¹ Abana b'israeli boshi bahuluka, kurhondra kuli Dani kuhika e Bersheba b'omucihugo c'e Galadi, n'entimanano yarhimanana nka muntu muguma embere za Nnamubaho, e Mispa. ² Abarhambo ba ngasi lubaga, ngasi buko bw'israeli, bayisha omuntimanano y'olubaga lwa Nnamahanga, bantu bihumbi magana gani oku magulu, balwi ba ntambala. ³ Na bene Benyamini bamanya oku Israeli anarhimanine e Mispa. Abana b'israeli baderha: murhubwire gurhi obubugoma bwajirikine? ⁴ Lero olya mulawi, iba wa namukazi wayirhagwa orhol'obuderhe, aderha: nahisire e Gibea ya Benyamini, n'omuherula wani okurhulaleyo. ⁵ Abantu b'e Gibea banyinukira, banazunguluk'enyumpa nalimwo budufu. Balilonzize okunyirha, na bacihusa kuli mukanie, anafa. ⁶ Nagwarha omuherula wani namutwa birholobirholo, nabirhuma omungo zoshi z'abisraeli; bulya najijire obulyalya n'obuhwinja omu Israeli. ⁷ Mucilolage mweshi bana b'israeli; mucidose, murhole n'omuhigo! ⁸ Olubaga lwoshi lwayimuka nka muntu muguma, omukuderha: ntaye mulirhwe washubira emwage, nantaye wagaluka omunyumpa yage. ⁹ Lolaga okurhwajia Gibea: rhwamurhablira okucigole. ¹⁰ Rhwarhola omu ngasi buko bwa Israeli balume ikumi okw'igana, igana oku cihumbi, na cihumbi oku bihumbi ikumi. Bajigendi longez'olubaga ebirio, lyo hanobagaluka, Gibea ya Benyamini ejirwe kushimbana obuhwinja bwabo bajijire omu Israeli. ¹¹ Ntyo olubaga lwoshi lwa israeli, lwacigushira okurhabalira omurhundu, bacigusha nka muntu muguma. ¹² Amuko b'israeli garhum'entumwa omu milala yoshi ya Benyamini okubabwira: bulyalya buci obwo bajirikine mulimwe? ¹³ Mulerhe abantu bahwinja bali e Gibea, lyorhubaniga, na rhurhenze obugoma omukagarhi ka Israeli. Cikwone bene Benyamini barhalonzagya okuyunva izi lya benewabo, bana b'israeli. ¹⁴ Bene Benyamini barhenga omumirhundu yabo, barhimanana e Gibea okulwisa Israeli. ¹⁵ Omuganjo bajijire olwolusiku gw'aba bene Benyamini barhenzire omumirhundu gwali gwa balume bihumbi makumi gabirhi na ndarhu, balwi ba ntambala, buzira okuganja abikala b'e Gibea balume magana nda ntwali. ¹⁶ Omwolwo lubaga lwoshi, mwali balume ntwali magana nda, barhakagi kolesa kuboko kulyo, aboboshi bakabanzire oluviri n'omuzareti buzira oku luhusha. ¹⁷ Bajira omuganjo gw'abana b'israeli, kurhenzamwo bene Benyamini,na babona balume bihumbi magana gani, badwirh'engorho, balwi ba ntambala. ¹⁸ N'abana b'israeli, bayinamuka e Beteli, na badosa Nnamahanga, omukuderha: ndi mulirhwe washokola okujilwisa bene Benyamini? Nnamubaho ashuza: Yuda ayinamuka burhagiriza. ¹⁹ Kurhondera sezi, abana b'israeli barhondera olugenzi, banahanda hofi n'e Gibea. ²⁰ Na abalume b'israeli bashegera okulwisa bene Benyamini, na bacikereka oku ntambala okubalwisa e Gibea. ²¹ Bene Benyamini bahuluka e Gibea, na balambika olwoluiku okw'idaho, balume bihumbi makumi gabirhi na bibirhi bya b'israeli. ²² Olubaga, abalume b'israeli baciricih'obushiru buhyahya okuntambala, honalya balwiraga olusiku lurhanzi. ²³ N'abana b'israeli bayinamuka, banalakira Nnamubaho kuhika bijingo, omukuderha: kangwasirwe ncirigenda okujilwisa bene Benyamini, mwene wani? Nnamubaho ashuza: yinamuka omurhabalire. ²⁴ Abana b'israeli barhabalira Benyamini, olusiku lw'akabirhi. ²⁵ Mwonomwolwo lusiku, Benyamini ahuluka omu Gibea barhimanana, balambika Kandi okw'idaho balume bihumbi ikumi bya Israeli, boshi balwi ba ntambala. ²⁶ Abana boshi b'israeli n'olubaga lwoshi, bayinamuka baja e Beteli, bayaka banabera embere za Nnamubaho, nacishalisa kuhika bijingo, Barhula ensirizi n'entulo z'omunkwa embere za Nnamubaho. ²⁷ N'abana b'israeli badosa Nnamubaho, sho hw'isandaku ly'endagano ya Nnamahanga lyali, ²⁸ Na Fineasi, mwene Eliazari, mwene Aroni, wakagiyimanga agomango embere za Nnamahanga, na baderha: kanacirhabalira kandi bene Benyamini, mwenewani, erhi ncilekere? Nnamubaho ashuza: oyinamuke, bulya irhondo nabaheba omumaboko gawe. ²⁹ Lero Israeli aheba abalinzire hofi na Gibea. ³⁰ Abana b'israeli barhabalira bene Benyamini, olusiku lw'akasharhu, banacikereka oku ntambala e Gibea, nkoku zindi nsiku za burhanzi. ³¹ Na Bene Benyamini bahuluka okushimana olubaga, banaceka okukululwa hali n'omurhundu. Nabarhonda okuniga omu lubaga nkoku zindi nsiku, oku mulimbwa muguma guyinamukire e Beteli n'ogundi e Gibea omumpingiro, banayirha hofi balume makumi gasharhu ga Israeli. ³² Bene Benyamini banyamini baderha: lolaga oku bamahimwa embere zirhu nka burhanzi! Cikwone abana b'israeli baderha: rhulibirhe, rhubakululire kuli n'omurhundu omunjira. ³³ Abalume ba Israeli boshi barhenga ahabali, banacikereka e Baali Tamari, n'abalinzire ba israeli bacilambula ahabali, omu luziba lw'e Gibea. ³⁴ Balume bihumbi ikumi balondole omu Israeli yeshi bahika e Gibea. Entambala yakaliha, naba Benyamini barhali rhimanyize amaligo gabagwarha. ³⁵ Nnamubaho ashurha Benyamini embere za Israeli, n'olwolusiku Israeli ayirha bihumbi makumi gabirhi na birhanu bya Benyamini, boshi balwi ba ntambala. ³⁶ Bene Benyamini babona nka israeli ahimirwe n'okusigira Benyamini obulambo n'okucikubagira abalinzire nalihebire e Gibea. ³⁷ Abalinzire bacikweba dubaduba omu Gibea, na bashurha omurhundu okubwoji bw'engorho. ³⁸ Kushimbana endagano abalume ba Israeli, n'abali linzire balikwanine okuyinamula mugi munene omu murhundu. ³⁹ Abana b'israeli bahindamuka omuntambala. Bene Benyamini balibamabanigamwo hofi balume makumi gasharhu, banaderha: okunali bamahimwa embere zirhu nkoku nsiku za burhanzi z'entambala. ⁴⁰ Cikwone, mugi munene gwarhondera bwarhenga omumurhundu. Erhi bene Benyamini balola enyuma lyabo, babona omugi guligwarhega omu murhundu guligwarhega emalunga. ⁴¹ Abana b'israeli balihindamusire; n'aba Benyamini bakanguka, erhibabona obuhanya bwabajakwo. ⁴² Bahindamuka omugongo embere ly'abana b'israeli, na balibirha omunjira y'ebwirungu. Cikwone ababalinzire babakanyakwo, banabashereza omunjira abalihulusire omumurhundu. ⁴³ Babwikire Benyamini, babakulikira, babatuntuma erhibalonza okurhamuka, kuhika hofi na Gibea oluhande lw'ebushoshokero. ⁴⁴ Kwahirima balume bihumbi ikumi na munani ba Benyamini, boshi ntwali. ⁴⁵ Mulibalya bahindwire omugongo mpu balibirhe olunda lw'ebwirungu okw'ibuye lye Rimoni, abalume b'israeli babanigamwo bihumbi birhanu omumilimbwa; banabakulikira kuhika e Gideomu, banabanigamwo bihumbi bibirhi. ⁴⁶ omubale gwoshi gw'aba Benyamini bafire olwolusiku gwali ga bihumbi makumi gabirhi na birhanu, balwi ba ntambala, boshi ntwali. ⁴⁷ Bantu magana ndarhu bahindamusire na balirhamire ebw'irungu okw'ibuye ly'e Rimoni, baberayo lugero lwa miezi ini. ⁴⁸ Abana b'israeli bashubira emwa bene Benyamini, banabashurha okubwoji bw'engorho, kurhangira okubantu n'omurhundu kuhika oku bishwekwa, nangaibyo barhimanyire. Banadulika muliro ngasi mirhundu babwineyo.