¹ Hali omuntu w'omumishozi ya Efrahimu wahamagalagwa Mika. ² Abwira nina: zirya shekeli cihumbi n'igana bakurholaga, zirya wairiraga eciragane nandi nayunva, lolaga, Enzo nfaranga omumaboko gani ziri, nie nazirhozire. Na nina amubwira: mugalawani agishwe na Nnamubaho! ³ Agalulira nina ezo shekeli cihumbi n'igana; na nina aderha: mpanyire ezinfaranga kurhenga omumaboko gani emwa Nnamubaho, lyonjiriramwo mugala wani enshushano ntule na nyayuse; natyo kwonayishi kuhayo. ⁴ ashubiza nina enfaranga, nina arhola shekeli magana gabirhi, na aha abatuzi enfaranga bajiramwo enshushano ntule na nyayuse. Bayiheba omunyumpa ya Mika. ⁵ Oyo Mika aligwerhe enyumpa ya mungu, ajira ecishuli n'enshushano, anahaeba mwana wage muguma oku budahwa. ⁶ Omwagomango barhali mwami omu israeli. Ngasimuguma akagijira ebianalonzize. ⁷ Hali misole muguma w'e Betlehemu ya Yuda, w'omumulala gwa Yuda, ali mulawi anali lamire eyo. ⁸ Oyomuntu agenda kurhenga e Betlehemu ya Yuda, okujilonza ahasimireokulama. Omukushimbulira olugenzi, ahika omumishozi ya Efrahimu kuhika omunyumpa ya Mika. ⁹ Mika amubwira: Ngahi orhenzire? Amushuza: ndi mulawi w'e Betlehemu ya Yuda, ndi omu lubalamo okulonza ahanalama hankwanine. ¹⁰ Mika amubwira: rhubere rhwembi; wambera larha na mudahwa; nanayishikuha shekeli ikumi za nfaranga oku mwaka, emyambalo walonza, n'okukulikira, n'omulawi adaha. ¹¹ Analonz'okubera boshi n'oyomuntu, wakahulika oyomurhabana nka muguma omu bagala. ¹² Mika aheba Oyo mulawi oku cikono, n'oyomurhabana amukolera nka mudahwa banalama boshi omunyumpa yage. ¹³ Na Mika aderha: mpanyire oku Nnamubaho anjirira aminja, bulya ngwerhe oyu mulawi now mudahwa.