¹ Mabonekezi gafuliragwa Habakuki, mulebi. ² Kuhika mangaci, mashi Nnamubaho?... Nayakuzize ci orhali wayunva! Nakulakire oku kubonerwa, na orhacizagya! ³ Bulyagurhi oliwanyereka amabi onali walabiriza okubula olubanja? Bulyagurhi okuhalalirwa n'okubonerwa bindiemalanga, na akadali kazusire. ⁴ Lero n'irhegeko lirhaciriho, n'olubanja lurhacigwerhi misi, bulya omubi anahimire omushinganya, na obuzuzi buyobohinye. ⁵ Ololereze omu mashanja, osinze na onarhangale, munasomerwe! bulya najira ecijiro omumango ginyu ci murhahashe oku ciyemera. ⁶ lolaga, nashumika abakalidayo, lubaga lukali na lurhajira bwonjo, bayicira hagali omucihugo, mpu bacihe enciga zirhali zabo. ⁷ Abo bali ba cobohya na bazibu. Oburhwali bwabo buli mulibone n'obukulu bwabo. ⁸ Ebihesi byabo biri biribisi nka banamugunga ba bijingo, biri bikali nka kabwa k'emuzirhu, n'abasirika babo banajagenda n'enzizi, entwali zabo zinahike hali. Banaka balala nka nyunda wamagwa okubyo ashimbire. ⁹ aboboshi bayishire mpu bahagule, amasu gabo gahasire, na banarhumbike abashwekwa nka mushenyi. ¹⁰ Bali baganyagusa abami, n'abarhwali kuba yenega. Banashekere na ngasi Luvumbu, banacigabire Idaho banaliheke. ¹¹ N'okuharha kwabo kulushire, bagendekezize olugenzi, n'oku ciyaza. Na emisi yabo ye mungu wabo! ¹² K'orhali w'amango goshi, Nnamubaho, Nnamahanga wani, mucesibwa wani! rhurhafe o Nnamubaho, kawahebire olu lubaga mpu bakujirire olubanja, ewe lwala lwani, kawabadwirhe oku bahane obuhane bwawe? ¹³ Amasu gawe gali macesibwa bwenene okubona amabi, na orhakanasinza amaligo. Bulyagurhi oliwasinza amaligo onahulike. Erhi omubi akayirha omushinganya kumulusha? ¹⁴ Kakwowajira omuntu nka nsamaki z'omu nyanja, nka cibulubulu cirhajira murhegesi? ¹⁵ Banaziyinamule oku lulobo, n'okuziheba omu keshe. Banazirhumbike omu keshe. N'ebyo byo bishagalusa n'oku simisa. ¹⁶ Byobirhuma barhulira akeshe kabo. bulya kulibyo ecigabi Cabo ciba cishushagire, n'ebiryo byabo bishamu. ¹⁷ K'ebyo byobyabalerha, ka bagendekera bayirha buzira bwonjo?