¹ Omwagomango, basoma omucitabu ca Musa embere z'olubaga, na babona muyandisirwe oku omu Amoni n'omu Moabu barhagwairwi okuja omu ntimanano ya Nnamahanga, ² bulya barhayishaga okuyankirira Israeli n'omugati n'amishi, na bulya bahamire Balamu oku cishingo oku abaheherere; cikwone Nnamahanga wirhu ahindula obuheherere migisho. v 3 Erhi bayunva erhyo irhegeko, babaerula Israeli na ngasi w'ihanga. ⁴ Embere zaho,omugula Eliashibu walihebirwe omu byumpa by'enyumpa ya Nnamahanga, bulya ali hofi na Tobia, ⁵ alimurheganyize cumpa cinene, omu bakagiheba burhanzi entulo, enshushagizi, ebirugu, ecihimbi ca kalikumi c'engano, ecinywebwa, amavurha, ebyalirhegesirwe oku balawi, abimbiza n'abalanzi b'emihango, na ebyakagi rhengezibwa abagula. ⁶ Ntali e Yerusalemu erhibyo byoshi biba, bulya nali namashubira emunda mwami Artashasta, mwami w'e Babeli, omwaka gwa makumi gasharhu. ⁷ Obuzinda bw'omwaka, nahabwa oluhusa na mwami okushubira e Yerusalemu, nanabona amabi Eliashibu anajijire, okuha Tobia ecumpa omu lulengalenga lw'enyumpa ya Nnamahanga. ⁸ Nabiyunviza kubi bwenene, na nakweba embuga ngasi byali bya Tobia; ⁹ Narhegeka bakorope encumpa, na nahebamwo ebirugu by'enyumpa ya Nnamahanga, entulo n'oubani. ¹⁰ Nayunva n'oku ecigabi c'abalawi cirhaci hanwa, n'oku abalawi n'abimbiza bakagijira omukolo bacishubirire ngasi muguma emwage. ¹¹ Nakalihira abatwi b'emanja naderha: Bulyagurhi enyumpa ya Nnamahanga yalekerirwe? nanarhimanyanya abalawi n'abimbiza, n'okubashubiza oku mikolo yabo. ¹² Lero Yuda yeshi alerha omu cibikiro ecihimbi ca kalikumi c'engano, ecinywebwa, n'amavurha. ¹³ Naheba n'obulazi bw'ecibikiro oku Shelemia, mugula, kuli Sadoki, mwandisi, na kuli Pedeya, muguma omu balawi, nanabashimanya Hanani, mwene Zakuri, mwene Matania, bulya baligwerhe obuhamirize oku bali b'ikubagirwa. Na bobahebirwe okukagabira benewabo. ¹⁴ Onkengere, mashi Nnamahanga wani, kulibyo, orhanayibagire ebijiro byani byobushinganya okunyumpa ya Nnamahanga wani, na oku bishinganine okukengwa! ¹⁵ Agomango, nabona abantu omu yudea bali bakanda omu mukenzi olusiku lwa Sabato, babarhwire omwiha, baheize ebihesi ciru ecinywebwa, engaja n'emizabibu, na ngasi byoshi, na okubiheka e Yerusalemu olusiku lwa Sabato; nabakalihira olusiku bakagi guza ebyabo. ¹⁶ Hali ciru n'abantu b'e Tiro, balihashire e Yerusalemu, bakagilerha ensamaki na ngasi burhimbuzi, n'okubiguliza bene Yuda olusiku lwa Sabato omu Yerusalemu. ¹⁷ Nakalihira abimangizi ba Yuda n'okubabwira: kwokuderha kucikuno, okuhushira olusiku lwa Sabato? ¹⁸ karhalintya kwo ba sho bajiraga? karhali byobyarhumire Nnamahanga wirhu alerha buhanya bunene kulirhwe omwogu murhundu? Ninyu muciri mwahamagalira israeli obuhanya buhyahya, okuhushira e saboato. ¹⁹ Narhegeka oku bayigale emihango ya Yerusalemu embere ly'esabato. Na nakagiheba bakozi bani baguma oku mihango, okugalula okudaha kw'emihako olusiku lw'e sabato. ²⁰ Lero abarhunzi n'abasasi ba ngasi lubero bakalala embuga lya Yerusalemu liguma erhi kabirhi. ²¹ Nabarhonda, omukubabwira: bulyagurhi mukalala embere z'olukuta? erhi mukaci shubirira, nayishi mugwarha. Kurhenga agomango barhaciyishaga olusiku lw'e sabato. ²² Narhegeka abalawi oku bacicese, n'okuyishi langa emihango okucesa olusiku lwa Sabato. Onkengere kulibyo, mashi Nnamahanga wani, onange kushimbana olukogo lwawe lunene. ²³ Mwonagomango, nabona abayahudi balirhozire abakazi b'e asdoni, Amoni n'e Moabu. ²⁴ Bagumaomu bana babo bakagiderha eci Asdoni c'arhali ciyahudi; balimanyire endorho z'ezo mbaga zone. ²⁵ Nabakalihira n'oku baheherera; nashurha baguma mulibo, nabakulula enviri, nabajirisa omwigasho okw'izino lya Nnamahanga, omukuderha: murhakaherusa bali binyu oku bagala babo, murhana rholeraga bagala binyu bali babo erhi mwane. ²⁶ Karhali kulibyo kwo Sulemani, mwami w'israeli agomaga, harhali mwami omushushire omu mashanja, alisimirwe na Nnamahanga wage, na Nnamahanga ali muyimisire mwami omu israeli, cikwone abakazi b'emahanga bamugomesa omu byaha. ²⁷ Kabihunyire rhumanise ogwinyuoku mujijire mahushe manji n'okugomera Nnamahanga wirhu omukurhola abakazi b'ihanga? ²⁸ Mwene Yoyada muguma, mwene Eliashibu, mugula mukulu, ali mulwi wa Sambalati, w'e Honori. Namuhinva hofi Janie. ²⁹ Okengere ogwabo, mashi Nnamahanga wani, okuhemukira ecikono c'obudahwa, n'eciragane bajiraga n'abagula n'abalawi. ³⁰ Nabacesa nangasi w'ihanga nanahaba obunanire okubyaligwasirwe okukengwa n'abagula, abalawi n'abimbiza omu mukolo yabo. ³¹ n'okubiguliza entulo y'emirhi okumango marheganye, nkoku bihumbulwa bya burhanzi, Onkengere bwinjinja, mashi Nnamahanga wani!