¹ Omwanzi gwa samweli gwana yalagazibwa omw'israeli yoshi. Israeli agenda okurhimanana n'abafilisti oku ntambala. Bahanda hofi n'ebenezeri, n'abafilisti balihanzire e apeki. ² Abafilisti bacikereka oku ntambala okulwisa Israeli. N'entambala yarhondera. Israeli ashurhwa n'abafilisti, bayirha honaho hofi balume bihumbi bini. ³ Olubaga bagaluka omw'ikambi, n'aboshi abisraeli baderha: bulya gurhi Nnamubaho anarhulesire end rhwashurhwa n'abafilisti? rhugende eshilo rhujilonza isandaku lyendagano ya Nnamubaho; libè omugarhi kirhu, lirhucize omu kuboko kw'abashombanyi birhu. ⁴ Olubaga lwarhuma eshilo, okulerha isandaku ly'endagano za Nnamubaho w'emirhwe odekerire omu garhi kaba makerubi. Bene Eli bombi, Hofni na Pine, baly'aho, n'isandaku lyendagano za Nnamahanga. ⁵ Erhi isandaku ly'endagano lidaha omw'ikambi, Israeli yeshi aba,nda ecihogero oku gushagalusire, n'idaho lyadundagana. ⁶ Ecihogero c'okubalanjira kwabo cayunvikana n'abafilisti, baderha: bici bidwirhe eco cihogero omw'ikambi ly'abaebrania? Bamanya oku isandaku lya Nnamubaho lijire omw'ikambi. ⁷ Abafilisti bayoboha, bulya bamanya oku Nnamahanga anayishire omw'ikambi lyabo. Obuhanya emwirhu! baderha; bulya birhasagibà ntya bundi kuhika buno! ⁸ Obuhanya emwirhu! ndi warhuciza omukuboko kw'eyo miungu ntwali? Eyo miungu to yashurhag'abemisiri oku buhane bwa ngasi lubero omw'irungu. ⁹ Muzibuhe munabe balume, bafilisti, lyo murhakiba bajà babaebrania nkoku babajiraga bajà; mube balume munalwe. ¹⁰ Abafilisti banarhangiza entambala na Israeli ashurhwa. Ngasi muguma alibirhira omu cigala cage. Okuhimwa kwali kunene, kwahirima balume bihumbi makumi basharhu b'israeli bagendà. ¹¹ Isandaku lya Nnamahanga lya gwarhwa, na Bene Eli bombi Hofni na Pine banafa. ¹² Mulume w'okubene Benyamini Alibirha kurhenga omw'ikambi ly'entambala aja eshilo lwonolwo lusiku, emishangi eberesire n'irhwe liyunjwire idaho. ¹³ Erhi ahika, Eli ali omukulindirira, alitamire oku ntebe hofi n'enjira, bulya omurhima gwage gwali yobohirè isandaku lya Nnamahanga. Erhi ahika omu murhundu oyo muntu ahan'emyanzi, omurhundu gwoshi gwa band'endulu. ¹⁴ Eli, erhi ayunv'endulu, aderha: bici ezo ndulu nene zidesire? Honaho oyo muntu ayisha abwira Eli ebyabire. ¹⁵ Nobwo Eli aligwerhe myaka makumi galimwenda na munani, aligwerhe amasu marhomole, arhanaci kazigibona. ¹⁶ Oyo muntu abwira Eli: ntezire omw'ikambi ly'entambala, n'omwikambi ly'entambala nayakaga ene. Eli ashuza: gurhi byabire mwana wani? ¹⁷ Owalidwirhe emyanzi aderha: Israeli akamubwizire embere z'abafilisti, n'olubaga lwahimirwe bwenene, ciru bagala bawe bombi, Hofni na Pine bafire, n'isandaku lya Nnamahanga lya nyazirwe. ¹⁸ Erhi agereza isandaku lya Nnamahanga, Eli ahirima kurhenga oku ntebe"abalanduka" ahaburhambi ly'omuhanga; avunika igosi anafa, bulya alikola mushosi Abali muzirhu. Abire muzuzi omw'israeli myaka makumi gani. ¹⁹ Omwalikazi, mukà Pine, erhi ali izimi omukahikirizo, erhi ayunv'eyo myanzi okunyagwa isandaku, okufa kw'ishazala n'okwiba, ashurhama aburha bulya amalumwa gamukanga. ²⁰ Bulya kufa alyafa, ci abakazi bali muyegire bamubwira: orhayobohe bulya wanaburha omurhabana! ci arhabashuzagya arhana bigererezagya. ²¹ Ayirika oùwana Ikabodi, omu kuderha: irenge lyarhenzire omu Israeli! enyanya z'okunyagwa isandaku lya Nnamahanga, n'enyanya z'okufa kw'ishazala n'okwiba. ²² Aderha: irenge lyarhenzire omu Israeli, bulya isandaku lya Nnamahanga lya nyazirwe.