo lwawe lwayusa, na mangaci wagaluka? byasimisa mwami akundeka ngende, na namubwira akasanzi. ⁷ Kandi nabwira mwami: nkaba mwami abwine bwinja, mpabwe amaruba nahekera abarhegesi bali ishiriza ly'olwishi, lyo bandeka nagera n'okuha e Yudea, ⁸ na Marina maguma oku Asafu, mulanzi wa muzirhu gwa mwami, lyo ampa emirhi y'oburhungiri n'emihango y'olukuta hofi n'enyumpa, okulukuta lw'omurhundu, na oku nyuma nayishi handamwo. Mwami ampa ago maruba, bulya okuboko kwinja kwa Nnamahanga kwali kulinie. ⁹ Nagenda emw'abarhegesi b'ishiriza ly'olwishi, nabaha amaruba kurhenga emwa mwami, walimpire omukulu w'abasirika oku anduse n'okumpeka oku ndogomi. ¹⁰ Sambalati, muhonori, na Tobiya, mukozi mu Amoni, erhi bakuyunva bagaya bwenene oku hayishire omuntu olongize ab'israeli aminja. ¹¹ Nahika e Yerusalemu, nayusayo nsiku zisharhu. ¹² Buzinda, ,nazuka budufu na balume nka babga, buzira okubwira omuntu ebi Nnamahanga wani anampebire omu murhima okujirira Yerusalemu. Harhali rhweshi Ebindi bihesi, kulusha ecinalishinirekwo. ¹³ Nahuluka budufu kugerera to gw'olubanda, nanayerekera ebwa nshoko ya omusimba na ebwa muhango gw'enjalira, n'oku labiriza obusherere bw'olukuta lw'e Yerusalemu n'okugereza okumihango yage eyocirwe. ¹⁴ Najagera hofi n'omuhango gw'enshoko n'ecisima ca mwami, na harhali ahantu ecihesi calindwirhe cakagezire. ¹⁵ Nakayinamuka budufu okulwishi, n'okulabiriza olukuta; na okugaluka oku muhango gw'olubanda, n'okujirantyo omukugaluka. ¹⁶ Abatwi b'emanja barhalimanyiri aha njire, n'ebi nakagijira, kuhika agomango, ntalicibwira abayahudi kantu, erhi oku bagula, erhi oku barhambo bakulu, erhi oku batwi b'emanja, n'erhi okubo nakagijira mukolo ya ngasi lubero. ¹⁷ Nababwiraga lero:mubwine akasangi kabi rhulimwo! Yerusalemu eshabusire, n'emihango yage eyocirwe oku muliro! Muyishe rhulungule enkuta za Yerusalemu, na rhurhacibere omu kushekerwa. ¹⁸ Na nabaganulira gurhi okuboko kwa Nnamahanga kwandikwo, na gurhi mwami anambwiraga. Baderha: rhuyimuke, rhunayubake! Na baciha obushiru omw'ogwo muhigo mwinja. ¹⁹ Sambalati, muhonori, Tobia, mukozi mu Amoni, na Geshemu, muharabu, erhi bakumanya, barhushekera n'oku rhuganyagusa. Baderha: bici mulimwajira aho? Kamwacihindwire kuli mwami? ²⁰ Bank nabashuza ntya: Nnamahanga w'empingu arhuhashisa. Rhwe, bakozi bage, rhwayimuka, n'okuyubaka, cikwone mwe, murhagwerhi cigabi, erhi kuyemerwa, erhi nkengero omu Yerusalemu.