¹ Mubwire bashinja binyu: Amini! Na balibinyu Ruhama! ² Musongere, musongere nyoko, bulya arhali mukaniè, nani ntali iba! Akule emalanga gage obubaraga bwage, na oku mabere gage obushungu. ³ Nkarhalintyo, namujira bushunzi, namuheba nkonku anaburhagwa, namujira nk'irungu, k'idaho lirhayera, namuyirhe n'enyorha; ⁴ ntanayishi yunvize abana bage obwonjo, bulya bali bana ba budumba. ⁵ Nina abarazire, owababurhaga acibonesize nshonji, bulya adesire: nagendera abira, bagwerhe bampa omugati n'amishi, ecibwikwa, entambala, amavurha gani n'ecinywebwa cani. ⁶ Byobirhumire lolaga, nazirha enjira yage n'amagangahwa n'okuhayinamula olukuta, lyo arhacibone enjira zage. ⁷ Ayishi kulikira abira bage, arhanaci bahikekwo; ayishi balongereza ci arhaciyishi babone. Lero ayishiderha: nagenda, nashubira emw'ibaniè murhanzi, bulya yonaligwerhe omurhula kulusha buno. ⁸ Arhamanyaga oku nie nakagi muhà engano, amahemba, n'amavurha, na bakarherekera oku mukolo ya Bali enfaranga n'amasholo nakagi muhà. ⁹ Byobirhumire nayishi shubirana engano yani oku kasanzi kayo, n'amahemba gani omu kaanzi kago, nanyishi kula ecibwikwa cani, n'enyabalo yani yali yabwikira obushunzi bwage. ¹⁰ Na lero nayishi bwikula enshonyi zage embere z'abira bage, nantaye wayishi muciza omu maboko gani. ¹¹ Nayishi malira omwishingwe gwage, amadinye gage, emibalukwe yage, esabato zage, na ngasi nsiku nkulu. ¹² Nayishi shereza enkoma zage n'emizabibu yage, erya akagi derha: lwoluhembo abira bani bampire! Nayishi bihindula muzirhu, na ensimba z'ebweru zibishereze. ¹³ Nayishi mushurha oku zirya nsiku akagi rherekera Bali, amango akagi heba olugondo na amagerha gage, n'okusholera abira bage n'oku nyibagira, kwo Nnamubaho adesire. ¹⁴ Byobirhumire lolaga, namukurugusa n'okumuheka omw'irungu, nanyishiderha n'omurhima gwage. ¹⁵ Eyo, nayishimuhà olukoma lwage n'olubanda lw'e Akori, nka muhango gwa bulangalire, na eyo, ayishikayimba nk'okumango g'obusole bwage, na nk'okulusiku arhengaga e misiri. ¹⁶ Omwagomango, kwo Nnamubaho adesire, wayishimpamagala: ibaniè! orhakanacimpamagala: nawirhu! ¹⁷ Nayishikula omukanwa kage amazino ga ba Bali, lyo barhacika cibonesa oku mazino gabo. ¹⁸ Omwagomango, nayishijira endagano n'ensimba z'ebweru, orhunyunyi rhwemalunga, na ebibulubulu byomw'idaho. Nayishi vuna omucihugo empenzi, engorho, nanyishi birhamusa oku murhula. ¹⁹ Nayishikusheba oku mango goshi, nayishikusheba oku bushinganyanya, okuli, olukogo n'obwonjo. ²⁰ Nayishikusheba oku bwikubagirwa, na wayishimanyirira Nnamubaho. ²¹ Agomango, nayishi shuza, kwo Nnamubaho adesire, nayishiyemera amalunga, nago gayishiyemera idaho. ²² Idaho lyayishiyemera emburho, engano, amahemba, n'amavurha; na byayishiyemera Jizreli. Nayishi cirhwerera Lo Ruhama omucihugo, nanyishi mujira olukogo; nanyishi bwira Lo Amini: oli lubaga lwani: naye ayishishuza: Nnamahanga wani!