¹ Erhi kugera miaka ikumi n'ini, nacirishonera eyerusalemu rhwene Baranaba, nayisha ndwirhe na Tito; ² Nayija enyuma z'okufululirwa oku nyiyinamukire. Nabamanyisa emyanzi 'omurhula nkayigiriza abapagani, n'ebirongozi kulusha, Oyo ntali rhamira bushà. ³ Cikwone Tito, rhwali rhwenaye ali mugriki, arhasezibagwa mpu akarhwé. ⁴ Nantyo, ahanyana ly'abalya baberuza barhudahamwo okw'ihwe, bali bunirhiza mpu balole oluhuma rhujira muli Yezu Kristu, mpu lyo barujira bajà. ⁵ Rhurhabahaga ciru akasnzi katya rhwanalahira ebi bali rhurhegesire, ly'okuli kw'emyanzi y'akalembe kusera mulimwe. ⁶ Abalidesirwe birongozi nk'oku Bali burhanzi, kurhambwiraga bici: Bulya Nnamahanga arhasiza nshusho, balya bali birongozi ntaco bansezize okujira. ⁷ Cikwoki, babona oku nahabirwe emyanzi y'akalembe oku barhali bakembule nk'oku Petro anaihabagwa oku bakembule; ⁸ Bulya owajiraga Petro okuba ntumwa y'abakembule, nani kwonoko ye wanjiraga ntumwa oku bapagani ⁹ n'omukumanya Olukogo nahabirwe, Yakobo na Kefa na Yohana, bo bakagi lolwa nka bakulu, banampa nie na Baranaba okuboko kw'olushange, lyo rhugenda rhwehe emw'abapagani, nabo emwa abakarhe. ¹⁰ Barhuhunyire mpu rhukakengera abakenyi, nani hyo nasezizagye okujira. ¹¹ Cikwone erhi Kefa ayisha e Antyokiya, nalahira ebyage masu oku masu, Bulya alihabire bwenene hakutwirwa lubanja. ¹² Bulya, embere z'okuhika kw'abarhumisi ba Yakobo; akazigi rya n'abapagani, nabo erhi bahika, aciyegula n'oku ciberula, omu kuyoboha abakarhe. ¹³ Hehe n'abandi bayahudi barhondera okucifulika, kuhika Baranaba naye agwarhwa n'obulyalya bwabo. ¹⁴ Erhi mbona oku olugenzi lwabo lurha shinganini, n'oku lurha kulikiri okuli kw'emyanzi y'akalembe, nabwira Kefa embere z'abantu boshi: weri muyahudi, ci orhalamiri nka muyahudi, kurhigi wankalonza okuseza abarhali bayahudi mpu balame omu cikono c'obuyahudi? ¹⁵ Rhwono, rhwaburhagwa bayahudi, ci Rhurhabahaga banyabyaha omu bapagani. ¹⁶ Cikwone, rhumanyire oku arhali oku mikolo y'amarhegeko kw'omuntu ashinganana, ci omu kuyemera Yezu Kristu. nanirhu rhwayemire Yezu Kristu, mpu lyo rhumanyikana oku rhukola bashinganya omu kuyemera kristu ci arhali oku amarhegeko gadesire, bulya ntaye ogwerhe omubiri wamanyikana oku ali mushinganya erhi bijiro by'amarhegeko birhuma. ¹⁷ Ci birintya, rhwalonza oku manyikana bashinganya muli Kristu, ci erhi ankaba rhwacibwine rhwene banabyaha, ka Kristu all cirongozi ca byaha? Birhali ciru ehitya! ¹⁸ Bulya erhi nanka ciriyubaka ebi nashabaga, kuli kuyerekana oku ndi omu mahushe. ¹⁹ Bulya amahano go nafirekwo mpu lyo mpasha oku lama was Nnamahanga. ²⁰ Nabambirwe oku musalaba haguma na Kristu, na akaba ndamire, arhaciri nie ndamire, ci Kristu omu ndalala zani; ankaba ndamire buno omu bubiri, ndamire oku bwemere bwa mwene Nnamahanga, wansimaga anahana obulamu bwage erhi nie ntuma. ²¹ Ntakalahira olukogo lwa Nnamahanga; Bulya ankaba obushinganya bubonekana oku marhegeko, ntyo erhi Kristu bushà afirire.