¹ Theofile, naganire, omu citabu cani cirhanzi, byoshi Yezu arhangizize okujira n'oku yigiriza kurhenga omurhondero ² Kuhika olusiku alengezibagwa empingu, erhi amahana amarhegeko, oku mûka mwimana, emw'entumwa alondolaga. ³ Erhi aba amalibûka, abonekana emwabo azîne, n'oku bayereka ebimanyuso binji, aciyerekana emunda bali nsiku makumi gani, n'okukaderha ebiyerekire obwami bwa Nnamahanga. ⁴ Erhi akol'ali nabo, abarhegeka oku barhajaga hali n'e Yerusalemu, cikwone balindirire eciragane ca larha, cirya nababwiraga, kwo adesire; ⁵ Bulya Yohana abatizize oku mishi, cikwone mwehe, omu nsiku nsungunu, mwa batizibwa na Mûka Mwimana. ⁶ Entumwa zali haguma lero zamudosa: Nnahamwirhu, kako kasanzi wayimanza obwami bw'Israeli? ⁷ Lero abashuza: Mushinganine mumanye akasanzi larha arheganyize omu buhashe bwage. ⁸ Cikwoki mwayankirira obuhashe, Mûka Mwimana abahonokera, na mwaba bahamiriza bani e Yerusalemu, omu yudea, omu Samaria, na kuhika oku buzinda bw'igulu. ⁹ Erhyaba amaderha ntyo, ayimusibwa erhi anali abasinza, n'olwikungu lwamubwika barhacimubonaga. ¹⁰ Na erhi baba bakola bahenekir'empingu erhi akola acigendera, lolaga, balume babiri baliyambirhe ebyeru bababonekera, ¹¹ N'oku babwirakuhi: Mwe bantu b'e Galilaya, bulya gurhi muyimanzire okugalamira empingu? Oyo Yezu, omurhenzire mwo, arheremera empingu, kwo anânagaluke nk'oku mwamubwine arheremera empingu. ¹² Lero banashubira e Yerusalemu, oku ntondo ehamagirwe y'e Mizetuni, eri hofi n'e Yerusalemu, oku lugenzi lwa sabato. ¹³ Erhi bahika, erhi bahika bashonera omu nyumpa ye nyanya omu balikomire bakabera ngasi mango; Hali Petero, Yohana, Yakobo, Andrea, Filipo, Tomaso, Bartolomayo, Matayo, Yakobo, mugala wa Alfayo, Simoni mu Zeloti, na Yuda, mugala wa Yakobo. ¹⁴ Boshi okubuguma bali lamire oku mahuno, haguma na bakazi, na Maria, nnina wa Yezu, nabalumuna ba Yezu. ¹⁵ Mw'ezo nsiku, Petero anayimanga ekarhi k'ababo, yali ndeko ya bantu hofi igana na makumi abirhi. Ababwira, erhi: ¹⁶ Bene wirhu, byalishinganine bihikirire ebi Mûka Mwimana amanyusize omu mandiko, omu kanwa ka Daudi, enyanya lya Yuda, owali cirongozi c'aba gwarhaga Yezu. ¹⁷ Ali muguma omu kagarhi kirhu, na muguma omu cikono cirhu. ¹⁸ Oyo mulume, erhi aba anahabwa ishwa n'oluhembo lw'obulyalya, lero ahirima, atwika mw'ebirholo, n'amala gage gashambukira okw'idaho. ¹⁹ Eyo myanzi yamanyikine n'abantu b'e Yerusalemu oku ely'ishwa lyali hamagirwe oku lulimi lwabo "Hakeldama" kwo kuderha "ishwa ly'omuko". ²⁰ N'obwo, biyandisirwe omu citabu ce Nanga oku: Aha mwage hayorhe bumu bumu, hanabule owa hayubaka! N'ecikono cage cihabwe owindi! ²¹ Bishinganine, omwaba boshi bali haguma na nirhu omu kasanzi Nnahamwirhu Yezu alamire haguma na nirhu, ²² Kurhenga obu batizo bwa Yohana kuhika oku lusiku ahekgwa kurhenga omu kagarhi kirhu, hali muguma bahumanize oku rhwe nka muhamirizi w'oku fuka kwage. ²³ Balerha babiri: Yosefu waderhagwa Barsaba, kandi ye Yusto, na Matiasi. ²⁴ N'okwo, Bashenga: Nnahamwirhu, we manyire emirhima y'abantu boshi, orhuyereke ohi muguma ocishozire omwaba babiri, ²⁵ Ahabwe, mw'obu burhumisi n'ogu mukolo, encokono Yuda asigaga erhi agenda lwage. ²⁶ Banaciyesha ecigole, canagwarha Matiya; aganjwa muli zirya ntumwa ikumi na nguma.