¹ Akanwa ka Nnamubaho kabwirwa Mika, wa e Moresheti, okumango ga Yotamu, ga Ahazi, ga Ezekiya, bami b'eyuda, bulebi kuli Samariya na Yerusalemu. ² Muyunve, mweshi, mbaga! igulu yunvirhiza n'ebikulimwo byoshi! Nnahamwirhu, Nnamubaho ahamirize kulimwe, Nnahamwirhu oli omu bwami bw'obucesibwa bwage. Bulya lolaga, Nnamubaho ahulusire emwage, ayandagire, alyagera oku halengerire omw'igulu. ⁴ Idaku lyage entondo ziri zayayuka, embanda ziri zayiguka nka bulembo embere z'omuliro, nka mishi gahulula oku mwandagalo. ⁵ Ebyobyoshi enyanya z'amabi ga Yakobo, enyanya z'ebyaha b'enyumpa ya Israeli! Ngahi buli obubi bwa Yakobo? karhali Samariya? Ngahi hali empero za Yuda? karhali Yerusalemu? ⁶ Nayishikula Samariya nka ntumbi ya mabuye omw'ishwa, hantu hakurhwera muzabibu; nayishi bulungiza agomabuye omu mbanda, nanyishi bwikula eciriba. ⁷ Ngasi enshushano zage nshongole zavunwa, na oluhembo lwagwe luzinzire lwayocibwa oku muliro, na nayishi shereza enshushano zage zoshi: ajiraga n'oluhembo lw'obugonyi. Byayishiba Luhembo lwa bubaraga. ⁸ Byobirhumire nayishi yama, nayishi ciduduma, nayishigenda buzira birata na bushunzi, nayishi yakuza nka nyambwe na oku cilumbwija nka kanyunyi. ⁹ Bulya ecibande cage ciri cakuluma ; cishandire kuhika eyuda, cihumbire kuhika okumuhango gw'olubaga lwani, kuhika e Yerusalemu. ¹⁰ Murhabimanyise e Gati, murhayamire omu Ako. Ncivuruvuzize omulutulo e Beti Leafra. ¹¹ Gara, cikala w'e Shafiri, omu bushunzi n'enshonyi! Cikala w'e Tanani ahahulusiri, emishibo y'e Beti Haetseli ebayimire obwwakiro. ¹² Cikala w'e Maroti alyajugumira obucunguke bwage; bulya obuhanya bwayandagire kurhenga emwa Nnamubaho kuhika omu muhango gwa Yerusalemu. ¹³ Ohebe omulwi w'entambala oku ndogomi yawe, cikala w'e Lakishi! Waberire cirhumire cirhanzi can byaha oku mu,nyere w'e Sioni, bula muliwe mwomuli obugoma bw'israeli. ¹⁴ Byobirhumire wayishirhimana e Moresheti Gati, enyumpa z'Akzibe zayishiba cirhumire ca burhebanyi oku bami b'israeli. ¹⁵ Nayishi kulerhera amurhegesi muhyahya, cikala w'e Maresha; Irenge lya Israeli lyacijira e Adulami. ¹⁶ Ocimome, otw'eciviri cawe, enyana ly'abana bawe bazigirwa! ocihebekw'oluhala nka nyunda, bulya bakola bahekwa mpira kuli nanawe.