¹ Akanwa ka Nnamubaho kayishira Hosea, mwene Beeri omumango ga Oziasi, ga Yotamu, ga Ahazi na Ezekia bami b'e Yuda na omu mango ga Yeroboamu, mwene Yoasi, mwami w'israeli. ² Amango Nnamubaho abwira Hosea omwanzi burhangiriza, Nnamubaho amubwira: genda, oyanke omukazi w'endumba na w'omubana ba cibaraga; bulya ecihugo cabarazire, c'alesire Nnamubaho. ³ Anagenda, anarhola Gomeri, mwali wa Diblaimu. Anayalala anamuburhira omwana. ⁴ Na Nnamubaho amubwira: omuhamagale okw'izino lya Jizreli; bulya omukaanzi kasungunu, nashurh'enyumpa ya Yehu okugulya muko abulagaga e Jizreli, namalira obwami omunyumpa ya Israeli. ⁵ Agomango, nayishi vuna empenzi ya isaraeli omu lubanda lw'e Jizreli. ⁶ Gomeri aciri yalaka buhyahya, aburha omunyere. Na Nnamubaho abwira Hosea: omuyirike izino lya Lo Ruhama; bulya ntacigwarhe bwonjo oku nyumpa ya Israeli, ntanaci mubabalire. ⁷ Cikwone Nayishi babalira enyumpa ya Yuda, nayishi biciza kuli Nnamubaho, Nnamahanga wabo, na ntanayishi bacize erhi oku mpenzi, erhi oku ngorho, erhi oku ntambala, erhi oku biterusi, erhi oku balwi b'entambala. ⁸ Anenesa Lo Ruhama amonka, anayalala, aburha omugala. ⁹ Na Nnamubaho aderha: omuyirike Lo Amini; bulya murhali lubaga lwani, nani ntali Nnamahanga winyu. ¹⁰ Cikwone omubale gw'abana b'israeli gwayishibà nka mushenyi gw'omunyanja, gurhanka versa erhi kuganjwa; na aha bakagibabwira: murhali lubaga lwani! Bayishi babwira: Bene Nnamahanga ozine! ¹¹ Bene Yuda na bene Israeli bayishi cigusha, nokuciha murhambo muguma, na bayishirhenga omu cihugo, bulya olusiku lw'e jizreli lwayishiba lukulu.