¹ Bene wirhu, erhi omuntu akaba amagwarhwa omukijira ebirhashinganini, mwe mugwerhe mûka ocire, munamugalule omunjira nyija n'omurhima mutudu. Onacilange wenene, omanye nawe wankarhangulwa. ² Murhwazanye emizigo nantyo kwo mwahasha okushimba amarhegeko ga Kristu. ³ Erhi omuntu akacibona nka hali okwali n'obu arhaco kuli erhi kurheba acirhebire. ⁴ Yanga, ngasi muguma alole gurhi ebijiro byage biyosire, nantyo kwo amanya kurhi acikunga mwo, ci arhali kucigerera oku bandi; ⁵ bulya ngasi muguma ayishi berhula omucimba gwage yene. ⁶ Oly'ayigirizibwa ebinwa ashinganine ecigabi oku birugu byage bwoshi emw'olya ogwerhe amuyigiriza. ⁷ Murhacirhebaga om'ebyo. Nnâmahanga arhaganyagusibwa, eci omuntu arhezire c'ananahumbule. ⁸ Owankahingira omubiri gwage anaguhumbulire obusherere; cikwone owankahingira omurhima gucire anaguhumbulire obulamu. ⁹ Rhurharhamaga okujira aminja; bulya rhwayishi humbula hano akashanzi kakwanine kahika, erhi ankaba rhurha rhamiri. ¹⁰ Co cirhumire, nkarhucigwerhe oku rhmankajira rhukol'ebinja emw'angasi yeshi, na bwenene emwa bene wirhu b'obwemere. ¹¹ Lolagi emyandiko minene namuyandikire n'okuboko kwani nyene. ¹² Abali balonza okuciyerekana binja oku mubiri bali bakumuseza mpu lyo mukarhwà, kuli kuguma kwone mpulyo barhagi libuzibwa erhi musalaba gwa Kristu gurhuma. ¹³ Bulya abakarhe nabo barha shimbiri amarhegeko; cikwone balonzize rhukarhwe, lyo bacikuza erhi mibiri yinyu erhuma. ¹⁴ Oku binyerekire, entanya z'oku cibarhula zirhandimwo k'arhali oku musalaba gwa Nnahamwirhu Yezu Kristu, muliye, omubiri ngubishire, nk'oku mukulikira omw'igulu! ¹⁵ Bulya kuli kwa bushà okukarhwa erhi okurhakarhwa; okuli kwinja, kuli kuba ciremwa cihyahya. ¹⁶ Omurhula n'emigisho bibe okubalya banashimbulira er'irhegeko boshi, n'oku Israeli wa Nnamahanga. ¹⁷ Mashi gurhenga buno Omuntu arhaci ndulukizagya, Bulya nkola nyunjwire bimanyiso bya Yezu oku mubiri gwani. ¹⁸ Benewirhu, mashi Olukogo lwa Nnahamwirhu Yezu Kristu lube haguma n'emirhundu yinyu! Bibentyo.