¹ Galimango ga Aswero, g'oyo Aswero, walirhambwire kurhonderera Ebuhindi kuhika e Etiopi, oku mirhundu igana na makumi gabirhi na nda; ² na mwami Aswero ali oku kanyabwami Kate e Size, omu murhundu mukulu. ³ Omwaka gwa kasharhu bw'oburhegesi bwage, ajirisa idinye oku barhwali bage boshi n'oku bakozi bage; barhegesi ba basirika b'e persi na medi, abakulu n'abarhambo b'emirhundu boshi barhimanana embere zage. ⁴ Alangulana oburhwali bw'obugale bwage, oburhwali bw'obwami bwage, n'obuhashe n'irenge lyage nsiku nene, lugero lwa nsiku igana na makumi galimunani. ⁵ Erhi ezonsiku zikola zahwa, mwami ajirira olubaga lwoshi lwali e Size omu murhundu mukulu, kurhonderera oku mukulu kuhika oku mwana murho, idinye lya nsiku nda, omungo y'enyumpa y'akanabwami. ⁶ Amarangi meru, na ga bule, galishwesirwe n'emigozi ya marangi madukula n'engondo z'enfaranga nentuga z'amabuye malambike. Ensingo zali za masholo na nfaranga oku bululi bulambike oku mabuye minja ga ngasi lubero. ⁷ Bakagihanira ecinywebwa omu bikombe by'amasholo, bya ngasi lubero, na hali cinywebwa ca ngasi lubero kushimbana obuhanyi bwa mwami. ⁸ Cikwone barhakagi seza muntu okunywa, bulya mwami alirhegesire okubakozi bage boshi oku bahe ngasi muguma ebi anasimire. ⁹ Omugoli Vashti naye ajirira abakazi idinye omu kanyabwami ka mwami Aswero. ¹⁰ Olusiku lwa kalinda, nkoku omurhima gwa mwami gwalishalusire oku cinywebwa, arhegeka Mehumani, Bizita, Harbona, Bigta, Abagta, Zetari na Karkasi, bajinji nda bakagikola embere za mwami Aswero, ¹¹ oku balerhe omugoli Vashti embere za mwami, n'ishungwe ly'obwami, lyo alangulana obwinja bwage oku lubaga, oku bakulu, bulya ali mwinja wa nshusho. ¹² Cikwone omugoli Vashti alahirwe oku arhakayisha, erhi ahabwa irhegeko n'abajinji kurhenga mwami. Na mwami agaya bwenene, n'okuba burhe. ¹³ Lero mwami abwira abanyabwenge baligwerhe obumanyi bw'akasanzi. Bulya ntyo kwo ebya mwami byakagi jirwa, embere za boshi balimanyire amarhegeko n'obushinganya. ¹⁴ Aligwerhe hofi naye Karshena, Shetari, Admata, Tarsisi, Meresi, Marsena, Memukani, barhwali nda ba Medi na ba Persi, bakagibona mwami n'a bali oku birhi bya mbere omu bwami. ¹⁵ Baderha; irhegeko lici rhwajirira omugoli Vashti, okurhajira ebi mwami Aswero anamurhegekaga kugerera abajinji? ¹⁶ Memukani ashuza embere za mwami n'abarhwali: arhali mwami yene omugoli Vashti anagokize; cikwone ciru n'abarhwali boshi n'olubaga lwoshi omu mirhundu yoshi ya mwami Aswero. ¹⁷ Bulya ecijiro c'omugoli Vashti camanyikana oku bakazi boshi, na carhuma bagomera biba, n'okuderha: mwami Aswero arhegekaga oku balerhe omugoli Vashti, arhanayishaga. ¹⁸ Na kurhangira aho abarhwali ba Medi na Persi bayishi manya ecijiro c'omugoli bamanyisa ngasi barhambo ba mwami, na kulibyo kagayo kanene na burhe. ¹⁹ Nkaba bisimisize mwami, bayalagaze kurhenga emwage, na biyandikwe omu marhegeko g'aba Medi na Persi, n'endahiro y'okulivuna, irhegeko ly'akanyabwami oku Vashti arhacibonekaga emalanga ga mwami Aswero, na mwami ahane irenge lwy'obugoli oku windi mwinja. ²⁰ Irhegeko lya mwami lyamanyikana omu bwami bwoshi, na ngasi mukulu yeshi, n'abakazi boshi bakenga b'iba, kurhangira oku mukulu kuhika oku murho. ²¹ Ogwomwanzi gwayemerwa na mwami n'abarhwali, na mwami ajira kushimbana akanwa ka Memukani. ²² Arhuma amaruba omu mirhundu y'obwami bwage bwoshi,ngasi murhundu kushimbana oluderho lwamwo, na ngasi lubaga kushimbana oluderho lwabo; na byaliyandisirwe oku ngasi mulume ashinganine arhegeke enyumpa yage, na okukderha oluderho lw'olubaga lwage.