¹ Bali oku bulanzi bwani, naliyimanzire oku mushonezo, bakagi yiririza, mpumbone ebi Nnamubaho ambwira, na ebi nashuza enyuma w'olubanja lwani. ² Nnamubaho antulira ecinwa, na anaderha: yandika obulebi: obuyandike oku cibaho lyo bukasomwa ngasi kasanzi. ³ Bulya buli bulebi akasanzi kamanyikine, bunayishire okuhikirira, na burhakana nywerha, buka cerwa obulindirire, bulya bwahikirira okunali. ⁴ Lolaga, obuzine bwage bwa hemusire, birhali bushinganya, ci omushinganya alama oku bwemere bwage. ⁵ Bishushanyibwe n'olalusire na was nzizi, cibonè arhakalama n'omurhula; anayambala nka cibikiro ca lufu; anacihamagalire embaga zohi, anagushe hofi naye abantu boshi. ⁶ Karhabe wakutwirwakw'omugani naboshi, n'oku ganyagusibwa? bayishiderha: ahehererwe orhumbika ebirhali byage! kuhika mangaci?... ahehererwe oyushula omuzigo gw'emyenda yage! ⁷ Kabogwerhe emyenda barhakuyishire kuguma? k'abashombanyi bawe barhayinuke? na wayishiba mpira yabo. ⁸ Bulya wahagwire mbaga nyinji, emisigala y'ezo mbaga yayishi kuhagula, bulya washahuzize miko ya bantu banji, wajijire mabi manji omucihugo, oku murhundu n'abikala boshi. ⁹ Ahehererwe orhumbikira enyumpa yage oluhembo lw'amabi, mpulyo ayinamula olwogo lwage, lyo acigaza oku kuboko kw'obuheherere. ¹⁰ Ezo ziri nshonyi za nyumpa yawe ojijire, omukushabula mbaga nyinji, na wene ocigomire. ¹¹ Bulya ibuye linayamire omu cibambazi , n'olupaho lushwesire oburhungiri lulishuze. ¹² Ahehererwe oyubaka omurhundu n'omuko, osinga omurhundu oku bulyalya! ¹³ Lolaga, amango Nnamubaho w'emirhwe abijiraga, embaga zakolera omuliro, n'abantu barhamira busha. ¹⁴ Bulya igulu lyayishi yunjula okumanya irenge lya Nnamubaho, nka ahidaku ly'enyanja oku mishi gayizungulusire. ¹⁵ Ahehererwe olalusa omulungu, kuliwe odubula akabindi kawe n'oku mulalusa, mpulyo obona obushunzi bwage. ¹⁶ Wayishi bona nshonyi kulusha irenge; nywa nawe, wene onacimanye! Akabehe k'ekulyo kwa Nnamubaho kakuyerekera, n'enshonyi zabwikira irenge lywe. ¹⁷ Bulya obuhanya kuli Liba bwakuhirimira, n'okuyona kw'ensimba kwa kuyobohya. bulya wabulazire omuko gw'abantu, n'okujira amaligo omucihugo, oku murhundu n'abikala bamwo. ¹⁸ Bici enshushano ntule ejira, lyo omutuzi ayitula? Bici enshushano nyayuse ejira na yao ekayigiriza obunywesi, mpulyo omukozi wayibumbaga aciyikubagira, cikwone anatule enshushano rhuduma. ¹⁹ Ahehererwe obwira omurhi: yimuka! okw'ibuye lirhaderha: zuka! kalyanayigiriza? Liri lishige amasholo n'enfaranga, ci muliryo murhali muka guli kolesa. ²⁰ Nnamubaho ali omu ishengero lyage licire. Igulu oyishi lihulike embere zage.