¹ Myanzi ya Nehemia, mwene Hakalia, oku mwezi gwa Kisleu, oku mwaka gwa makumi gabirhi, nkoku nali e Size, omu murhundu mukulu. ² Hanani, muguma omu balumuna bani, bantu banga barhenga e Yuda. nabadokreza oku biyerekire abayahudi balisigire amango g'okuhamisibwa, na oku biyerekire Yerusalemu. ³ banshuza: abasigire oku kugwarhwa, bali omu cihugo cirimwo malibuko manene na buhanya bunene; enkuta za Yerusalemu zishabusire, n'emihango yage yayocibwa n'omuliro. ⁴ Erhi nyunvantyo, natamala, nalaka, najira nansiku nene omu mishibo. Nacishalisa nanasalira embere za Nnamahanga w'empingu. ⁵ nanaderha: mashi Nnamubaho, Nnamahanga w'empingu, Nnamahanga mukulu na waku yobohwa, wekalanga eciragane cawe n'okujirira abakusima olukogo, n'abakenga amarhegeko gawe! ⁶ Mashi irhwiri lyawe liyunvirhize n'amasu gawe gayiguke: oyunve amahuno omukozi wawe akujirire buno, budufu na mushi oku bakozi bawe bana b'israeli, omukuciyunjuza ebyaha by'abana b'israeli, ebyaha birhu kuliwe, bulya nie n'enyumpa ya larha, rhwagomire. ⁷ Rhwakugomire, na rhurhakengaga amarhegeko, obworhere, n'olugenzi wahaga Musa, mukozi wawe. ⁸ Okengere ogu mwanzi wahaga warhegekaga Musa, mukozi wawe, oku aguderhe. Erhi mukagoma, nayishi mushandaza omu mashanja; ⁹ cikwoki, erhi mwakangalukira, na erhi mwakenga amarhegeko gani n'okugaheba omu bijiro, lero ciru mwakaba muyakire ebuzinda bw'amalunga, nayishi mushoboza n'oku mugalula ahantu nalondolaga okuhebaho izino lyani. ¹⁰ Bali bakozi bwawe na lubaga lwawe, wagombolaga oku burhwali bwawe na oku kuboko kw'emisi. ¹¹ Mashi! Nnahamwirhu, irhwiri lyawe liyunvirhize amahuno g'omukozi wawe, n'amahano g'abakozi bawe balonzize okuyoboha izino lyawe! Ohe omukozi wawe obuhimi ene, na okujirira olukogo embere z'aba bantu! Naligi mukozi wa mwami.