¹ Myanzi ya Amosi, muguma omu bangere b'e Tekoa, mabonekezi abonaga kuli Israeli, okumango ga Uzia, mwami we Yuda, n'amango ga Yeroboamu, mwene Yoashi, mwami w'israeli, myak'ibirhi embere ly'omujugumo gw'ecihugo. ² Aderha: Kurhenga e Sioni Nnamubaho ali amoka, kurhenga e Yerusalemu ali ayunvisa izu lyage. Amalambo g'abangere gali omu mishibo, na ecirera ca Karmeli ciyumusire. ³ Ntya kwo Nnamubaho adesire: Enyana lya mahushe gasharhu ga Damaski, na ciru gani, ntagalule irhegeko lyani, bulya balabasire Galadi oku bilabarhiro by'ecuma. ⁴ Nayishirhuma omuliro omunyumpa ya Hazeli, na bwayishi yoca enyumpa ya Bene-Hadadi. ⁵ Nayishi vuna ebikomero bya Damaski, nayishi hererekeza abikala b'e Bikati Aveni, na ogwerhe akanyabwami omu Beti Edeni; na olubaga lw'e Ashuru lwahekwa mpira e Kiri, kwo Nnamubaho adesire. ⁶ Ntya kwo Nnamubaho adesire: enyana lya mahushe gasharhu ga Gaza, naciru gani, ntagalule irhegeko lyani, bulya bajijire ishanja ligumana mpira okulihekera Edomu. ⁷ Nayishi rhuma omuliro omu nkuta zabo z'e Gaza, na gwayishi bayokera enyumpa. ⁸ Nayishi hererekeza abikala b'omu Asdodi, n'e Ashkeloni ogwerhe akanyabwami; nayishi hindulira okuboko kwani kuli Ekroni, n'emisigala y'abafilisti ehererekere, kwo Nnahamwirhu adesire, Nnamubaho. ⁹ Ntya kwo Nnamubaho adesire: enyana lya mahushe gasharhu ga Tiro, naciru gani, ntagalule irhegeko lyani, bulya bahanyire ishanja ly'empira kuli Edomu, buzira okukenga endagano yabaguma. ¹⁰ Nayishirhuma omuliro omu nkuta z'e Tiro, na gwabayokera enyumpa. ¹¹ Ntya kwo Nnamubaho adesire: enyana za mahushe gasharhu ga Edomu, naciru gani, ntagalule irhegeko lyani, bulya akulikire benewabo n'engorho, omukuhubya obwonjo bwage, bulya omujina gwage guciri gwa shereza, na abizire obokunizi bwage amango goshi. ¹² Nayishirhuma omuliro omu Temani, na gwayishi yoca enyumpa za Bostra. ¹³ Ntya kwo Nnamubaho adesire: enyana lya mahushe gasharhu g'abana ba Amoni, naciru gani, ntagalule irhegeko lyani, bulya bakanwire enda z'abakazi bali mazimi b'e Galadi, mpulyo bayushula amalambo gabo. ¹⁴ Nayishi yasa omuliro omu nkuta za Raba, na gwayishi yoca enyumpa, omukagarhi k'endulu z'entambala olusiku lw'amatbaro, omukagarhi k'ecihusi olusiku lw'omusirula. ¹⁵ Na mwami wabo ayishihekwa mpira, Ye n'amabarhambo bage haguma, kwo Nnamubaho adesire.