¹ Banji bacihanganyire okuyandika olulibi lwa birya byajirikanaga omu karhi kirhu, ² nkoku rhwamanyusibagwa na balya babibonaga bone kurhenga oku murhondero bobanali bahirwe omukolo gw'okuderha omwanzi gwa Nnamahanga, ³ byani byansimisize, enyuma lyokujira obushagasi kukwanine kuli bintu byoshi kurhenga omurhondero gwabyo, nkumanyusize okukuyandikira omu njira y'obushiru mukengwa Theophilo, ⁴ ly'omanya okuli kw'enyigirizo wayunvirhe. ⁵ Oku mango ga Herodi, mwami w'ebuyahudi, hali mujinji muguma izino lyage Zakariya, w'omu murhwe gw'abiya; mukage yewali Elisabeti, w'omu banyere b'Aroni. ⁶ Oku banali bombi bali bashinganyanya emalanga ga Nnamahanga, banali bakuyunva okunali oku amarhegeko goshi gadesire n'oku ebinwa bya Nnahamwirhu byoshi bidesire. ⁷ Barhali gwerhe mwana, bulya Elisabeti yali ngumba; bombi balikola barhalusize emyaka. ⁸ Ntyo, amango aligwerhe akol'emikolo emalanga ga Nnamahanga, oku kasanzi kage, ahamagalwa n'izu, ⁹ Kushimbana n'oborhere bw'abanji, bw'okuja omu nyumpa ya Nnahamwirhu n'okutwana mwo enshangi. ¹⁰ Engabo y'abantu boshi bali embuga okugashanyiza, amango oluku lw'atwanwa. ¹¹ Lero malaika wa Nnahamwirhu abonekera Zakariya, ayimanga ekulyo kw'irherekerera aha bahanira entulo y'enshangi. ¹² Zakariya akanguka agwarhwa n'echoba. ¹³ Cikwone malaika amubwira: orha yobohe, Zakariya; bulya amahuno gawe gayunvikine. Mukawe Elisabeti akuburhira omwana murhabana, wamuha izino lya Yohana. ¹⁴ Ayishiba busime na bushagalike bwawe, na banji bayishi cishinga oku burhwa gwage. ¹⁵ Bulya ayishiba mukulu emalanga ga Nnahamwirhu. arhakanywa idivai, erhi cindi cinywebwa cokulalusa, ana yunjuzibwa muka mwimana kurhenga omunda ya nina; ¹⁶ Ashubiza ben'Israeli banji emwa Nnahamwabo, Nnamahanga wabo; ¹⁷ Ayishi gera emalanga ga Nnamahanga n'omurhima n'obuhashe bwa Eliya, enyanya lyoku galula emirhima ya b'ishe emw'abana, n'abagoma omu bumanye bw'abashinganyanya, arheganyize Nnahamwirhu olubaga lushinganine. ¹⁸ Zakariya abwira malaika: gurhigi namanya mw'ebyo? bulya nkola mushosi, na mukanie akola arhalusize emyaka. ¹⁹ Malaika amushuza: nie Gabrieli, nyimanga emalanga ga Nnamahanga; narhumirwe oku kubwira, n'okuku manyusa emyanzi minja. ²⁰ Na ntyo, waba kaduma, orhaciderhe kuhika olusiku ebyo byaba, bulya orha yemiri emyanzi yani, eya hikirira oku mango gayo. ²¹ Muli ago mango, olubaga lwakalinda Zakariya, bulya abezire kasanzi kanji omu nyumpa ya Nnamahanga. ²² Erhi ahuluka, arhachihashaga oku badesa, na banamanya oku anabonekirwe omu nyumpa ya Nnamahanga; naye akab'akemakema, anayorha kaduma. ²³ Erhi ensiku z'omukolo gwage zihwa, ashubira emwage. ²⁴ Enyuma lya kasanzi kasungunu, Elizabeti, mukage, ayalala izimi. achi fulika miez'irhanu akaderha: ²⁵ Luli lukogo Nnahamwirhu anjirire, erhi andikira kw'amasu oku ntenza kw'enshonyi omu bantu. ²⁶ Omu mwezi gwa ndarhu, malaika Gabrieli arhumwa na Nnamahanga omu cishagala c'Egalilaya, cihamagalwa Nazareti, ²⁷ Emwab'omubikira wali shebirwe na mulume muguma izino lyage ye Yosefu, womu mulala gwa Daudi. Izino lyoyo mubikira yewali Mariya. ²⁸ Malaika aj'emwage, anamubwira: nkulamusize, we oyunjwire lukogo; Nnahamwirhu ali haguma nawe. ²⁹ Eco cinwa carhuma azunguluk'irhwe, Maria acidosa gwo musingo muci ogwo. ³⁰ Malaika amubwira: orha yobohe, Maria; bulya wabwine olukogo emalanga ga Nnamahanga. ³¹ Na ntya, waba izimi; waburha omwana murhabana, wanayishi muha izino lya Yezu. ³² Ayishiba mukulu anayishi derhwa mugala w'owe nyanya bwenene; na Nnahamwirhu Nnamahanga ayishi muha entebe ya Daudi, ishe wage. ³³ Ayishi rhambula omu nyumpa ya Yakobo emyaka n'emyaka, n'oburhambuzi bwage burhakagwarha buzinda. ³⁴ Maria abwira malaika: kurhigi oko kwankaba, ntanamanyiri mulume? ³⁵ Malaika amushuza: muka mwimana akuyishira, n'obuhashe bw'owe nyanya bwenene bwakubwikira ecihiho cage. co carhuma omwana ocire waburhwa emwawe ayishi hamagalwa mugala wa Nnamahanga. ³⁶ Ntya, Elisabeti, mwene winyu, al'izimi, naye, ly'omwana rhabana omu bugikulu bwage, olya wakagi derhwa ngumba guli mwezi gwa kalindarhu gwage. ³⁷ Bulya ntacho chirhaka hashikana emwa Nnamahanga. ³⁸ Mariya aderha: ndi mwambalikazi wa Nnahamwirhu; bimbere nkoku wana derhaga! na malaika amurhenga ho. ³⁹ Muli ago mango go na nnene, Mariya ayimuka, agenda aharhula aja omu birhondo, omu cishagala ciguma c'ebuyahudi. ⁴⁰ Aja omu mwa Zakariya, analamusa Elisabeti. ⁴¹ Erhi Elisabeti ayunva omusingo gwa Mariya, omwana wage atuza omu nda, ana yunjuzibwa na muka mwimana. ⁴² Ayakuza n'izu linene: ogishirwe omu bakazi, n'amalehe g'enda yawe gali magishe. ⁴³ Ndigi muci obu nina wa Nnahamwirhu anyishire? ⁴⁴ Bulya ntya, amango nayunvagya omusingo gwawe omwana amatuza omunda n'obusime. ⁴⁵ Ali mun'iragi oyemire, oku ebi bamubwiraga bya hikirira bilya byaderhagwa na Nnahamwirhu. ⁴⁶ Lero Mariya aderha: erhi omurhima gwani gukuzize Nnahamwirhu, ⁴⁷ N'omuka gwani gucishinzire muli Nnamahanga, Mmuciza wani, ⁴⁸ Bulya alolerize obwirhohya bwa mwambalikazi wage. Bulya ntya, kurhenga ene olubaga lwoshi lwanderha munyiragi, ⁴⁹ Bulya ogala byoshi anjirire ebinja. Izino lyage liri limana, ⁵⁰ N'olukogo lwage luba lwa myaka n'emyaka emwa balya bamukenga. ⁵¹ Alambwire emisi y'okuboko kwage; ashandaza mo balya baligwerhe entanya zoku cibona omu murhima. ⁵² Akuzire abo buhashe oku ntebe zabo, n'abirhohya abayinamula. ⁵³ Ayigusa abali shalisire n'ebirugu binja, n'abagale abalibisa mikungula. ⁵⁴ Arhabala Israeli, mukozi wage, anakengere enyanya z'olukogo lwage; ⁵⁵ Nkakulya abwiraga ba larha, kuli Abrahamu n'omulala gwage ensiku zoshi. ⁵⁶ Mariya abera boshi na Elizabeti hofi myez'isharhu. Enyuma lyaho ashubira emwage. ⁵⁷ Amango ga Elisabeti goku burha gahika, anaburha omugala. ⁵⁸ Abalungu na bene wabo bayunva oku Nnahamwirhu amufire bwonjo, bashagaluka haguma naye. ⁵⁹ Olw'ensiku munani, bayisha bali karha omwana, bana muhamagala Zakariya lyo izino l'ishe. ⁶⁰ Cikwone nnina aderha erhi: nanga, ayishi hamagalwa ye Yohana. ⁶¹ Bamubwira: omu mulala gwinyu ntaye muntu ohamagalwa mo er'izino. ⁶² Banacikema ishe mpu bamanye gurhi alonzize bamu hamagale. ⁶³ Zakariya ahuna orhupaho, anayandika kwo: Yohana l'izino lyage boshi basomerwa. ⁶⁴ Hona halya, akanwa kage kayiguka, n'olulimi lwage lwa shweguka, ntya aderha, akuza Nnamahanga. ⁶⁵ Abalungu boshi bagwarhwa n'obwoba, ntya, n'omu ntondo y'e buyahudi, baka shambala yo ebyo byoshi. ⁶⁶ Ngasi bayunvagya boshi bagubika emurhima, n'oku derha: oyu mwana ayishi ba mwana muchi? n'okuboko kwa Nnahamwirhu kwali haguma naye. ⁶⁷ Zakariya, ishe, ayunjula muka mwimana, analeba mw'eyi myanzi: ⁶⁸ Akuzibwe Nnahamwirhu Nnamahanga w'abisraeli bulya ayishire rhangula n'oku cungula olubaga lwage, ⁶⁹ Ntya arhujirire omuciza w'obuhashe omu nyumpa ya mwambali wage Daudi, mukozi wage. ⁷⁰ Kulya aderhaga omu kanwa k'abalebi bimana kurhenga mira, ⁷¹ Muciza warhucungula omu ndyalya nomu maboko g'abarhushomba! ⁷² Ntyo kwayerekine olukogo lwage kuli ba larha, anakengera kulya kulaganana kwage kwimana, ⁷³ Nkagulya mwigasho achi gashiraga Abrahamu, larha wirhu, ⁷⁴ Oku arhurhegekaga lyo rhuyishiba bashwekule omu kuboko kw'abashombanyi birhu, n'okumukolera buzira bwoba, ⁷⁵ N'okuba n'olugenzi embere zage omu bushinganyanya, n'omu kuli ensiku zoshi z'obulamu bwirhu. ⁷⁶ Nawe, mwana murho, wayishi derhwa mulebi wow'enyanya; bulya wayishi lambagira emalanga ga Nnahamwirhu, oku rheganya enjira zage, ⁷⁷ Lyo aha olubaga lwage okumanya obuchunguke kugerera oku babalirwa ebyaha byabo, ⁷⁸ Omu lukogo n'obuzigire bunene bwa Nnamahanga wirhu, bwarhulerhera izuba kurhenga enyanya, ⁷⁹ Omu kumolekera abali omu mwizimya n'omu cihoho colufu, n'okurhu yerekeza omu njira y'omurhula. ⁸⁰ Nobwo, omwana akula, azibuhe n'omurhima. N'okubera omu mpinga, kuhika omu lusiku achiyerekana n'obwalagale emalanga g'olubaga lw'Abisraeli.